നവരാത്രി ആഘോഷങ്ങൾ ഞായറാഴ്ച തുടക്കമായി. ഭക്തിയുടെ നിറക്കാഴ്ചയായി ഹൈന്ദവഭവനങ്ങളിൽ ബൊമ്മക്കൊലുകൾ അലങ്കരിച്ചുവെച്ചു തുടങ്ങി. നവരാത്രി ആഘോഷങ്ങളിൽ പ്രധാനപ്പെട്ട ഒന്നാണ് ബൊമ്മക്കൊലു. ദുർഗാദേവിയുടെ ഒൻപത് ഭാവങ്ങളെ പ്രതിനിധാനം ചെയ്താണ് ഒൻപത് പടികളിൽ ദേവീദേവൻമാരുടെ രൂപങ്ങൾ വെയ്ക്കുന്നത്. മൂന്ന്, അഞ്ച്, ഏഴ്, ഒൻപത് എന്നീ ഒറ്റ സംഖ്യകളിലാണ് പരമ്പരാഗതമായി പടികൾ ഒരുക്കുന്നത്.

സരസ്വതീദേവി, അഷ്ടലക്ഷ്മി, ദശാവതാരങ്ങൾ, ശ്രീരാമപട്ടാഭിഷേകം, ഗണപതി, സുബ്രഹ്മണ്യൻ ശിവ-പാർവതി, ശ്രീകൃഷ്ണനും രാധയും കൂടാതെ മനുഷ്യന്റെ നിത്യജീവിതവുമായി ബന്ധപ്പെട്ട- കർഷകൻ, കച്ചവടക്കാരൻ, പാർക്ക്, ഗ്രാമീണ ജീവിതം എന്നിവയെ സൂചിപ്പിക്കുന്ന ചെറു രൂപങ്ങളും ഉണ്ടാകും. ഓരോ പടികളിലും വ്യത്യസ്ത നിറങ്ങളിലുള്ള തുണികൾ വിരിച്ച്, പൂക്കളും ദീപങ്ങളും കൊണ്ട് അലങ്കരിച്ചാണ് കൊലു ഒരുക്കിയിട്ടുളളത്.

ദേവിയുടെ മുഖം ചാർത്തി, ആടയാഭരണങ്ങൾ അണിയിച്ചുള്ള പ്രധാന രൂപം തന്നെയാണ് ഏറ്റവും ആകർഷകം. ഹിന്ദുവിശ്വാസത്തിൽ ദേവീആരാധനയ്ക്ക് പ്രത്യേക പ്രാധാന്യമുള്ള പുണ്യകാലമാണ് നവരാത്രി. ഒൻപത് രാത്രികളും പത്ത് ദിവസങ്ങളും നീണ്ടുനിൽക്കുന്ന ഈ ആഘോഷം പരാശക്തിയുടെ വിവിധ ഭാവങ്ങളെ ആരാധിക്കുന്നതിനാണ് സമർപ്പിച്ചിരിക്കുന്നത്.

ഇത്തവണ ഒക്ടോബർ 11 മുതൽ ഒക്ടോബർ 21 വരെയാണ് വിശ്വാസികൾ നവരാത്രി ആഘോഷിക്കുന്നത്. ഒക്ടോബർ 20 ചൊവ്വാഴ്ചയാണ് മഹാനവമി/ ആയുധപൂജ. ഒക്ടോബർ 21ന് നടക്കുന്ന വിജയദശമി/ വിദ്യാരംഭം/ പൂജയെടുപ്പ് ചടങ്ങുകളോടെയാണ് ദിവസങ്ങൾ നീണ്ട നവരാത്രി ഉത്സവത്തിന് സമാപനം .