കർണാടക സംഗീത ലോകത്ത് മൃദംഗ വാദനത്തിലെ സവിശേഷ സാന്നിധ്യമായിരുന്ന ഗുരുവായൂർ സ്വദേശിയായ പ്രസിദ്ധ മൃദംഗ വിദ്വാൻ പത്മശ്രീ ഗുരുവായൂർ ദൊരൈ (91) അന്തരിച്ചു. ചെന്നൈയിലായിരുന്നു അദ്ദേഹത്തിന്റെ അന്ത്യം.

എട്ടാം വയസിൽ ചെമ്പൈ വൈദ്യനാഥ ഭാഗവതരുടെ കച്ചേരിക്ക് പക്കമേളം വായിച്ചാണ് മൃദംഗവാദനത്തിൽ അദ്ദേഹം അരങ്ങേറ്റം കുറിച്ചത്. തുടർന്ന് 8 പതിറ്റാണ്ടിലേറെക്കാലം സംഗീത രംഗത്ത് സജീവ സാന്നിധ്യമായിരുന്നു. പുതുക്കോട്ടൈ ശൈലിയിൽ അഗ്രഗണ്യനായിരുന്നു അദ്ദേഹം.

ജിഎസ് കൃഷ്ണ അയ്യരുടെയും മീനാക്ഷിയുടെയും മകനായി 1935 ജൂലായ് രണ്ടിന് ഗുരുവായൂരിലായിരുന്നു ജനനം. അഞ്ചാം വയസിൽ പോളിയോ ബാധിതനായതിനെ തുടർന്ന് പഠിത്തം തടസപ്പെട്ടിരുന്നു. തുടർന്ന് അച്ഛനാണ് മൃദംഗ പഠനത്തിലേക്ക് വഴിതിരിച്ചുവിട്ടത്. പാലക്കാട്ട് സുബ്ബയ്യർ, ഇപി നാരായണ പിഷാരടി എന്നിവരുടെ കീഴിലായിരുന്നു ആദ്യകാല പഠനം. നടന്നത്. 1949 ൽ പ്രശസ്ത മൃദംഗ വിദ്വാൻ പളനി സുബ്രഹ്‌മണ്യം പിള്ളയുമായുള്ള കൂടിക്കാഴ്ച അദ്ദേഹത്തിന്റെ ജീവിതത്തിലെ വഴിത്തിരിവായിമാറി. തുടർന്ന് ചെന്നൈയിലേക്ക് താമസം മാറ്റിയ ദൊരൈ, പളനി സുബ്രഹ്‌മണ്യം പിള്ളയുടെ വസതിയിൽ 9 വർഷത്തോളം ഗുരുകുല സമ്പ്രദായത്തിൽ താമസിച്ച് മൃദംഗം അഭ്യസിക്കുകയായിരുന്നു.