ഒരു രോഗിയ്ക്ക് 7 മണിക്കൂറിനിടയില് 3 ശസ്ത്രക്രിയ നടത്തി തിരുവനന്തപുരം മെഡിക്കല് കോളജ് ചരിത്രം രചിച്ചു!
49-കാരിയായ വീട്ടമ്മ ശ്വാസം മുട്ടലും വയറിനു പെരുക്കവുമായാണ് തിരുവനന്തപുരം മെഡിക്കല് കോളജ് കാര്ഡിയോളജി വിഭാഗം പ്രഫസര് ഡോ: ജോര്ജ് കോശിയെ സമീപിച്ചത്. പരിശോധനയില് ആദ്യം ഹൃദയ വാല്വിന് ചുരുക്കമുണ്ടെന്ന് കണ്ടെത്തി. തുടര് പരിശോധനയില് ഇടത്തേ ഹൃദയ അറയില് ഒരു മുഴ കണ്ടെത്തി. ഈ മുഴ ഇടത്തേ അറയില് നിന്നും വാല്വ് തുളച്ച് മറ്റൊരു അറയിലേയ്ക്ക് വ്യാപിച്ച നിലയിലായിരുന്നു.
കാര്ഡിയോ തൊറാസിക് വിഭാഗം പ്രഫസര് ഡോ: വി. സുരേഷ് കുമാറിന്റെ നേതൃത്യത്തില് ശസ്ത്രക്രിയയ്ക്ക് തയ്യാറെടുക്കുമ്പോഴാണ് രോഗിയുടെ തൈറോയ്ഡ് ഗ്രന്ഥിയില് ഒരു വലിയ കാന്സര്മുഴ വളരുന്നതായും അത് കഴുത്തിലെ കഴലകളിലേയ്ക്ക് വ്യാപിക്കുകയും ചെയ്തതായി കണ്ടെത്തിയത്. ഗര്ഭപാത്രത്തിനുള്ളിലും സാമാന്യം വലിപ്പമുള്ള മറ്റൊരു മുഴ കൂടി കണ്ടെത്തി.
ഹൃദയ അറയ്ക്കുള്ളിലെ മുഴയും തൈറോയ്ഡ് ഗ്രന്ഥിയും കഴുത്തിലെ കഴലകളും ഗര്ഭപാത്രവും നീക്കം ചെയ്യുക എന്നീ മൂന്നു ശസ്ത്രക്രിയകളും ഒരേസമയം നടത്താന് കാര്ഡിയോ തൊറാസിക് വിഭാഗം, സര്ജറി, ഗൈനക്കോളജി, അനസ്തേഷ്യ വിഭാഗം ഡോക്ടര്മാര് കൂടിയാലോചിച്ച് തീരുമാനമെടുത്തു. കഴിഞ്ഞ 25-ന് ഒരേ ടേബിളില് മൂന്നു ചികിത്സാ വിഭാഗങ്ങള് കൈ കോര്ത്ത് ശസ്ത്രക്രിയ നടത്തി.
ജനറല് സര്ജറി വിഭാഗം അസോസിയേറ്റ് പ്രഫസര് ഡോ: വിനീതും സംഘവും കഴുത്തിലെ ശസ്ത്രക്രിയ തുടങ്ങിയ അതേ സമയം ഗൈനക്കോളജി വിഭാഗത്തിലെ അസിസ്റ്റന്റ് പ്രഫസര് ഡോ: ജെ. സിമിയുടെ നേതൃത്വത്തിലുള്ള സംഘം ഗര്ഭപാത്രം നീക്കം ചെയ്യാനുള്ള ശസ്ത്രക്രിയയും ആരംഭിച്ചു.
ഈ ശസ്ത്രക്രിയകള് പൂര്ത്തിയായ ശേഷമാണ് പ്രഫ: വി. സുരേഷ്കുമാറും ഡോ: കൃഷ്ണയും സീനിയര് റസിഡന്റുമാരായ ഡോ: വിപിന്, ഡോ: മഹേഷ് എന്നിവരടങ്ങുന്ന സംഘം ഹൃദയഅറയ്ക്കുള്ളിലെ മുഴ നീക്കം ചെയ്തത്. ഗര്ഭപാത്രത്തിലെ മുഴയ്ക്ക് 20 സെന്റീ മീറ്ററും ഹൃദയ അറയിലെ മുഴയ്ക്ക് ഏഴു സെന്റീമീറ്ററും വലിപ്പമുണ്ടായിരുന്നു. അനസ്തേഷ്യ വിഭാഗത്തിലെ ഡോ: തുഷാര, ഡോ: ശീതള്, പെര്ഫ്യൂഷനിസ്റ്റ് രേവതി, തീയേറ്റര് നഴ്സുമാരായ ഷൈനി, സൂര്യ, രൂപ എന്നിവരും ഡോക്ടര്മാര്ക്കൊപ്പം നിര്ണായക പങ്കുവഹിച്ചു.
ആരോഗ്യ ഇന്ഷുറന്സ് പദ്ധതിയിലുള്പ്പെടുത്തി നടത്തിയ ശസ്ത്രക്രിയക്ക് ശേഷം ആശുപത്രി വിട്ട രോഗി സുഖം പ്രാപിച്ചു വരുന്നതായി ആശുപത്രി അധികൃതര് അറിയിച്ചു.
https://www.facebook.com/Malayalivartha