നെടുമ്പാശ്ശേരി മിനി കൂപ്പർ ദുരന്തത്തിൽ പ്രതി സുഹൈൽ സജീവിനെ പൂർണ്ണമായും പൂട്ടിക്കൊണ്ട് മോട്ടോർ വാഹന വകുപ്പിന്റെ അന്തിമ റിപ്പോർട്ട് പുറത്ത്. അപകടസമയത്ത് വാഹനത്തിന് യാതൊരുവിധ സാങ്കേതിക തകരാറുകളും ഉണ്ടായിരുന്നില്ലെന്നും, മണിക്കൂറിൽ 160 കിലോമീറ്ററിലധികം വേഗതയിലാണ് കാർ സ്കൂട്ടറിലേക്ക് ഇടിച്ചുകയറിയതെന്നും ജോയിന്റ് ആർടിഒ കോടതിയെ അറിയിച്ചു. സാധാരണക്കാരന്റെ അഞ്ചിരട്ടിയിലധികം മദ്യം പ്രതി അപകടസമയത്ത് കഴിച്ചിരുന്നതായി കെമിക്കൽ ലാബ് റിപ്പോർട്ടും സ്ഥിരീകരിക്കുന്നു. പ്രതികളുടെ ജാമ്യാപേക്ഷ കോടതി തള്ളിയതോടെ, ആർസി ഉടമയായ നോഹ സജീവിന്റെ മൊഴിയെടുക്കാനും ഇരകളുടെ വീടുകളിൽ എത്തി കൂടുതൽ തെളിവുകൾ ശേഖരിക്കാനുമുള്ള അടിയന്തര നീക്കത്തിലാണ് പ്രത്യേക അന്വേഷണസംഘം.