ആരാധനാലയങ്ങള്‍ക്ക് പൊലീസ് മാര്‍ഗനിര്‍ദേശം, ചടങ്ങുകള്‍ വെബ്കാസ്റ്റ് ചെയ്യണം
ആരാധനാലയങ്ങള്‍, ലോക്ഡൗണ് സമയത്ത് പാലിക്കേണ്ട മാര്‍ഗനിര്‍ദേശങ്ങളുമായി പൊലീസ്. മതചടങ്ങുകളില്‍ അഞ്ചുപേരില്‍ കൂടുതല്‍ പങ്കെടുക്കരുത്. വിശ്വാസികള്‍ക്കായി ചടങ്ങുകള്‍ വെബ്കാസ്റ്റ് ചെയ്യാന്‍ ശ്രമിക്കണം. ആളുകള്‍ കൂട്ടമായി എത്താതിരിക്കാന്‍ ക്രമീകരണം വേണമെന്നും പുതുതായി പുറപ്പെടുവിച്ച മാര്‍ഗനിര്‍ദേശത്തില്‍ പറയുന്നു.
സംസ്ഥാനത്തൊട്ടാകെ ശനിയാഴ്ച 2047 പേര്‍ക്കെതിരെയാണ് നിരോധനം ലംഘിച്ചു യാത്ര ചെയ്തതിന് കേസെടുത്തത്. 1962 പേര്‍ അറസ്റ്റിലായി. 1481 വാഹനങ്ങളും പിടിച്ചെടുത്തു. കോവിഡ് 19-ന്റെ പശ്ചാത്തലത്തില്‍ വ്യാജവാര്‍ത്തകള്‍ നിര്‍മിക്കുകയും സമൂഹമാധ്യമങ്ങളിലൂടെ പ്രചരിപ്പിക്കുകയും ചെയ്യുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് സംസ്ഥാന പൊലീസ് മേധാവി ലോക്‌നാഥ് ബെഹ്‌റ അറിയിച്ചു.
ഇത്തരം കുറ്റകൃത്യങ്ങളില്‍പെട്ട് രണ്ടോ അതിലധികമോ തവണ പിടിക്കപ്പെടുന്നവരുടെ ചിത്രം മാധ്യമങ്ങളിലൂടെ പ്രസിദ്ധീകരിക്കും. ഇത്തരക്കാര്‍ക്കെതിരെ ക്രിമിനല്‍ കേസ് റജിസ്റ്റര്‍ ചെയ്യും. സമൂഹമാധ്യമങ്ങളില്‍ ഇത്തരം വാര്‍ത്തകള്‍ തയാറാക്കി പ്രചരിപ്പിക്കുന്നവരെ കണ്ടെത്താന്‍ ഹൈടെക് ക്രൈം എന്‍ക്വയറി സെല്‍, സൈബര്‍ ഡോം, സൈബര്‍ ക്രൈം പൊലീസ് സ്റ്റേഷന്‍ എന്നിവയ്ക്ക് നിര്‍ദേശം നല്‍കിയതായും ഡിജിപി പറഞ്ഞു.
https://www.facebook.com/Malayalivartha
