പാചകവാതക സിലിണ്ടര്‍ പൊട്ടിത്തെറിച്ച് മൂന്ന് സഹോദരങ്ങള്‍ക്ക് ദാരുണാന്ത്യം. ഓങ്ങല്ലൂര്‍ നമ്പാടത്ത് ചുങ്കത്ത് വീട്ടില്‍ പരേതനായ അബ്ദുറഹിമാന്റെ മക്കളായ ബാദുഷ (38 ), ഷാജഹാന്‍ (40), സാബിറ (44) എന്നിവരാണ് ഇന്നലെ കോഴിക്കോട് മെഡിക്കല്‍ കോളജാശുപത്രിയില്‍ മരിച്ചത്. പരിക്കേറ്റ മാതാവിനെ ആശുപത്രിയില്‍ പ്രവേശിപ്പിച്ചു. തിങ്കളാഴ്ച രാത്രി 11ഓടെയായിരുന്നു നാടിനെ നടുക്കിയ സംഭവം നടന്നത്. സിലിണ്ടറില്‍ നിന്ന് പാചകവാതകം ചോര്‍ന്നതാണ് അപകടകാരണമെന്നാണ് സൂചന.

വീട് ഏകദേശം പൂര്‍ണമായും തകര്‍ന്നു. ബാദുഷ ചൊവ്വാഴ്ച വൈകീട്ട് നാലിനും മറ്റ് രണ്ടുപേര്‍ രാത്രി എട്ടരയോടെയുമാണ് മരിച്ചത്. മാതാവ് നബീസയാണ് ചികിത്സയിലുള്ളത്. സിലിണ്ടര്‍ പൊട്ടിത്തെറിച്ച് പരിക്കേറ്റ നാലുപേരെയും പരിക്കോടെ പട്ടാമ്പി സ്വകാര്യാശുപത്രിയിലാണ് ആദ്യം പ്രവേശിപ്പിച്ചത്. പരിക്ക് ഗുരുതരമായതിനാല്‍ പെരിന്തല്‍മണ്ണയിലേക്ക് കൊണ്ടുപോയെങ്കിലും അവിടെ നിന്ന് കോഴിക്കോട്ടേക്ക് മാറ്റുകയായിരുന്നു.

ഷൊര്‍ണൂര്‍ ഫയര്‍ഫോഴ്‌സും പട്ടാമ്പി പൊലീസും സ്ഥലത്തെത്തി നടപടികള്‍ സ്വീകരിച്ചു. മരിച്ച ബാദുഷ അവിവാഹിതനാണ്. മൃതദേഹങ്ങള്‍ ബുധനാഴ്ച പോസ്റ്റ്‌മോര്‍ട്ടശേഷം വീട്ടില്‍ കൊണ്ടുവരും.