കര്ഷകരെ വെട്ടിലാക്കി നബാര്ഡ്; പ്രമാണങ്ങള് പിടിച്ചുവയ്ക്കുന്നു
കര്ഷക കടാശ്വാസ കമ്മിഷന് തീര്പ്പു കല്പ്പിച്ച വായ്പകളുടെ പ്രമാണങ്ങള് സംസ്ഥാന സഹകരണ കാര്ഷിക ഗ്രാമ വികസന ബാങ്കുകള് പിടിച്ചുവയ്ക്കുന്നു. നബാര്ഡ് എതിര്ക്കുന്നതാണ് കര്ഷകര്ക്കു പ്രഹരമായിരിക്കുന്നത്. സംസ്ഥാന സര്ക്കാര് നബാര്ഡുമായി ചര്ച്ച നടത്തിയിട്ടും ഫലം കണ്ടില്ല.
കര്ഷകര്, ബാങ്ക്, സംസ്ഥാന സര്ക്കാര് എന്നിവ നിശ്ചിത വിഹിതം അടച്ച് വായ്പാ ഇടപാട് അവസാനിപ്പിച്ച് കര്ഷകന് കടാശ്വാസം നല്കുന്ന രീതിയിലാണ് കടാശ്വാസ കമ്മിഷന്റെ പ്രവര്ത്തനം. കര്ഷകനും വായ്പക്കാരനും വിഹിതം യഥാസമയം അടക്കുന്നുണ്ടെങ്കിലും സംസ്ഥാന സര്ക്കാര് വിഹിതം ബാങ്കുകള്ക്ക് ലഭിക്കുന്നതില് കാലതാമസമുണ്ടാകുന്നതാണ് പ്രശ്നത്തിനു കാരണം. അപ്പപ്പോള് പണം നല്കുന്നതിനു പകരം കോടികളുടെ കുടിശികയാകുമ്പോഴാണ് സംസ്ഥാന സര്ക്കാര് കടാശ്വാസ വിഹിതമായി പണം അനുവദിക്കുന്നത്.
സര്ക്കാര് സഹകരണ വകുപ്പിനാണു പണം അനുവദിക്കുന്നത്. സഹകരണ വകുപ്പ് ആവശ്യമായ പരിശോധന നടത്തി പണം ബാങ്കുകള്ക്കു നല്കുന്നതിനു സമയമെടുക്കും. ഈ സാഹചര്യത്തില്, സര്ക്കാരില്നിന്നു നിശ്ചയമായും പണം ലഭിക്കുമെന്നിരിക്കേ അതിനായി കര്ഷകന്റെ ഈട് പ്രമാണം തിരികെ നല്കാതിരിക്കുന്ന നടപടി ശരിയല്ലെന്നാണ് സഹകരണ വകുപ്പ് ബാങ്കുകളെ അറിയിച്ചത്. അതിനിടെ ഇങ്ങനെ ചെയ്യരുതെന്ന് ആവശ്യപ്പെട്ട് നബാര്ഡ് സംസ്ഥാന സഹകരണ കാര്ഷിക ഗ്രാമ വികസന ബാങ്ക് മാനേജിങ് ഡയറക്ടര്ക്ക് കത്ത് നല്കിയതോടെയാണ് പ്രതിസന്ധി ഉടലെടുത്തത്.
തങ്ങള്ക്ക് നബാര്ഡ് നേരിട്ട് പണം നല്കുന്നതിനാല് നബാര്ഡിന്റെ നിര്ദേശം അവഗണിക്കാന് കഴിയില്ലെന്ന് കാര്ഷിക ഗ്രാമ വികസന ബാങ്ക് സഹകരണ വകുപ്പിനെ അറിയിച്ചിട്ടുണ്ട്. എല്ലാവരുടെയും വിഹിതം പൂര്ണമായി അടക്കുന്നതുരെയുള്ള കാലയളവില് കര്ഷകനില് നിന്ന് പലിശ ഈടാക്കണമെന്നും നബാര്ഡ് ബാങ്കുകള്ക്ക് നിര്ദേശം നല്കി. മറ്റു സഹകരണ ബാങ്കുകള്ക്ക് സംസ്ഥാന സര്ക്കാരില് നിന്നുള്ള ധനസഹായം മാത്രം ലഭിക്കുന്നതിനാല് അവരെല്ലാം സര്ക്കാര് നിര്ദേശം പാലിക്കുന്നുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
