സ്വര്‍ണ്ണക്കടത്തില്‍ പിടിയിലായ ചിലര്‍ക്ക് ഐ.എസ്. റിക്രൂട്ട്മെന്റുമായി ബന്ധമെന്ന് നിഗമനം
സംസ്ഥാനത്തുനിന്നുള്ള ഐ.എസ്. റിക്രൂട്ട്മെന്റുമായി നയതന്ത്ര ചാനല്‍വഴി സ്വര്‍ണം കടത്തിയ കേസില്‍ പിടിയിലായവരില്‍ ചിലര്‍ക്ക് ബന്ധമുണ്ടെന്ന് എന്‍.ഐ.എ. നിഗമനം. മതപരിവര്‍ത്തനം നടത്തി നിരോധിത സംഘടനകളില്‍ പ്രവര്‍ത്തിക്കാനായി വിദേശത്തേക്കു കടത്തിയ സംഭവത്തില്‍ ഇവര്‍ക്കുള്ള പങ്കിനെപ്പറ്റി അന്വേഷിക്കുകയാണെന്നും ഇന്ന് എന്‍.ഐ.എ. കോടതിയെ അറിയിക്കും.
ഇവരില്‍ ചിലര്‍ക്ക് സോണിയ സെബാസ്റ്റിയന്‍ എന്ന യുവതി ഉള്‍പ്പെടെയുള്ളവരെ മതപരിവര്‍ത്തനം നടത്തി അഫ്ഗാനിസ്ഥാനിലേക്കു കൊണ്ടുപോയതുമായി ബന്ധമുണ്ടെന്ന് സൂചന ലഭിച്ചതായാണു വിവരം. അയിഷ എന്നു പേരു മാറ്റിയ സോണിയയ്ക്കും ഭര്‍ത്താവ് അബ്ദുള്‍ റഷീദ് അബ്ദുള്ളയ്ക്കുമെതിരെ 2017-ല്‍ എന്‍.ഐ.എ. കുറ്റപത്രം സമര്‍പ്പിച്ചിരുന്നു. ഭര്‍ത്താവ് കൊല്ലപ്പെട്ടതിനു ശേഷം അയിഷ അഫ്ഗാനിസ്ഥാനില്‍ കീഴടങ്ങിയിരുന്നു. പിടിയിലായവരില്‍ ചിലര്‍ ഇവരുമായി ഫോണില്‍ ബന്ധപ്പെട്ടിരുന്നതായി പ്രാഥമിക പരിശോധനയില്‍ കണ്ടെത്തിയിട്ടുണ്ട്.
സ്വര്‍ണക്കടത്ത് കേസില്‍ അറസ്റ്റിലായ മുഹമ്മദാലി തൊടുപുഴയിലെ കോളജ് അധ്യാപകന്റെ കൈപ്പത്തി വെട്ടിയ കേസില്‍ പ്രതിയായിരുന്നു. മതപരിവര്‍ത്തനം ഉള്‍പ്പെടെയുള്ള കാര്യങ്ങളില്‍ ഇയാള്‍ക്കു പങ്കുള്ളതായി സംശയമുണ്ട്. അറസ്റ്റിലായ കെ.ടി. റമീസിന്റെ പങ്ക് വിശദമായി അന്വേഷിക്കുകയാണെന്നും എന്‍.ഐ.എ. കോടതിയെ അറിയിക്കും. രാജ്യത്തിന്റെ സമ്പദ്വ്യവസ്ഥ തകര്‍ക്കുക മാത്രമല്ല, തീവ്രസ്വഭാവമുള്ള പ്രവര്‍ത്തനങ്ങളില്‍ ഇവര്‍ പങ്കാളികളായിരുന്നുവെന്നും നിരോധിക്കപ്പെട്ട ചില സംഘടനകളുമായി ബന്ധമുള്ളതായും വിവരമുണ്ട്.
നിരോധനത്തെത്തുടര്‍ന്നു മറ്റു സംഘടനകളിലേക്കു പോയ പ്രവര്‍ത്തകരുമായും ഇതര സംഘടനകളുമായും ഇവര്‍ ബന്ധം തുടരുന്നതായും സംശയിക്കുന്നു. പ്രതികളുടെ വീടുകളിലും സ്ഥാപനങ്ങളിലും നടന്ന റെയ്ഡില്‍ പിടിച്ചെടുത്ത ബാങ്ക് പാസ് ബുക്കുകളും ഹാര്‍ഡ് ഡിസ്‌കുകളും പെന്‍ഡ്രൈവും മൊെബെല്‍ഫോണുകളും ചില രേഖകളും വിശദമായി പരിശോധിക്കുകയാണ്.
കൊച്ചിയിലെ ബ്യൂട്ടി പാര്‍ലര്‍ വെടിവയ്പ്പ് ആസൂത്രണം ചെയ്ത പെരുമ്പാവൂര്‍ സംഘത്തില്‍പ്പെട്ടയാളാണു റമീസ്. റമീസിനു നേരത്തെതന്നെ തീവ്രവാദ സംഘടനകളുമായും ഗുണ്ടാസംഘങ്ങളുമായും ബന്ധമുണ്ട്. ഇപ്പോള്‍ പിടിയിലായവരെ ചോദ്യം ചെയ്യുന്നതോടെ തീവ്രവാദ ബന്ധമുള്ള കൂടുതല്‍ പേര്‍ വലയിലാകുമെന്നാണ് അന്വേഷണ ഉദ്യോഗസ്ഥരുടെ പ്രതീക്ഷ. സ്വര്‍ണക്കടത്തിലൂടെ ലഭിക്കുന്ന പണം മഹാരാഷ്ട്ര, കര്‍ണാടക, ആന്ധ്ര, തമിഴ്നാട് സംസ്ഥാനങ്ങളിലും എത്തുന്നുണ്ട്. ഇവിടങ്ങളില്‍ ചിലര്‍ കസ്റ്റഡിയിലുണ്ട്. പലയിടത്തായി റെയ്ഡുകള്‍ നടക്കുന്നു.
സ്വര്‍ണക്കടത്തു കേസില്‍ യു.എ.പി.എ. ചുമത്താന്‍ വസ്തുതകളുണ്ടോ എന്ന് അറിയിക്കാനും കേസ് ഡയറി ഹാജരാക്കാനും സ്വപ്ന സുരേഷിന്റെ ജാമ്യാപേക്ഷ പരിഗണിക്കുന്നതിനിടെ എന്‍.ഐ.എ. കോടതി നിര്‍ദേശിച്ചിരുന്നു. ഈ സാഹചര്യത്തില്‍ കേസില്‍ യു.എ.പി.എ. കുറ്റം നിലനില്‍ക്കുമെന്നും വിശദമായ അന്വേഷണം ആവശ്യമാണെന്നും കോടതിയെ അറിയിക്കാനാണ് എന്‍.ഐ.എ. ഉദ്ദേശിക്കുന്നത്.
https://www.facebook.com/Malayalivartha
