ഒരു മലയാളി സംരംഭകന്‍, കോവിഡ് പടര്‍ന്നു പിടിച്ച ഇറ്റലിയിലെ സാന്‍ റഫെയ്‌ലെ (San Raffaele) ആശുപത്രിയില്‍ രോഗികളുടെ ശ്വാസകോശ എക്‌സ്‌റേ റിപ്പോര്‍ട്ട് പരിശോധിച്ച് കോവിഡ് വ്യാപനം നിമിഷങ്ങള്‍ക്കുള്ളില്‍ മനസിലാക്കുന്ന ഡിജിറ്റല്‍ സംവിധാനം ഒരുക്കി. പട്ടാമ്പി സ്വദേശിയായ പ്രശാന്ത് വാരിയര്‍ ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ വികസിപ്പിച്ച സംവിധാനത്തിന് ക്യുഎക്‌സ്ആര്‍ (qXR) എന്നാണ് പേര്. പ്രശാന്ത് വാരിയരുടെ ക്യൂര്‍ ഡോട്ട് എഐ (Qure.ai) വികസിപ്പിച്ച സംവിധാനം കോവിഡ് പ്രതിരോധത്തിനായി ഇന്ത്യ (മുംബൈ), യുഎസ്, മെക്‌സിക്കോ, യുകെ എന്നിവിടങ്ങളിലായി 35 ആശുപത്രികളില്‍ ഉപയോഗിച്ചുതുടങ്ങി. കേരള സര്‍ക്കാരുമായും ചര്‍ച്ച പുരോഗമിക്കുകയാണ്.

ഒരാളുടെ ശരീരത്തിലെ രോഗവ്യാപനം പരിശോധിക്കുന്നതിനു പുറമേ ലക്ഷണങ്ങളുള്ളവരുടെ ചെസ്റ്റ് എക്‌സ്‌റേ പരിശോധിച്ചാല്‍ രോഗസാധ്യതയുമറിയാം. എക്‌സ്‌റേ, എംആര്‍ഐ, സിടി സ്‌കാന്‍ എന്നിവ മെഷീന്‍ ലേണിങ്ങിലൂടെ മനസിലാക്കുന്ന ക്യൂര്‍ ഡോട്ട് എഐ ക്ഷയം (ടിബി) ഉള്‍പ്പെടെയുള്ളവയുടെ നിര്‍ണയത്തിനായി 15 രാജ്യങ്ങളില്‍ ഉപയോഗിക്കുന്നുണ്ട്.

സാന്‍ റഫെയ്‌ലെ കൂടാതെ വിവിധ രാജ്യങ്ങളിലെ 35 ആശുപത്രികള്‍ അവരുടെ രോഗികളുടെ ചെസ്റ്റ് എക്‌സ്‌റേ സ്‌കാന്‍ റിപ്പോര്‍ട്ടുകള്‍ ദിവസേന ക്യുഎക്‌സ്ആര്‍ ക്ലൗഡ് സംവിധാനത്തില്‍ അപ്‌ലോഡ് ചെയ്യുന്നു. റേഡിയോളജിസ്റ്റിന്റെ സഹായമില്ലാതെ ഇവ മെഷീന്‍ തന്നെ വിലയിരുത്തി ശരീരത്തിനുള്ളില്‍ രോഗവ്യാപനവും തോതും രേഖപ്പെടുത്തും. ധാരാളം രോഗികളെത്തുന്നതിനാല്‍ സോഫ്റ്റ്‌വെയര്‍ സഹായമില്ലാതെ ഈ വിലയിരുത്തല്‍ എളുപ്പമല്ല.

2018-ല്‍ പരീക്ഷണാടിസ്ഥാനത്തില്‍ തിരുവനന്തപുരം ജനറല്‍ ആശുപത്രിയില്‍ സിടി സ്‌കാന്‍ റിപ്പോര്‍ട്ടുകളുടെ പരിശോധന ക്യൂര്‍ ഡോട്ട് എഐയുടെ സഹായത്തോടെ ഓട്ടമേറ്റ് ചെയ്തിരുന്നു.

ഇപ്പോള്‍ ചില ആശുപത്രികള്‍ രോഗസാധ്യതയുള്ള മേഖലകളില്‍ മൊബൈല്‍ എക്‌സ്‌റേ യൂണിറ്റുമായി ചെന്ന് രോഗലക്ഷണമുള്ളവരുടെ റിപ്പോര്‍ട്ട് ഇതിലേക്ക് അപ്‌ലോഡ് ചെയ്യുന്നുണ്ട്. ഇത് വിലയിരുത്തി കോവിഡ് സാധ്യതാ സ്‌കോര്‍ നല്‍കും. പ്രശ്‌നമുള്ളവരെ തുടര്‍പരിശോധനയ്ക്ക് നിര്‍ദേശിക്കും.