പാലക്കാട് ഷൊര്‍ണ്ണൂര്‍ റെയില്‍വേ ട്രാക്കില്‍ വന്‍ അട്ടിമറി ശ്രമം...ബിഹാര്‍ സ്വദേശിയായ ഷുക് ലാല്‍ മറിയ എന്നയാളെ ആര്‍.പി.എഫ് കസ്റ്റഡിയിലെടുത്തു..ഭാഗ്യം കൊണ്ട് മാത്രമാണ് വന്‍ ദുരന്തം ഒഴിവായത്...
ആയിരക്കണക്കിന് യാത്രക്കാരുടെ ജീവനെ അപായപ്പെടുത്താന്‍ ലക്ഷ്യമിട്ട് പാലക്കാട് ഷൊര്‍ണ്ണൂര്‍ റെയില്‍വേ ട്രാക്കില്‍ വന്‍ അട്ടിമറി ശ്രമം. ഒറ്റപ്പാലത്തിനും ഷൊര്‍ണ്ണൂര്‍ റെയില്‍വേ സ്റ്റേഷനും ഇടയിലുള്ള പാളത്തില്‍ വന്‍തോതില്‍ ഭാരമുള്ള വസ്തുക്കള്‍ വെച്ച് ട്രെയിന്‍ പാളം തെറ്റിക്കാന്‍ നീക്കം നടന്നതായി കണ്ടെത്തി. ഭാഗ്യം കൊണ്ട് മാത്രമാണ് വന്‍ ദുരന്തം ഒഴിവായത്. സംഭവ സ്ഥലത്തുനിന്നും സംശയകരമായ സാഹചര്യത്തില്‍ ബിഹാര്‍ സ്വദേശിയായ ഷുക് ലാല്‍ മറിയ എന്നയാളെ റെയില്‍വേ സംരക്ഷണ സേന (ആര്‍.പി.എഫ്) കസ്റ്റഡിയിലെടുത്തു.
ഇയാളെ നിലവില്‍ അതീവ രഹസ്യമായി ചോദ്യം ചെയ്തുവരികയാണ്.ഒറ്റപ്പാലത്തിനും ഷൊര്‍ണ്ണൂരിനുമിടയില്‍ മൂന്ന് വെവ്വേറെ സ്ഥലങ്ങളിലാണ് കനത്ത ഭാരമുള്ള വസ്തുക്കള്‍ പാളത്തില്‍ നിരത്തിവെച്ച നിലയില്‍ കണ്ടെത്തിയത്. കോണ്‍ക്രീറ്റ് സ്ലാബുകള്‍, ഇരുമ്പ് റെയില്‍ കഷണങ്ങള്‍, കൂടാതെ ഒരു ചാക്കില്‍ കട്ടപിടിച്ച നിലയിലുള്ള സിമന്റും പാളത്തിന് കുറുകെ വെച്ചിട്ടുണ്ടായിരുന്നു. ട്രെയിന്‍ അതിവേഗത്തില്‍ കടന്നുപോകുമ്പോള്‍ പാളം തെറ്റിച്ച് വലിയ ദുരന്തമുണ്ടാക്കുക എന്ന വ്യക്തമായ ലക്ഷ്യത്തോടെ തന്നെയാണ് ഈ വസ്തുക്കള്‍ പാളത്തില്‍ സ്ഥാപിച്ചതെന്നാണ് പ്രാഥമിക പരിശോധനയ്ക്ക് ശേഷം സുരക്ഷാ ഏജന്‍സികള്‍ വിലയിരുത്തുന്നത്.
കൃത്യസമയത്ത് ട്രാക്ക് പരിശോധന നടത്തുന്ന റെയില്‍വേ ജീവനക്കാരുടെ (ഗാംഗ്മാന്‍) ശ്രദ്ധയില്‍പ്പെട്ടതിനാലാണ്വന്‍ അപായം ഒഴിവായത്. ഉടന്‍തന്നെ വിവരം ഷൊര്‍ണ്ണൂര്‍, ഒറ്റപ്പാലം സ്റ്റേഷന്‍ അധികൃതരെ അറിയിക്കുകയും ഈ വഴി വരേണ്ടിയിരുന്ന ട്രെയിനുകളുടെ വേഗത കുറയ്ക്കാന്‍ അടിയന്തര നിര്‍ദ്ദേശം നല്‍കുകയുമായിരുന്നു. വിവരമറിഞ്ഞ് മിനിറ്റുകള്‍ക്കകം ആര്‍.പി.എഫും ലോക്കല്‍ പോലീസും സ്ഥലത്തെത്തുകയും പാളത്തില്‍ നിന്ന് വസ്തുക്കള്‍ നീക്കം ചെയ്ത് ഗതാഗതം സുരക്ഷിതമാക്കുകയും ചെയ്തു.സംഭവസ്ഥലത്തിന് സമീപത്തുനിന്നാണ് ബിഹാര്‍ സ്വദേശിയായ ഷുക് ലാല്‍ മറിയയെ ആര്‍.പി.എഫ് സംഘം കസ്റ്റഡിയിലെടുത്തത്.
ഇയാള്‍ തനിച്ചാണോ ഈ കൃത്യം ചെയ്തത്, അതോ ഇതിന് പിന്നില്‍ ഏതെങ്കിലും തരത്തിലുള്ള ഗൂഢസംഘങ്ങളോ വിഘടനവാദ പ്രസ്ഥാനങ്ങളോ ഉണ്ടോയെന്ന കാര്യം പോലീസ് ഗൗരവത്തോടെ അന്വേഷിക്കുന്നുണ്ട്. ഇയാളുടെ പശ്ചാത്തലവും മുന്‍കാല ചരിത്രവും പരിശോധിക്കുന്നതിനായി ബീഹാര്‍ പോലീസുമായി ബന്ധപ്പെട്ടിട്ടുണ്ട്. പ്രാഥമിക ചോദ്യം ചെയ്യലില്‍ ഇയാള്‍ പരസ്പരവിരുദ്ധമായ മൊഴികളാണ് നല്‍കുന്നത്.ട്രെയിന്‍ ഗതാഗതം കല്‍പ്പിച്ചുകൂട്ടി തടസ്സപ്പെടുത്താനും അപായപ്പെടുത്താനും നടന്ന നീക്കത്തെ കേന്ദ്ര-സംസ്ഥാന രഹസ്യാന്വേഷണ ഏജന്‍സികള്‍ അതീവ ഗൗരവത്തോടെയാണ് വീക്ഷിക്കുന്നത്.
https://www.facebook.com/Malayalivartha
