സമിതിയുടെ അധ്യക്ഷനായതില്‍ വളരെയധികം സന്തോഷമുണ്ടെന്ന് മാണി, കേരളത്തിന് ഇനി കൂടുതല്‍ ആശ്വാസം
കേരളം സാമ്പത്തിക പ്രതിസന്ധിയുടെ നടുവിലാണെങ്കിലും ഇനി അല്‍പമൊന്ന് സമാധാനിക്കാം. സംസ്ഥാന ധനമന്ത്രിമാരുടെ ഉന്നതാധികാരസമിതിയുടെ അധ്യക്ഷനായി കെ എം മാണിയെ തിരഞ്ഞെടുത്തിരിക്കുകയാണ്. കേരളത്തിന്റെ സാമ്പത്തിക പ്രതിസന്ധി ഇനി പൂര്‍ണമായും അവസാനിക്കുമെന്ന് ഉറപ്പ്. സംസ്ഥാനത്ത് സാമ്പത്തിക വര്‍ഷത്തിന്റെ അവസാന നാളുകളെത്തിയതോടെ വര്‍ധിച്ച ചെലവിനായി പണം കണ്ടെത്താനാവാതെ വലയുകയാണ് ധനവകുപ്പെന്ന് പലരും മാണിക്കെതിരെ ആരോപണങ്ങള്‍ ഉന്നയിച്ചിരുന്നു. എന്നാല്‍, പണമില്ലാത്തതിനാല്‍ ഒരു പദ്ധതിയും മുടങ്ങിയിട്ടില്ലെന്നും, ബില്ലുകള്‍ മടങ്ങിയിട്ടില്ലെന്നും മാണി അടുത്തിടെ വ്യക്തമാക്കിയിരുന്നു.
സാമ്പത്തിക പ്രതിസന്ധിയ്ക്കും അതൊടൊപ്പം കേരളത്തിനും ഇനി വികസനവും പുരോഗതിയും ഉണ്ടാകുമെന്ന് തന്നെയാണ് ഓരോ മലയാളികളുടെയും പ്രതീക്ഷ. ധനമന്ത്രിമാരുടെ ഉന്നതാധികാരസമിതിയുടെ അധ്യക്ഷനായി കെ എം മാണി തിരഞ്ഞെടുത്തതോടെ ധനവകുപ്പിനും ഇനി മാറ്റങ്ങള്‍ ഉണ്ടാകുമെന്ന് തന്നെയാണ് വിശ്വാസിക്കേണ്ടതും. 2016 ഏപ്രില്‍ മുതല്‍ ചരക്ക് സേവന നികുതി(ജി.എസ്.ടി.) നടപ്പാക്കുന്നതിന് നേതൃത്വം നല്‍കേണ്ടത് ധനമന്ത്രിമാരുടെ ഉന്നതാധികാരസമിതിയാണ്.
തന്നെ അദ്ധ്യക്ഷനായി തിരഞ്ഞെടുത്തതില്‍ വളരെയധികം നന്ദിയുണ്ടെന്നും കെ എം മാണി വ്യക്തമാക്കിയിരുന്നു. ചരക്ക് സേവനനികുതിയുടെ കാര്യത്തില്‍ കേരളത്തിന് പ്രത്യേകമായി തീരുമാനമൊന്നും എടുക്കാനാവില്ലെങ്കിലും സംസ്ഥാനത്തിന്റെ വാദങ്ങള്‍ക്ക് മാണിയുടെ ഈ നിയമനം കൂടുതല്‍ സഹായകവും ബലംനല്‍കുമെന്ന് തന്നെയാണ് പലരും പ്രതീക്ഷിക്കുന്നത്. സംസ്ഥാനങ്ങളുടെ നിലപാടുകള്‍ ക്രോഡീകരിച്ച് അന്തിമനിര്‍ദ്ദേശങ്ങള്‍ സമര്‍പ്പിക്കേണ്ടതും ധനമന്ത്രിമാരുടെ ഉന്നതാധികാരസമിതിയാണ്.
നിലവിലുള്ള മൂല്യവര്‍ധിത നികുതിസമ്പ്രദായം മാറ്റി രാജ്യത്തെ വിവിധ നികുതികളെല്ലാം ഏകീകരിക്കുന്നതാണ് ചരക്ക് സേവന നികുതി. വാണിജ്യനികുതി, സേവനനികുതി, എക്‌സൈസ് നികുതി തുടങ്ങിയവയെല്ലാം ഇനി ഒന്നാവും. കേന്ദ്രവും സംസ്ഥാനവും വെവ്വേറെയാണ് നികുതി ചുമത്തുക. ഇപ്പോള്‍ കേരളം പെട്രോളിയം ഉത്പന്നങ്ങള്‍ക്ക് വന്‍തോതില്‍ നികുതി ചുമത്തുന്നുണ്ട്. ജി.എസ്.ടി.യില്‍ വന്നാല്‍ സംസ്ഥാനങ്ങള്‍ക്ക് ഏകീകൃത നിരക്കേ ചുമത്താനാവൂ. സംസ്ഥാനത്തിന് നഷ്ടമുണ്ടാകാത്ത നികുതിനിരക്ക് നിര്‍ണയിക്കണമെന്നതാണ് കേരളത്തിന്റെ മറ്റൊരാവശ്യം. ആദ്യമായാണ് തെക്കേയിന്ത്യയില്‍നിന്ന് ഒരു ധനമന്ത്രി ഈ സമിതിയുടെ അധ്യക്ഷനാവുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
