കെ.എസ്.ആര്‍.ടി.സിക്ക് നഷ്ടമായത് രണ്ട് നന്മ മരങ്ങളെയാണ്. 2018ല്‍ ബംഗലൂരുവിലേക്ക് യാത്ര ചെയ്യവെ അപസ്മാരം ഉണ്ടായ തനിക്ക് നേരെ കരുണയുടെ കരം നീട്ടിയത് ഗിരീഷും ബൈജുവും ആയിരുന്നെന്ന് ഡോ. കവിത ഓര്‍ത്തെടുക്കുന്നു. ജീവിതം കൈവിട്ട് പോകും എന്ന് കരുതിയിടത്ത് നിന്ന് ഡോക്ടര്‍ കവിതയെ തിരികെ കൊണ്ടു വന്നവരായിരുന്നു തമിഴ്‌നാട്ടിലെ അപകടത്തില്‍പെട്ട് മരണമടഞ്ഞ കെഎസ്ആര്‍ടിസി ഡ്രൈവര്‍മാരായ ബൈജുവും ഗിരീഷും. ഇരുവരുടെയും വേര്‍പാട് ഉള്‍ക്കൊള്ളാനാവാത്ത അവസ്ഥയിലാണ് ഡോ.കവിത.

2018 ജൂണ്‍ മൂന്നിനാണ് തൃശൂരില്‍ നിന്നും ബംഗലൂരുവിലേക്ക് യാത്ര ചെയ്യുകയായിരുന്ന കവിതക്ക് അപസ്മാരം ഉണ്ടാകുന്നത്. സമയം രാത്രി 12.30 ആയതോടെ കവിതയ്ക്ക് ദേഹാസ്വാസ്ഥ്യം നേരിട്ടു. കവിതയുടെ അവസ്ഥയറിഞ്ഞതോടെ, യാത്രക്കാരെ കൃത്യസ്ഥാനത്ത് എത്തിക്കേണ്ട ചുമതല ഗിരീഷിനെ ഏല്‍പ്പിച്ച് ബൈജു കവിതയേയും കൊണ്ട് ഹൊസൂരിലുള്ള ആശുപത്രിയിലേക്ക് കുതിച്ചു. ബൈജുവിന്റെയും ഗിരീഷിന്റെയും അവസരോചിതമായ ഇടപെടലാണ് അന്ന് കവിതയെ രക്ഷിച്ചത്. അച്ഛനെ പോലെ കരുതല്‍ തന്ന് തന്നെ ശുശ്രൂഷിച്ച ബൈജുവിന്റെയും ഗിരീഷിന്റെയും വിയോഗം കവിതയ്ക്ക് ഉള്‍ക്കൊള്ളാനാകുന്നതിനും അപ്പുറമാണ്. തനിക്കൊരു പുതുജീവന്‍ നല്‍കിയ ഗിരീഷിനും ബൈജുവിനും ഒരിക്കല്‍ കൂടി നന്ദി പറയുകയാണ്, ആ രണ്ടുപേരുടെയും വിയോഗ വാര്‍ത്തയില്‍ അഗാധമായി ദുഖിക്കുമ്‌ബോഴും ഡോ. കവിത.
തിങ്കളാഴ്ച വൈകിട്ടാണ് ബൈജുവും ഗിരീഷും സുഹൃത്തുക്കളോട് യാത്ര പറഞ്ഞു ബംഗളൂരുവിലേക്ക് പുറപ്പെട്ടത്. ഇന്ന് രാവിലെ തിരിച്ചെത്തുമെന്ന് പ്രതീക്ഷിച്ചിരുന്നവര്‍ക്കിടയിലേക്കാണ് ഇരുവരുടെയും മരണ വാര്‍ത്ത എത്തിയത്.