ജനസഹസ്രങ്ങള്‍ ആലുവ മണപ്പുറത്ത് ശിവരാത്രി ദിനത്തില്‍ ബലിതര്‍പ്പണം നടത്തി
ശിവപഞ്ചാക്ഷരീ മന്ത്രം ഏറ്റുചൊല്ലിയ വിശ്വാസികള്‍ മണപ്പുറത്തെ ഭക്തിസാന്ദ്രമാക്കി. രാവേറെ കാത്തിരുന്ന ജനസഹസ്രം ശനിയാഴ്ച പുലര്‍ച്ചെ മുതല്‍ ബലിതര്‍പ്പണം നടത്തി. പുലര്‍ച്ചെ മുതല്‍ വലിയ ഭക്തജനത്തിരക്കാണ് ആലുവ ശിവരാത്രി മണപ്പുറത്ത് അനുഭവപ്പെട്ടത്.എള്ളും പൂവും ഉണക്കലരിയും ഉള്‍പ്പെടെയുള്ള പൂജാദ്രവ്യങ്ങള്‍ നറുക്കിലയില്‍ പിതൃക്കള്‍ക്ക് നേദിച്ച് പ്രണാമമര്‍പ്പിച്ച് വിശ്വാസികള്‍ പെരിയാറിലിറങ്ങി മുങ്ങിനിവര്‍ന്നു.
തുടര്‍ന്ന് ശിവക്ഷേത്രത്തില്‍ ദര്‍ശനം നടത്തിയാണ് ഭക്തജനങ്ങള്‍ മടങ്ങുന്നത്. 150ല്‍ ഏറെ ബലിത്തറകളാണ് ദേവസ്വം ബോര്‍ഡ് ഒരുക്കിയിരിക്കുന്നത്. ശിവരാത്രിയോടനുബന്ധിച്ചുള്ള ബലിതര്‍പണം 11 മണിയോടെ അവസാനിക്കും. തുടര്‍ന്ന് വാവിന്റെ ഭാഗമായുള്ള ബലിതര്‍പണ ചടങ്ങുകള്‍ ഉച്ചയ്ക്കു ശേഷം മൂന്നു മണിയോടെ ആരംഭിക്കും.
ഇത് ഞായറാഴ്ച പുലര്‍ച്ചെ രണ്ടുമണിവരെ നീണ്ടുനില്‍ക്കും.ശിവരാത്രി മണപ്പുറത്ത് ഭിന്നശേഷിക്കാര്‍ക്കും വയോധികര്‍ക്കും പ്രത്യേക സൗകര്യമൊരുക്കിയിട്ടുണ്ട്. ആദ്യത്തെ ബലിത്തറയായ 'എ വണ്‍' ആണ് ഇരുവിഭാഗത്തിലുമുള്ളവര്‍ക്ക് പ്രത്യേകം മാറ്റി വെച്ചിട്ടുള്ളത്.
"
https://www.facebook.com/Malayalivartha
