മാണിയെകുടുക്കാനിറങ്ങിയ ബിജുരമേശും കുടുങ്ങും, മാണി കോഴവാങ്ങിയെന്ന് തെളിഞ്ഞാല്‍ ആരോപണം ഉന്നയിച്ച ബിജു രമേശും പ്രതിയാകുമെന്ന് ഹൈക്കോടതി
ധനമന്ത്രി കെ.എം.മാണി ബാറുടമകളില്‍ നിന്ന് കോഴവാങ്ങിയെന്ന് തെളിഞ്ഞാല്‍ ആരോപണം ഉന്നയിച്ച ബിജു രമേശും വിജിലന്‍സ് കേസില്‍ പ്രതിയാകുമെന്ന് ഹൈക്കോടതി. ബാര്‍ കോഴക്കേസില്‍ ബിജു രമേശിനെതിരായ ലോകായുക്ത നടപടികള്‍ നിര്‍ത്തിവയ്ക്കാനുള്ള ഹൈക്കോടതിയുടെ ഇടക്കാല ഉത്തരവിലാണ് ഈ നിരീക്ഷണം. കെ.എം.മാണി പ്രതിയായാല്‍ കോഴ നല്‍കിയ ബിജു രമേശും പ്രതി ചേര്‍ക്കപ്പെടുമെന്നാണ് ഇപ്പോള്‍ ബാര്‍ കോഴക്കേസില്‍ ലോകായുക്ത നടപടികള്‍ നിര്‍ത്തിവച്ചുകൊണ്ട് ഹൈക്കോടതിയും വ്യക്തമാക്കിയത്.
അതിനാല്‍ ഭാവിയില്‍ പ്രതിചേര്‍ക്കപ്പെട്ടാല്‍ തനിക്കെതിരെ തെളിവായേക്കാവുന്ന വിഷയങ്ങള്‍ ഇപ്പോള്‍ ബിജു രമേശ് വെളിപ്പെടുത്തണമെന്ന ലോകായുക്തയുടെ ആവശ്യം ഭരണഘടനാ വിരുദ്ധമാണ്. ഭരണഘടനയുടെ അനുച്‌ഛേദം 20 പ്രകാരം പ്രതിയാകുന്നയാളെതന്നെ ഉപയോഗിച്ച് അയാള്‍ക്കെതിരെ തെളിവുണ്ടാക്കുന്നത് നിയമപരമായി നിലനില്‍ക്കുന്നതല്ല. മാത്രമല്ല ലോകായുക്ത നിയമം 11 വകുപ്പ് പ്രകാരവും കോടതിയില്‍ തെളിവാകുന്ന കാര്യങ്ങള്‍ വെളിപ്പെടുത്തുന്നതില്‍ നിന്ന് പൗരന് സംരക്ഷണം നല്‍കുന്നുണ്ട്. ഇത്തരം സങ്കീര്‍ണമായ നിയമപ്രശ്‌നങ്ങളാണ് ലോകായുക്ത നടപടികള്‍ക്കെതിരായ ബിജുരമേശിന്റെ ഹര്‍ജിയില്‍ പരിഗണിക്കപ്പെടുന്നതെന്നും ജസ്റ്റീസ് പി.ആര്‍. രാമചന്ദ്രമേനോന്‍ ഇടക്കാല ഉത്തരവില്‍ വ്യക്തമാക്കി.
വാദിയായ താന്‍ വിജിലന്‍സ് അന്വേഷണത്തിനൊടുവില്‍ പ്രതിയായാലും കെ.എം.മാണിയെ വിടില്ലെന്നായിരുന്നു ബാര്‍കോഴ ആരോപണം ഉന്നയിച്ച ബിജു രമേശ് തുടക്കത്തില്‍ സ്വീകരിച്ച നിലപാട്. വിജിലന്‍സ് അന്വേഷണം നടക്കുന്ന സാഹചര്യത്തില്‍ ലോകായുക്ത നടത്തുന്ന സമാന്തര അന്വേഷണം തടയണമെന്നാവശ്യപ്പെട്ടായിരുന്നു ബിജു രമേശിന്റെ ഹര്‍ജി. കൂടാതെ ലോകായുക്തയിലെ പരാതിക്കാരനായ ഖാലിദ് മുണ്ടപ്പള്ളി കോഴ ആരോപണവുമായി ബന്ധപ്പെട്ട തെളിവുകളൊന്നുമില്ലെന്ന് വ്യക്തമാക്കിയ സാഹചര്യത്തില്‍ നടപടികള്‍ തുടരുന്നതിനേയും കോടതി നേരത്തെ വിമര്‍ശിച്ചിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
