കേന്ദ്രസര്ക്കാര് പാസ്സാക്കിയ പൗരത്വ ഭേദഗതി നിയമത്തിനെതിരെ സി.പി.എമ്മും കോണ്ഗ്രസും പ്രതിഷേധം ആളിപ്പടര്ത്തുമ്പോള് കേരളത്തിലെ ബി.ജെ.പി നേതാക്കളെ കാണാനില്ലെന്ന് ആക്ഷേപം
കേന്ദ്രസര്ക്കാര് പാസ്സാക്കിയ പൗരത്വ ഭേദഗതി നിയമത്തിനെതിരെ സി.പി.എമ്മും കോണ്ഗ്രസും പ്രതിഷേധം ആളിപ്പടര്ത്തുമ്പോള് കേരളത്തിലെ ബി.ജെ.പി നേതാക്കളെ കാണാനില്ലെന്ന് ആക്ഷേപം. ചാനല് ചര്ച്ചകളിലും സോഷ്യല്മീഡിയയിലും കൂടി വീരവാദം മുഴക്കുന്നതല്ലാതെ നിയമത്തിന്റെ പ്രാധാന്യം മനസ്സിലാക്കി കേന്ദ്രസര്ക്കാരിനെ പിന്തുണയ്ക്കാന് പ്രതിഷേധങ്ങളോ, പ്രചരണങ്ങളോ ഒന്നും നടത്താന് നേതാക്കള് തയ്യാറാകുന്നില്ല. അതില് ദേശീയനേതൃത്വത്തിന് കടുത്ത അതൃപ്തിയുണ്ടെന്നാണ് ലഭ്യമാകുന്ന വിവരം. സംസ്ഥാന പ്രസിഡന്റായിരുന്ന പി.എസ് ശ്രീധരന്പിള്ള നവംബറില് മിസോറാം ഗവര്ണറായതോടെ നാഥനില്ലാകളരിയാണ് ബി.ജെ.പി കേരള ഘടകം. ജനുവരി പകുതിയോടെ മാത്രമേ പുതിയ പ്രസിഡന്റിനെ നിയമിക്കൂ എന്നാണ് നേതാക്കള് നല്കുന്ന വിവരം.
ശബരിമല സമരത്തിലൂടെ വിശ്വാസികള്ക്കിടയില് ബി.ജെ.പിക്ക് ലഭിച്ച സ്വീകാര്യത നിലനിര്ത്തി മുന്നോട്ട് പോകേണ്ടതിന് പകരം അധ്യക്ഷസ്ഥാനത്തിനായുള്ള വടംവലിയിലാണ് പ്രമുഖനേതാക്കളെന്ന ആക്ഷേപം അണികള്ക്കും പ്രവര്ത്തകര്ക്കും ഇടയില് ശക്തമാണ്. അതുകൊണ്ടാണ് സംസ്ഥാന കമ്മിറ്റിയുടെ നേതൃത്വത്തില് ബില്ലിന് അനുകൂലമായ പരിപാടികള് സംഘടിപ്പിക്കാന് നേതാക്കളാരും മുതിരാത്തതെന്നും ആക്ഷേപമുണ്ട്. വരാന് പോകുന്ന തദ്ദേശ തെരഞ്ഞെടുപ്പിലും അത് കഴിഞ്ഞുള്ള നിയമസഭാ തെരഞ്ഞെടുപ്പിലും പാര്ട്ടിയെ ശക്തമാക്കണം. അതിന് കേന്ദ്രസര്ക്കാരിനെതിരെ ഇടത് വലത് മുന്നണികള് നടത്തുന്ന പ്രതിഷേധങ്ങളെ പ്രതിരോധിക്കാനാകണം. അത്തരത്തിലുള്ള കൂടിയാലോചനകള് നേതാക്കളുടെ ഭാഗത്ത് നിന്ന് ഉണ്ടാകുന്നില്ല. ഇതിന് വലിയ വില കൊടുക്കേണ്ടിവരുമെന്ന് പ്രമുഖ നേതാവ് ചൂണ്ടിക്കാട്ടുന്നു.
കോണ്ഗ്രസും സി.പി.എമ്മും സര്ക്കാരും ചേര്ന്ന് പൗരത്വഭേദഗതി നിയമത്തിനെതിരെ സംയുക്തമായി സമരം നടത്തി ജനശ്രദ്ധ ആകര്ഷിച്ചപ്പോള് ബി.ജെ.പിയുടെയും എന്.എന്.എയുടെയും നിലപാട് മാധ്യമപ്രതികരണങ്ങളില് മാത്രം ഒതുങ്ങി. നേതാക്കള് തമ്മിലുള്ള അഭിപ്രായഭിന്നതയാണ് ബില്ലിന് അനുകൂലിച്ചും കേന്ദ്രസര്ക്കാരിനെ പ്രതിരോധിച്ചും പരിപാടികള് സംഘടിപ്പിക്കാത്തതിന് കാരണം എന്നാണ് ആക്ഷേപം. എല്.ഡി.എഫ് തദ്ദേശ തെരഞ്ഞെടുപ്പിനുള്ള ഒരുക്കങ്ങള് ആരംഭിച്ചുകഴിഞ്ഞു. യു.ഡി.എഫിന് അത്തരമൊരു സംവിധാനം ഇല്ലെങ്കിലും കേന്ദ്ര-സംസ്ഥാന സര്ക്കാരുകള്ക്കെതിരായ പ്രതിഷേധപരിപാടികളിലൂടെ അവര് സജ്ജീവമാണ്. ബി.ജെ.പിയോ അവര് നേതൃത്വം നല്കുന്ന എന്.ഡി.എ മുന്നണിയോ ചിത്രത്തിലേയില്ല.
പൗരത്വ നിയമഭേദഗതി നടപ്പാക്കില്ലെന്ന് സംസ്ഥാന സര്ക്കാര് പ്രഖ്യാപിച്ചതിന് പിന്നാലെ ദേശീയ ജനസംഖ്യാ രജിസ്റ്റര് നടപ്പാക്കുന്നതിനുള്ള നടപടികളും ഇന്നലെ രാത്രി നിര്ത്തലാക്കി. കേന്ദ്രസര്ക്കാരിന്റെ നിര്ദ്ദേശപ്രകാരം ജനങ്ങളില് നിന്ന് വിവരങ്ങള് ശേഖരിക്കുന്നതിന് പൊതുഭരണവകുപ്പ് നവംബറില് ഉത്തരവിട്ടിരുന്നു. എന്നാല് ഇന്നലെ രാത്രി ആ ഉത്തരവ് മരവിപ്പിച്ചു. അതിനെതിരെ പ്രതിഷേധം സംഘടിപ്പിക്കാന് സംസ്ഥാനത്തെ ബി.ജെ.പി നേതാക്കള്ക്ക് കഴിഞ്ഞിട്ടില്ല. പ്രധാനമന്ത്രി നരേന്ദ്രമോദിയേയും ആഭ്യന്തരമന്ത്രി അമിത്ഷായേയും വ്യക്തിപരമായി അധിഷേധിപ്പ് പലയിടങ്ങളിലും എല്.ഡി.എഫും യു.ഡി.എഫും അവരുടെ വിദ്യാര്ത്ഥി സംഘടനകളും പ്രക്ഷോഭം നടത്തിയിട്ട് അതിനെതിരെ പ്രതിഷേധം സംഘടിപ്പിക്കാന് പോലും കഴിഞ്ഞിട്ടില്ല. പുതിയ പ്രസിഡന്റ് വരുമ്പോഴേക്കും പ്രതിഷേധങ്ങള് തണുക്കും, ആറിയ കഞ്ഞി പഴങ്ങഞ്ഞിയാകും...
https://www.facebook.com/Malayalivartha
