തുലാവര്‍ഷം ശക്തമായതോടെ സംസ്ഥാനത്തിന്‍റെ വിവിധ ഭാഗങ്ങളില്‍ കനത്ത മഴ. തുടർച്ചയായി രണ്ട് ന്യൂനമർദങ്ങൾ രൂപപ്പെടുന്നതാണ് കേരളത്തില്‍ മഴയ്‌ക്ക് കാരണമാകുന്നതെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇന്ന് രാത്രിയോടെ തമിഴ്‌നാടിനോട് ചേർന്ന് ആദ്യത്തെ ന്യൂനമർദം രൂപപ്പെടാൻ സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം വിലയിരുത്തുന്നു. 23ന് ആന്‍റമാനിനും ബംഗാൾ ഉൾക്കടലിലും അടുത്തായി രണ്ടാമത്തെ ന്യൂനമർദം രൂപപ്പെടും. ഇന്ന് തമിഴ്‌നാടിനോട് അടുത്ത് രൂപപ്പെടുന്ന ന്യൂനമർദം കേരളത്തെയും ബാധിക്കും.

തുലാ വർഷ മഴ വൈകുന്നേരങ്ങളിലാണ് ലഭിക്കുന്നതെങ്കിൽ ന്യൂനമർദം കാരണം ദിവസം മുഴുവൻ മഴ ലഭിക്കുന്ന സാഹചര്യം ഉണ്ടാകും. ഒക്‌ടോബര്‍ 24,25,26 തീയതികളിൽ അതിശക്തമായ മഴയാണ് പ്രതീക്ഷിക്കുന്നത്. മധ്യ -തെക്കൻ കേരളത്തിലാണ് അതിശക്തമായ മഴ സാധ്യത. മറ്റ് ജില്ലകളിലും പരക്കെ മഴ ലഭിക്കും.ഈ സമയം ന്യൂനമർദം അറബിക്കടലിലേക്ക് നീങ്ങും എന്നാണ് പ്രതീക്ഷിക്കുന്നത്. ജാഗ്രത മുന്നറിയിപ്പും പുറപ്പെടുവിപ്പിക്കും. ഇന്ന് മുതൽ കേരളത്തിൽ പരക്കെ മഴ ലഭിച്ചു തുടങ്ങും. അതേസമയം ആന്‍റമാനിനും ബംഗാൾ ഉൾക്കടലിനും അടുത്ത് രൂപപ്പെടുന്ന ന്യൂനമർദം കേരളത്തെ ബാധിക്കില്ലെന്ന് മാത്രമല്ല മഴ കുറയാനും കാരണമാകും.

തിരുവനന്തപുരം, ഇടുക്കി ജില്ലകളിലാണ് നിലവില്‍ മഴ ഏറ്റവും കൂടുതല്‍ ശക്തിപ്രാപിച്ചിരിക്കുന്നത്.സംസ്ഥാനത്ത് തുലാവര്‍ഷം ശക്തമാകുന്നു. അടുത്ത അഞ്ചുദിവസം അതിശക്തമായ മഴയ്ക്ക് സാദ്ധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. വിവിധ ജില്ലകളിൽ ഓറഞ്ച്, മഞ്ഞ അലർട്ടുകൾ പ്രഖ്യാപിച്ചു. ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിൽ ഓറഞ്ച് അലർട്ടാണ്. ഓറഞ്ച് അലർട്ട്..22/10/2026: എറണാകുളം, തൃശൂർ, മലപ്പുറം, കോഴിക്കോട്..മഞ്ഞ അലർട്ട്..22/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, വയനാട്, കണ്ണൂർ, കാസർകോട്.

ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാദ്ധ്യതയാണ് പ്രവചിച്ചിരിക്കുന്നത്.ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്. അതിനാല്‍ പൊതുജനങ്ങള്‍ ജാഗ്രത പാലിക്കണം എന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു.തിരുവനന്തപുരം, കൊല്ലം, ആലപ്പുഴ, കോട്ടയം ജില്ലകളില്‍ ശക്തമായ മഴക്കു പുറമേ, 50 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ട്. ഉരുള്‍പൊട്ടല്‍, മണ്ണിടിച്ചില്‍, മലവെള്ളപ്പാച്ചില്‍ സാധ്യതയുള്ള പ്രദേശങ്ങളില്‍ താമസിക്കുന്നവര്‍ അധികൃതരുടെ നിര്‍ദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണം എന്ന് സംസ്ഥാന ദുരന്ത നിവാരണ അതോറിറ്റി പറഞ്ഞു.

നദിക്കരകള്‍, അണക്കെട്ടുകളുടെ കീഴ്പ്രദേശങ്ങള്‍ എന്നിവിടങ്ങളില്‍ താമസിക്കുന്നവരും അപകടസാധ്യത മുന്‍കൂട്ടി കണ്ട് അധികൃതരുടെ നിര്‍ദേശാനുസരണം മാറി താമസിക്കേണ്ടതാണ്.