ബാങ്ക് അക്കൗണ്ടിലെ പണം പോസ്റ്റ്മാന്‍ വീട്ടിലെത്തിക്കും, ബാങ്കുകളുടെ സമയം പുനഃക്രമീകരിച്ചു
ക്ഷേമപെന്‍ഷന്‍, ജന്‍ധന്‍ അക്കൗണ്ട് വഴിയുള്ള കേന്ദ്ര സര്‍ക്കാരിന്റെ പണ വിതരണം എന്നിവ പരിഗണിച്ച് ഈയാഴ്ച വൈകിട്ട് നാലു വരെ പ്രവര്‍ത്തിച്ചിരുന്ന ബാങ്കുകളുടെ പ്രവര്‍ത്തന സമയം വീണ്ടും പുനഃക്രമീകരിച്ചു. തിങ്കളാഴ്ച മുതല്‍ ഉച്ചകഴിഞ്ഞ് രണ്ടുമണി വരെ മാത്രമേ ബാങ്കുകള്‍ പ്രവര്‍ത്തിക്കൂ. ഈ ക്രമീകരണം വ്യാഴാഴ്ച വരെ തുടരും. തിങ്കളാഴ്ച ജന്‍ധന്‍ അക്കൗണ്ട് വഴിയുള്ള പണം വിതരണം ചെയ്യില്ലെന്നും ബാങ്കേഴ്‌സ് സമിതി അറിയിച്ചു.
കോവിഡ് കാലത്ത് ബാങ്കിലെ തിരക്ക് കുറയ്ക്കാനുദ്ദേശിച്ചുകൊണ്ടുള്ള പോസ്റ്റ് മാസ്റ്റര്‍ ജനറലിന്റെ നിര്‍ദേശത്തിന് സര്‍ക്കാര്‍ അനുമതി നല്‍കി. അതിനാല്‍ ബാങ്ക് അക്കൗണ്ടിലെ പണം ഇനി പോസ്റ്റ്മാന്‍ വീട്ടിലെത്തിക്കും. പണം പിന്‍വലിക്കേണ്ടവര്‍ പോസ്റ്റ് ഓഫിസിലാണ് വിവരം നല്‍കേണ്ടത്. അക്കൗണ്ട് ആധാറുമായി ബന്ധിപ്പിച്ചവര്‍ക്കെല്ലാം ഇതുവഴി ബാങ്കിലോ എടിഎമ്മിലോ പോകാതെ പണം പിന്‍വലിക്കാനാകും. ബയോമെട്രിക് സംവിധാനം വഴിയാണ് പദ്ധതി നടപ്പാക്കുന്നത്. സഹകരണ ബാങ്കിലെ പണം ഇത്തരത്തില്‍ പിന്‍വലിക്കാനാവില്ല. സാമൂഹിക അകലം പാലിച്ച് പദ്ധതി നടപ്പാക്കാന്‍ അനുമതി നല്‍കിയെന്ന് സംസ്ഥാന സര്‍ക്കാര്‍ ഇറക്കിയ ഉത്തരവ് വ്യക്തമാക്കുന്നു.
അതേസമയം, ബാങ്കിങ് മേഖലയെ അടച്ചുപൂട്ടലില്‍ നിന്ന് ഒഴിവാക്കിയിട്ടുള്ള സാഹചര്യത്തില്‍ ജീവനക്കാര്‍ക്ക് ബാങ്കില്‍ വരുന്നതിനും പോകുന്നതിനും തടസ്സമുണ്ടാകാതിരിക്കാന്‍ ശ്രദ്ധിക്കണമെന്ന് സംസ്ഥാന പൊലീസ് മേധാവി ലോക്‌നാഥ് ബെഹ്‌റ ജില്ലാ പൊലീസ് മേധാവിമാര്‍ക്കു നിര്‍ദേശം നല്‍കി.
അടച്ചുപൂട്ടല്‍ സംബന്ധിച്ച മാര്‍ഗനിര്‍ദേശങ്ങള്‍ക്കു വിരുദ്ധമായി ചില ബാങ്കുകളില്‍ ധാരാളം ജീവനക്കാരെ നിയോഗിക്കുന്നതായി ശ്രദ്ധയില്‍പ്പെട്ടിട്ടുണ്ട്. ഇക്കാര്യം ബാങ്ക് മാനേജര്‍മാരോടോ മുതിര്‍ന്ന ഓഫിസര്‍മാരോടോ സംസാരിച്ചു ബാങ്ക് പ്രവര്‍ത്തനത്തിന് ആവശ്യമായ മിനിമം ജീവനക്കാരെ മാത്രം നിയോഗിക്കാന്‍ ആവശ്യപ്പെടേണ്ടതാണ്. ഇങ്ങനെ നിയോഗിക്കപ്പെടുന്ന ജീവനക്കാരുടെ പട്ടിക ബാങ്കില്‍ നിന്നു ലഭ്യമാക്കി അവര്‍ക്കു സുരക്ഷിതമായി യാത്ര ചെയ്യാന്‍ അവസരം ഒരുക്കണമെന്നും സംസ്ഥാന പൊലീസ് മേധാവി നിര്‍ദേശിച്ചു.
https://www.facebook.com/Malayalivartha
