സെമി ഹൈസ്പീഡ് റെയില്വേ ഇടനാഴി പദ്ധതിയായ 'സില്വര് ലൈന്', തിരുവനന്തപുരം-തൃശൂര് യാത്രാസമയം 2 മണിക്കൂര് 19 മിനിറ്റ് ആക്കും!
കേന്ദ്ര അനുമതി ലഭിച്ച കാസര്കോട് മുതല് തിരുവനന്തപുരം വരെയുള്ള സെമി ഹൈസ്പീഡ് റെയില്വേ ഇടനാഴി (വേഗ റെയില്പാത) പദ്ധതിയായ 'സില്വര് ലൈന്' യാഥാര്ഥ്യമായാല് തിരുവനന്തപുരത്തു നിന്നു തൃശൂരിലേക്ക് 2 മണിക്കൂറില് എത്താം! തൃശൂര്കാര്ക്ക് ഇനി കാസര്കോട് ബേക്കല് കോട്ടയില് പോകണമെങ്കിലും തിരുവനന്തപുരത്ത് കോവളം ബീച്ചില് പോകണമെങ്കിലും 2 മണിക്കൂര് മതി.
കേന്ദ്ര റെയില്വേ മന്ത്രാലയം, കേരള റെയില് വികസന കോര്പറേഷന് (കെആര്ഡിസിഎല്) നിക്ഷേപ സമാഹകരണവുമായി മുന്നോട്ടു പോകാനുള്ള അനുമതിയാണ് തത്വത്തില് നല്കിയത്. തിരുവനന്തപുരത്ത് നിന്ന് ഒന്നര മണിക്കൂറിനുള്ളില് എറണാകുളത്തും 4 മണിക്കൂറിനുള്ളില് കാസര്കോടും എത്താന് കഴിയും. കാസര്കോടിനും മലപ്പുറം തിരൂരിനുമിടയില് നിലവിലുള്ള പാതയ്ക്ക് സമാന്തരമായാണ് പുതിയ പാത നിര്മിക്കുക. തിരൂര് മുതല് തിരുവനന്തപുരം വരെ നിലവിലുള്ള പാതയില് നിന്നു അകന്നും ജനവാസം കുറഞ്ഞ മേഖലകളില് കൂടിയാണ് ഈ ഭാഗത്ത് പാത നിര്മിക്കുക.
കൊല്ലം, ചെങ്ങന്നൂര്, കോട്ടയം, എറണാകുളം, തൃശൂര്, തിരൂര്, കോഴിക്കോട്, കണ്ണൂര് എന്നിവ ഉള്പ്പെടെ 10 സ്റ്റേഷനുകളാണ് 11 ജില്ലകളിലൂടെ കടന്നുപോകുന്ന സില്വര് ലൈന് റെയിലിനുള്ള സ്റ്റേഷനുകള് .തിരുവനന്തപുരം, നെടുമ്പാശേരി വിമാനത്താവളങ്ങള് പാതയുടെ പരിധിയില് വരും.
തൃശൂര് റെയില്വേ സ്റ്റേഷനു സമീപത്തായാണ് സില്വര് ലൈന് റെയില്വേ സ്റ്റേഷന് വിഭാവനം ചെയ്തിരിക്കുന്നത്. സാധാരണ ട്രെയിനുകളില് നിന്നു വേഗ ട്രെയിനിലേക്ക് എളുപ്പത്തില് മാറി കയറാനാകും. വേഗ റെയില് പാത കൊച്ചുവേളി കഴിഞ്ഞാല് നിലവിലുള്ള റെയില് പാതയ്ക്കു സമീപമെത്തുക തൃശൂരിലാകും.
വിശദമായ സാധ്യതാ പഠനത്തിനും ഗതാഗത പഠനത്തിനും ശേഷം ലാഭകരമായി നടപ്പാക്കാമെന്നു കണ്ടെത്തിയ രാജ്യത്തെ ഇത്തരത്തിലുള്ള ആദ്യ പദ്ധതിയാണിത്. റെയില്വേ ബോര്ഡിന്റെ പൂര്ണ അംഗീകാരം ലഭിച്ചു കഴിഞ്ഞാല് 5 വര്ഷത്തിനകം പദ്ധതി നടപ്പാക്കാന് കഴിയുമെന്നാണ് സര്ക്കാര് വിലയിരുത്തുന്നത്.
കേരള റെയില് ഡവലപ്മെന്റ് കോര്പറേഷനാണ് നിര്മാണച്ചുമതല. ഭൂമി ഏറ്റെടുക്കുന്നതടക്കം 66,405 കോടി രൂപയാണ് ചെലവ്. കേരളത്തിന്റെ തെക്കു നിന്നു വടക്കു വരെ നീളുന്ന പാതയായതിനാല് 1200 ഹെക്ടര് ഭൂമി ഏറ്റെടുക്കേണ്ടിവരും. നിലവിലുള്ള റെയില്പാതയ്ക്കു സമീപം മിക്ക സ്ഥലത്തും റെയില്വേയ്ക്ക് സ്വന്തമായി സ്ഥലമുള്ളതിനാല് ഭൂമിയേറ്റെടുക്കല് പ്രതിസന്ധിയാകില്ലെന്നാണ് വിലയിരുത്തല്.
കാസര്കോടു മുതല് തിരുവനന്തപുരം വരെ നിലവിലുള്ള റെയില്പാതയില് ഗതാഗതം ഇപ്പോള് തന്നെ 100 ശതമാനമാണ്. കൂടുതല് ട്രെയിനുകള് ഓടിക്കാനോ നിലവിലുള്ള ട്രെയിനുകളുടെ വേഗം കൂട്ടാനോ കഴിയാത്ത സ്ഥിതി. റോഡ് ഗതാഗതം ദിനംപ്രതി ദുഷ്കരമായി മാറിയിരിക്കുന്ന സാഹചര്യം കണക്കിലെടുത്താണ് അതിവേഗ റെയില് ഇടനാഴി നിര്മിക്കാന് സര്ക്കാര് തീരുമാനിച്ചത്.
പാതയില് ഉടനീളവും സ്റ്റേഷനുകളിലും വൈദ്യുതി ഉല്പാദിപ്പിക്കാന് സോളര് പാനലുകള് സജ്ജീകരിക്കും. തുടക്കത്തില് പ്രതിദിനം അറുപതിനായിരത്തിലേറെ യാത്രക്കാരുണ്ടാവുമെന്നു കണക്കാക്കുന്നു. തിരക്കുള്ള സമയത്ത് ഒരു ദിശയില് മാത്രം 1300 യാത്രക്കാരെയാണു റെയില് ബോര്ഡ് പ്രതീക്ഷിക്കുന്നത്. ആധുനിക സിഗ്നല് സംവിധാനത്തോടൊപ്പം ടിക്കറ്റിങ്, യാത്രാസൗകര്യം എന്നിവ സില്വര് ലൈനിന്റെ പ്രത്യേകതകളാകും.
https://www.facebook.com/Malayalivartha
