അച്ഛനൊപ്പം ശബരിമല അയ്യപ്പനെ കാണാനെത്തിയ പെണ്‍കുട്ടിക്ക് മുന്നില്‍ ആധാര്‍ വില്ലനായി. പോണ്ടിച്ചേരി സ്വദേശിയായ പെണ്‍കുട്ടി ഇതോടെ ദര്‍ശനം നടത്താതെ മടങ്ങി. പൊലീസിന്റെ വെര്‍ച്വല്‍ക്യൂ ബുക്കിംഗില്‍ 10 വയസ് എന്നാണ് കാണിച്ചിരുന്നത്. വനിതാ പൊലീസ് ആധാര്‍ പരിശോധിച്ചപ്പോള്‍ 12 വയസാണെന്ന് മനസ്സിലായി. അതോടെയാണ് മലകയറ്റാതെ മടക്കിയയച്ചത്. കുട്ടിയുടെ കൂടെ വന്ന പിതാവിനെയും ബന്ധിക്കളെയും ശബരിമലയിലെ നിലവിലെ സാഹചര്യം പറഞ്ഞ് മനസ്സിലാക്കിയ ശേഷമാണ് തിരിച്ചയച്ചത്. കോടതി വിധിയിലെ അവ്യക്തതയും ആചാരങ്ങളെ കുറിച്ച് വ്യക്തമായി അറിവില്ലാത്തവരുമാണ് ഇത്തരത്തില്‍ ദര്‍ശനത്തിനെത്തുന്നതെന്ന് പൊലീസ് പറഞ്ഞു.

അതേസമയം സന്നിധാനത്ത് ദര്‍ശനത്തിനെത്തിയ ഒന്‍പത് വയസ്സുകാരി പെണ്‍കുട്ടി കഴുത്തില്‍ റെഡി ടു വെയ്റ്റ് എന്ന പഌക്കാര്‍ഡ് അണിഞ്ഞെത്തിയത് ശ്രദ്ധേയമായി. ബാംഗ്ലൂരില്‍ താമസിക്കുന്ന തൃശൂര്‍ സ്വദേശി ഹൃദ്യാകൃഷ്ണനാണ് ഇന്നലെ ദര്‍ശനം നടത്തിയത്. മൂന്ന് തവണ ശബരിമല ദര്‍ശനം നടത്തിയ തനിക്ക് ഇനി 50 വയസ്സിന് ശേഷമേ മലകയറാന്‍ സാധിക്കൂ എന്ന് ഹൃദ്യാകൃഷ്ണന്‍ പറഞ്ഞു. മണ്ഡലകാലം ആരംഭിച്ച കഴിഞ്ഞയാഴ്ച 12 ആന്ധ്രാസ്വദേശിനികള്‍ ദര്‍ശനത്തിനെത്തിയെങ്കിലും പൊലീസ് കാര്യങ്ങള്‍ പറഞ്ഞ് മടക്കി അയയ്ക്കുകയായിരുന്നു. മലയാളി യുവതികളാരും ഇതുവരെ ദര്‍ശനത്തിനെത്തിയിട്ടില്ല. യുവതികള്‍ക്ക് പൊലീസ് സംരക്ഷണം നല്‍കില്ലെന്ന് ദേവസ്വം മന്ത്രി കടകംപള്ളി സുരേന്ദ്രന്‍ വ്യക്തമാക്കിയിട്ടുണ്ട്. ആര്‍ക്കെങ്കിലും ദര്‍ശനം നടത്തണമെന്ന് ആഗ്രഹമുണ്ടെങ്കില്‍ സുപ്രീംകോടതിയില്‍ നിന്നും ഓര്‍ഡര്‍ വാങ്ങിക്കൊണ്ട് വരണമെന്നും അദ്ദേഹം പറഞ്ഞിരുന്നു.

യുവതികളെത്തിയാല്‍ തടാന്‍ ശബരിമല കര്‍മസമിതി പ്രവര്‍ത്തകര്‍ നിലയ്ക്കല്‍ മുതല്‍ സന്നിധാനം വരെ തമ്പടിച്ചിട്ടുണ്ട്. അതിന് പുറമേ എല്ലാ വാഹനങ്ങളിലും വനിതാ പൊലീസ് ഉള്‍പ്പെടെ കര്‍ശന പരിശോധന നടത്തിയ ശേഷമാണ് പമ്പയിലേക്ക് കടത്തിവിടുന്നത്. പൊലീസ് സുരക്ഷയൊരുക്കില്ലെന്ന് ഉറപ്പായതോടെ തമിഴ്‌നാട്ടില്‍ നിന്ന് ദര്‍ശനത്തിന് എത്തുമെന്ന് അറിയിച്ചിരുന്ന മനീതി സംഘം ഉള്‍പ്പെടെ നിലപാട് മാറ്റിയെന്നാണ് സൂചന. ബി.ജെ.പി ഇത്തവണ സമരരംഗത്തില്ല. ആര്‍.എസ്.എസിന്റെ നേതൃത്വത്തില്‍ കര്‍മസമിതിയാണ് ചെറു സംഘങ്ങളായി എല്ലാ ദിവസവും ദര്‍ശനത്തിനെത്തുന്നത്. കഴിഞ്ഞതവണ അറസ്റ്റിലായവരെയും കേസില്‍ ഉള്‍പ്പെട്ടവരെയും ഒഴിവാക്കിയിട്ടുണ്ട്. കോടതി വിധിയില്‍ സ്‌റ്റേ ഇല്ലെങ്കിലും സര്‍ക്കാര്‍ യുവതീപ്രവേശനത്തില്‍ അനുകൂല നിലപാട് സ്വീകരിക്കാത്തത് ബി.ജെ.പിക്കും കോണ്‍ഗ്രസിനും തിരിച്ചടിയായി.

വെര്‍ച്വല്‍ ക്യൂവിലൂടെ ബുക്ക് ചെയ്ത 36 യുവതികളില്‍ 12 പേരാണ് ഇതുവരെ ദര്‍ശനത്തിനെത്തിയത്. അവരെ കാര്യങ്ങള്‍ പറഞ്ഞ് മനസ്സിലാക്കി മടക്കിയയച്ചു. തൃപ്തി ദേശായി ഉള്‍പ്പെടെയുള്ള ആക്ടിവിസ്റ്റുകള്‍ മലകയറാന്‍ എത്തുമെന്ന് നേരത്തെ പ്രഖ്യാപിച്ചെങ്കിലും പിന്‍മാറിയെന്നാണ് അറിയുന്നത്. സര്‍ക്കാര്‍ സുരക്ഷ നല്‍കാതെ യുവതികള്‍ക്ക് മലകയറാന്‍ ആകില്ലെന്ന് ഉറപ്പായതോടെയാണ് പലരും പിന്‍മാറിയതെന്ന് അറിയുന്നു. 50 വയസിന് മുകളിലുള്ള യുവതികളെ മാത്രമാണ് ഇത്തവണയും ശബരിമലയിലും സന്നിധാനത്തും ഡ്യൂട്ടിക്ക് വിന്ന്യസിച്ചിരിക്കുന്നത്. കഴിഞ്ഞതവണത്തെ പോലെ ഭക്തരാരും സ്ത്രീകളെ തടയുകയോ, തിരിച്ചറിയല്‍ രേഖകള്‍ പരിശോധിക്കുകയോ ചെയ്തിട്ടില്ല.