വെസ്റ്റ് ബംഗാള്‍ മാള്‍ഡ ജില്ല സ്വദേശി ഗൗതം മണ്ഡലിനെ തിരുവനന്തപുരത്തിനടുത്ത് വിഴിഞ്ഞം മുക്കോല ജംക്ഷനില്‍ വച്ച് മര്‍ദ്ദിച്ച  സംഭവത്തില്‍ ഓട്ടോ ഡ്രൈവര്‍ ഉച്ചക്കട തൈവിളാകം ക്ഷേത്ര സമീപം ശിവശൈലത്തില്‍ സുരേഷി(47)നെ അറസ്റ്റ് ചെയ്തു.

ഇക്കഴിഞ്ഞ ശനിയാഴ്ച രാത്രി ഓട്ടോ പിന്നിലേക്കെടുക്കുമ്പോള്‍ ശരീരത്തില്‍ തട്ടിയത് ഗൗതം ചോദ്യം ചെയ്തതിനെ തുടര്‍ന്നായിരുന്നു മര്‍ദനമേറ്റത്.

പ്രതി, ആധാര്‍ രേഖ കാണിക്കണമെന്നാവശ്യപ്പെട്ടു കൊണ്ട് രണ്ടു തവണ ചെകിടത്ത് അടിക്കുന്ന വിഡിയോ ദൃശ്യം സാമൂഹിക മാധ്യമങ്ങളില്‍ പ്രചരിച്ചിരുന്നു. നാട്ടുകാര്‍ നോക്കിനില്‍ക്കെ, അസഭ്യവര്‍ഷത്തോടെയായിരുന്നു മര്‍ദനം. ഗൗതം പഴ്‌സില്‍ നിന്ന് ആധാര്‍ കാര്‍ഡ് എടുക്കുന്നതിനിടെ 'നീ ജാര്‍ഖണ്ഡോ ഒഡീഷയോ ബംഗാളിയോ ' എന്നു ചോദിച്ചു വീണ്ടും മര്‍ദിച്ചു. ഇതെല്ലാം ഫോണില്‍ പകര്‍ത്തണമെന്നും പ്രതി ആവശ്യപ്പെടുന്നുണ്ട്. തിരിച്ചറിയല്‍ രേഖ പൊലീസ് സ്റ്റേഷനിലെത്തി വാങ്ങണമെന്നുകൂടി പറഞ്ഞിട്ടാണു പ്രതി പോകുന്നത്. സംഭവം കണ്ടിട്ടും നാട്ടുകാര്‍ ആരും പ്രതികരിക്കാത്തതു ശ്രദ്ധേയമാണ്.

വിവിധ ഓണ്‍ലൈന്‍ മാധ്യമങ്ങളും സാമൂഹിക മാധ്യങ്ങളും വാര്‍ത്ത ഏറ്റെടുത്തതോടെയാണ് ഇന്നലെ വിഴിഞ്ഞം പൊലീസ് പ്രതിയെ അറസ്റ്റ് ചെയ്തത്. വധശ്രമത്തിനു കേസെടുത്ത പ്രതിയെ കോടതി റിമാന്‍ഡ് ചെയ്തു. നേരത്തെ മൊബൈല്‍ കട ഉടമയെ മര്‍ദിച്ച സംഭവമുള്‍പ്പെടെ വിവിധ കേസുകളില്‍ പ്രതിയാണു സുരേഷെന്ന് പൊലീസ് അറിയിച്ചു.