കണ്ണൂരില് നിന്നും ആശ്വാസവാര്ത്ത: 7 പേര് രോഗവിമുക്തി നേടി
11 പേരില് പുതുതായി രോഗബാധ സ്ഥിരീകരിച്ച വാര്ത്തയോടൊപ്പം സംസ്ഥാനത്ത് ഇന്നലെ 8 പേര് രോഗമുക്തരായി എന്നതും ആശ്വാസം പകരുന്നു. ഇവരില് 7 പേര് കണ്ണൂര് ജില്ലക്കാരും ഒരാള് തിരുവനന്തപുരം ജില്ലാക്കാരനുമാണ്. പുതുതായി രോഗബാധ സ്ഥിരീകരിച്ചവരില് 5 പേര് ദുബായില് നിന്നെത്തിയവരാണ്. 3 പേര് നിസാമുദ്ദീനില്നിന്നും ഒരാള് നാഗ്പുരില്നിന്നുമെത്തി. 2 പേര്ക്കു കേരളത്തില് വച്ചു സമ്പര്ക്കത്തിലൂടെയായിരുന്നു രോഗബാധ ഉണ്ടായത്.
സംസ്ഥാനത്ത് ഇപ്പോള് നിരീക്ഷണത്തിലുള്ളത് 1,71,355 പേര്; 1,70,621 പേര് വീടുകളിലും 734 പേര് ആശുപത്രികളിലുമാണ്. ഇന്നലെ 174 പേരെ പുതുതായി ആശുപത്രിയില് പ്രവേശിപ്പിച്ചു. രോഗലക്ഷണങ്ങള് ഉള്ള 9744 വ്യക്തികളുടെ സാംപിള് പരിശോധനയ്ക്ക് അയച്ചു. 8586 സാംപിളുകള് നെഗറ്റീവ് ആയി.
കൊല്ലം പാരിപ്പള്ളി മെഡിക്കല് കോളജ് ആശുപത്രിയില് ചികിത്സയിലായിരുന്ന ദുബായില് നിന്നെത്തിയ ആളുടെ (47) പരിശോധനാഫലം നെഗറ്റീവാണ്. നിസാമുദ്ദീനില് നിന്നു മടങ്ങിയെത്തിയ പുനലൂര് വാളക്കോട് സ്വദേശിക്കു കൊല്ലം ജില്ലയില് രോഗം സ്ഥിരീകരിച്ചു. ഇദ്ദേഹത്തിന്റെ ഭാര്യയ്ക്കു കഴിഞ്ഞ ദിവസം രോഗം സ്ഥിരീകരിച്ചിരുന്നു.
കാസര്കോട് ജില്ലയില് രോഗം സ്ഥിരീകരിച്ച ബോവിക്കാനം മാസ്തിക്കുണ്ട് സ്വദേശി നിസാമുദ്ദീനില്നിന്നു മാര്ച്ച് 11-നു വീട്ടിലെത്തിയതാണ്. ആലപ്പുഴ ജില്ലയില് രോഗം സ്ഥിരീകരിച്ച ചെങ്ങന്നൂര് മുളക്കുഴ സ്വദേശിയും നിസാമുദ്ദീനിലെ സമ്മേളനത്തില് പങ്കെടുത്തിരുന്നു. എറണാകുളം ജില്ലയില് ഇന്നലെ രോഗം സ്ഥിരീകരിച്ചത് ഷാര്ജയില്നിന്നു മാര്ച്ച് 22-നു തിരിച്ചെത്തി നിരീക്ഷണത്തില് കഴിയുകയായിരുന്ന 23-കാരനാണ്.
https://www.facebook.com/Malayalivartha