സംഘം ചേര്ന്ന് വീടാക്രമിച്ചു, കോവിഡ് ആനുകുല്യത്തില് പുറത്തിറങ്ങിയ കാപ്പ പ്രതികളും സുഹൃത്തുക്കളും ഒളിവില്
ഒല്ലൂര് അഞ്ചേരിച്ചിറയില് കഴിഞ്ഞ ദിവസം രാത്രി കോയമ്പത്തൂര്ക്കാരന് കൃഷ്ണമൂര്ത്തിയുടെ വീട് 12 പേരടങ്ങുന്ന സംഘം ആക്രമിച്ചു.വീടിന്റെ വാതിലും സമീപത്തുള്ള ബന്ധുവീടിന്റെ വാതിലും വീടിന്റെ പുറത്തിരുന്ന രണ്ട് ബൈക്കുകളും ഇവര് തകര്ത്തു.
ഒന്നര വര്ഷം മുമ്പ് വളര്ക്കാവ് സ്വദേശി വിനോദില് നിന്നും കൃഷ്ണമൂര്ത്തിയുടെ മകന് രമേഷ് പണം കടം വാങ്ങിയിരുന്നു. തുക പലതവണകളായി മടക്കി കൊടുത്തിരുന്നു. ലോക്ഡൗണ് മൂലം അവസാനഘട്ട തുക നല്കാന് കഴിഞ്ഞില്ലെന്നും തുടര്ന്ന് ഇയാള് രണ്ടു ദിവസം മുമ്പ് വീട്ടിലെത്തി ഭീഷണിപ്പെടുത്തിയതായും രമേഷ് പറയുന്നു.
കഴിഞ്ഞ ദിവസം ഗുണ്ടകളുമായെത്തിയ വിനോദ് വീടുകള് ആക്രമിക്കുകയായിരുന്നു. സമീപത്ത് താമസിക്കുന്ന ബന്ധുവായ വിനയന്റെ വീട്ടിലാണ് രമേഷ് ഉറങ്ങാറുള്ളതെന്ന് അറിയാവുന്ന പ്രതികള് ആദ്യം അവിടെയെത്തിയെങ്കിലും രമേഷിനെ അവിടെ കണ്ടെത്താനായില്ല. തുടര്ന്ന് രമേഷിന്റെ തന്നെ വീട്ടിലേക്ക് കയറി ഇരുമ്പുവടികളും വാളുകളുമായി അക്രമിക്കുകയുമായിരുന്നു. ബഹളം കേട്ട് ആളുകള് എത്തിയതോടെ അക്രമികള് രക്ഷപ്പെട്ടു.
അക്രമികളില് 2 പേര് കാപ്പ പ്രകാരം ജയിലിലായിരുന്നുവെന്നും കോവിഡ് ആനുകുല്യം മൂലമാണ് ഇവര് പുറത്തിറങ്ങിയതെന്നും പ്രതികള് ഒളിവിലാണെന്നും ഒല്ലൂര് പൊലീസ് പറഞ്ഞു.
https://www.facebook.com/Malayalivartha