മുഖ്യമന്ത്രി ഉമ്മന്‍ചാണ്ടിക്കും എ ഗ്രൂപ്പിനുമെതിരെ പരാതിയുമായി ഐഗ്രൂപ്പ് നേതാക്കള്‍ സോണിയാ ഗാന്ധിയെ കണ്ടു. ഐഗ്രൂപ്പ് നേതാക്കളായ വിടി സതീഷനും, കെ സുധാകരനുമാണ് വെവ്വേറെ സോണിയാഗാന്ധിയെ കണ്ട് ചര്‍ച്ച നടത്തിയത്. രാജ്യസഭാസീറ്റില്‍ ഐഗ്രൂപ്പിന്റെ ആവശ്യം മുഖ്യമന്ത്രിയും കെപിസിസി പ്രസിഡന്റ് വിഎം സുധീരനും ഇടപെട്ട് തടയുകയായിരുന്നുവെന്നും ഇവര്‍ പരാതി പറഞ്ഞതായാണ് റിപ്പോര്‍ട്ട്.
അര്‍ഹമായ സ്ഥാനങ്ങള്‍ നല്‍കുന്നില്ലെന്നതും അഴിമതിക്കാരെ സംരക്ഷിച്ച് കോണ്‍ഗ്രസ് പ്രതിച്ഛായ നശിപ്പിക്കുന്നു എന്നതുമാണ് മുഖ്യമന്ത്രിക്കും എ വിഭാഗത്തിനും എതിരായ പ്രധാന പരാതി.
നിര്‍ണായക തീരുമാനങ്ങള്‍ക്കു മുമ്പ് ഐ വിഭാഗത്തിലെ മുതിര്‍ന്ന നേതാക്കളുമായി പോലും ചര്‍ച്ച ചെയ്യുന്നില്ലെന്നതാണ് കെ.പി.സി.സി അദ്ധ്യക്ഷന്‍ വി.എം. സുധീരന് എതിരായ പരാതി. രാജ്യസഭാ സീറ്റിനും ഡെപ്യൂട്ടി സ്പീക്കര്‍ സ്ഥാനത്തിനും അവകാശവാദവും ഉന്നയിച്ചിട്ടുണ്ട്. മന്ത്രി അടൂര്‍ പ്രകാശ് ഇന്ന് സോണിയാഗാന്ധിയെ കാണുന്നുണ്ട്.
കേരളത്തിന്റെ ചുമതലയുള്ള ജനറല്‍ സെക്രട്ടറി മുകുള്‍ വാസ്‌നികും ഇന്നലെ സോണിയാഗാന്ധിയെ കണ്ട് കേരളത്തിലെ വിഷയങ്ങള്‍ ചര്‍ച്ച ചെയ്തിരുന്നു. ഉമ്മന്‍ചാണ്ടി മാണിയെ ഉപയോഗിച്ച് തങ്ങളെ ഭീഷണിപ്പെടു്തുന്നുവെന്ന് ഐഗ്രൂപ്പിന് പരാതിയുണ്ട്. കേരള കോണ്‍ഗ്രസ് എമ്മിനെ ഉപയോഗിച്ച് ആഭ്യന്തര മന്ത്രി രമേശ് ചെന്നിത്തലയ്ക്ക് എതിരെ ഹൈക്കമാന്‍ഡിനു മുന്നില്‍ നടത്തിയ നീക്കത്തിനു തടയിടുക എന്ന ലക്ഷ്യം ഐ വിഭാഗം നേതാക്കളുടെ സന്ദര്‍ശനത്തിന് പിന്നിലുണ്ട്. വരുന്ന സംഘടനാ തിരഞ്ഞെടുപ്പില്‍ കെ.പി.സി.സി അദ്ധ്യക്ഷ പദവിയിലേക്ക് ഐ വിഭാഗത്തിന്റെ പ്രതിനിധിയായി മത്സരിക്കാനുള്ള താത്പര്യം കെ. സുധാകരന്‍ ഹൈക്കമാന്‍ഡില്‍ ചിലരെ അറിയിച്ചതായും സൂചനയുണ്ട്. എന്നാല്‍ ഈ വിഷയത്തില്‍ തിടുക്കത്തില്‍ തീരുമാനം വേണ്ടെന്ന നിലപാടിലാണ് ഐയിലെ മറ്റു പ്രധാന നേതാക്കള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha