മധ്യകേരളത്തില് ആശങ്ക ഉയരുന്നു; നദികള് നിറഞ്ഞൊഴുകുന്നു; പമ്പ ഡാം വൈകുന്നേരം തുറക്കും; കോട്ടയവും സമീപപ്രദേശങ്ങളും വെള്ളത്തില്; ഇടുക്കിയില് ഇന്നും റെഡ് അലര്ട്ട്
മധ്യകേരളത്തില് കനത്ത മഴ തുടരുന്നത് ആശങ്ക വര്ധിപ്പിക്കുന്നു. ഇതിനോടകം തന്നെ പമ്പ, അച്ചന്കോവില്, മീനച്ചില്, മണിമല എന്നിങ്ങനെ മധ്യകേരളത്തിലെ പ്രധാന നദികളെല്ലാം കരകവിഞ്ഞ് ഒഴുകുകയാണ്. പത്തനംതിട്ടയിലും കോട്ടയത്തും താഴ്ന്ന പ്രദേശങ്ങളില് വെള്ളം കയറി. വെള്ളം ഉയര്ന്നതോടെ കുട്ടനാട്ടില് കൂടുതല് ദുരിതാശ്വാസ ക്യാമ്പുകള് തുറന്നു. പത്തനംതിട്ട ജില്ലയില് ആശങ്ക വര്ധിപ്പിക്കുന്നത് പമ്പ ഡാമിലെ ജലനിരപ്പ് ഉയരുന്നതാണ്. പമ്പാ ഡാമിന്റെ ജലനിരപ്പ് 985 മീറ്ററിലെത്തിയാല് ഉടനെ തന്നെ ഡാം തുറക്കും. ഇന്ന് വൈകുന്നേരം അഞ്ചു മണിയോടെ മൂന്നു ഷട്ടരുകള് തുറക്കാന് സാധ്യതയുണ്ടെന്ന് ജില്ലാ ഭരണകൂടം അറിയിച്ചു. ഡാമിന്റെ ജലനിരപ്പ് 984.5 മീറ്റര് എത്തിട്ടുണ്ട്. ഇന്ന് ഡാമിലേക്കുള്ള ജലത്തിന്റെ നിരൊഴുക്ക് കുറഞ്ഞിട്ടുണ്ട്. മഴ കനത്തതോടെ ആറന്മുള, ഇരവിപേരൂര് പ്രദേശങ്ങളിലും വെള്ളം കയറി. ജില്ലയില് 52 ദുരിതാശ്വാസ ക്യാമ്പുകളാണ് ഇതുവരെ തുറന്നത്. കക്കി ഡാമില് 52 ശതമാനം വെള്ളമാണുള്ളത്. മഴ കൂടുതല് ശക്തമായാല് പമ്പാ ഡാം തുറക്കേണ്ടി വരുമെന്ന് കളക്ടര് പി ബി നൂഹ് പറഞ്ഞിരുന്നു. എന്നാല് ആറന്മുള, റാന്നി പ്രദേശങ്ങളില് നിന്ന് വെള്ളം ഇറങ്ങി തുടങ്ങിട്ടുണ്ട്.
പാലായെ മുക്കിയ വെള്ളം ഇറങ്ങിയതോടെ കോട്ടയവും സമീപപ്രദേശങ്ങളും വെള്ളത്തിലായി. കൊച്ചി വിമാനത്താവളത്തില് നിന്നും യാത്രക്കാരനുമായി വന്ന ടാക്സി െ്രെഡവറെ കോട്ടയത്ത് ഒഴുകില്പ്പെട്ട് കാണാതെയായി. കൊച്ചി എയര്പോര്ട്ട് ടാക്സി ഡ്രൈവറും അങ്കമാലി സ്വദേശിയുമായ ജസ്റ്റിനെയാണ് കാണാതായത്. പുലര്ച്ചെ ഒരു മണിയോടെ മണര്കാട് നാലു മണിക്കാറ്റിന് സമീപം പാലമുറിയിലാണ് അപകടമുണ്ടായത്. വിമാനത്താവളത്തിലെത്തിയ യാത്രക്കാരനെ കോട്ടയത്തെ വീട്ടിലിറക്കി തിരികെ വരികയായിരുന്നു ജസ്റ്റിന്. യാത്രയ്ക്കിടെ കാര് ഒഴുകില്പ്പെട്ടതോടെ ഇയാള് പുറത്തിറങ്ങി കാര് തള്ളി നീക്കാന് ശ്രമിക്കുകയായിരുന്നു. ഇതിനിടെയാണ് അപകടത്തില്പ്പെട്ടത്. മീനച്ചിലാറിന്റെ കൈവഴിയായ വെള്ളൂര് തോട്ടിലേക്കാണ് കാര് ഒഴുകി പോയിരിക്കുന്നത്. 30 അടിയോളം താഴ്ചയുള്ള ഭാഗത്തേക്കാണ് കാര് ഒഴുകിയിരിക്കുന്നത് എന്നാണ് സംശയിക്കുന്നത്. ദേശീയ ദുരന്തനിവാരണ സേനയുടെ സംഘം തെരച്ചിലിനായി സ്ഥലത്ത് എത്തിയിട്ടുണ്ട്.
മിനച്ചിലാറ്റില് ജലനിരപ്പുയര്ന്നതിനെ തുടര്ന്ന് കോട്ടയം നഗരത്തില് വെള്ളം കയറി. വൈക്കം, ചങ്ങനാശേരി, കോട്ടയം താലൂക്കുകളില് സ്ഥിതി രൂക്ഷമാണ്. പേരൂര്, നീലിമംഗലം, നാഗമ്പടം മേഖലയില് വെള്ളം ഉയരുന്നു. കോട്ടയത്ത് കൂടുതല് ക്യാംപുകള് തുറക്കും. മീനച്ചിലാറിന്റെ കൈവഴിയിലാണു കുത്തൊഴുക്കുണ്ടായത്. നഗരസഭാ മേഖലയില് നാഗമ്പടം, കാരാപ്പുഴ, ചുങ്കം, ഇല്ലിക്കല്, താഴത്തങ്ങാടി, പാറപ്പാടം, പുളിക്കമറ്റം, 15 ല് കടവ്, കല്ലുപുരയ്ക്കല്, പുളിനായ്ക്കല്, വേളൂര്തുടങ്ങിയ മേഖലകളില് വെള്ളം കയറിയ നിലയിലാണ്. പാറപ്പാടം ക്ഷേത്രം വെള്ളത്തില് മുങ്ങി. അയ്മനം, മണര്കാട്, അയര്ക്കുന്നം പ്രദേശങ്ങള് വെള്ളത്തിലാണ്. പുളിഞ്ചുവട്, ഗൂര്ഖ്ണ്ഡസാരി, മഹാത്മാ കോളനിഭാഗം, പേരൂര്, പുന്നത്തുറ, മാടപ്പാട് മേഖലയിലും വെള്ളപ്പൊക്കം. പാറേക്കടവ്, പായിക്കാട്, ചാമേലിക്കൂഴി, പുളിമൂട്, ഖാദിപ്പടി, വെച്ചൂര്ക്കവല, പൂവത്തുംമൂട്, അരയിരം, കിണറ്റിന്മൂട്, പുന്നത്തുറ, കമ്പനിക്കടവ്, താഴത്തുകുടി, കക്കയം, പീച്ചുകുഴി എന്നിവിടങ്ങളിലെ 20 വീടുകളില് വെള്ളം കയറി. കക്കയം കിരാതമൂര്ത്തി ക്ഷേത്രത്തിലെ നാലമ്പലത്തിനുള്ളില് ഉള്പ്പെടെ വെള്ളം കയറി. തിരുവാര്പ്പ് പഞ്ചായത്തിലെ കുമ്മനം ചെങ്ങളം അയ്മനം പഞ്ചായത്തിന്റെ കല്ലുമട, വല്യാട് പുലിക്കുട്ടിശേരി, ആര്പ്പൂക്കര പഞ്ചായത്തിലെ പടിഞ്ഞാറന് മേഖല തുടങ്ങിയ പ്രദേശങ്ങള് വെള്ളത്തില്.
മൂന്നാം വര്ഷവും ചുങ്കം മേഖലയില് വെള്ളപ്പൊക്കമാണ്. ചുങ്കം പഴയ സെമിനാരി റോഡിലാണ് ആദ്യം വെള്ളം കയറി വാഹന ഗതാഗതം തടസ്സപ്പെട്ടത്. റോഡില് വള്ളമിറക്കിയാണ് ഇരുവശങ്ങളിലുമുള്ള വീട്ടുകാരെ ക്യാംപുകളില് എത്തിച്ചത്. തിരുവാര്പ്പ് പഞ്ചായത്തിലെ മാധവശേരി, താമരശേരി, അറുനൂറ്റിമംഗലം, അംബേദ്കര്, പാലത്തറ, പത്തില്, തൊണ്ടമ്പ്ര എന്നീ കോളനികളിലെ നൂറിലേറെ വീടുകളില് വെള്ളം കയറി. ചെങ്ങളം, കിളിരൂര്, മലരക്കില്, കാഞ്ഞിരം, കുമ്മനം, കളരിക്കല്, മണിയല, മറ്റത്തില് തുടങ്ങിയ പ്രദേശങ്ങളിലെ മുഴുവന് പുരയിടങ്ങളും വെള്ളത്തിലായി.
ഇടുക്കി ജില്ലയില് ഇന്നും റെഡ് അലേര്ട്ടാണ്. എന്നാല് രാവിലെ അതിതീവ്ര മഴയ്ക്ക് നേരിയ ശമനമുണ്ട്. മുല്ലപ്പെരിയാര് അണക്കെട്ടില് ജലനിരപ്പ് ഉയര്ന്നതോടെ പെരിയാര് തീരങ്ങളില് താമസിക്കുന്നവര്ക്ക് അധികൃതര് മുന്നറിയിപ്പ് നല്കി. പെരിയാറിലെ നീരൊഴുക്ക് ഇപ്പോഴും ഉയര്ന്നു നില്ക്കുകയാണ്. ഈ സമയം മുല്ലപ്പെരിയാര് സ്പില്വേയിലൂടെ പെരിയാറിലേക്ക് വെള്ളം തുറന്നുവിട്ടാല് അപകടമാകും. ആലപ്പുഴയില് മഴയ്ക്ക് നേരിയ ശമനമുണ്ടെങ്കിലും കിഴക്കന് വെള്ളത്തിന്റെ വരവ് കുട്ടനാട്ടില് ജലനിരപ്പ് ക്രമാതീതമായി ഉയര്ത്തുകയാണ്. താഴ്ന്ന പ്രദേശങ്ങളിലും വീടുകളിലും വെള്ളമെത്തിയതോടെ കുട്ടനാട് വെള്ളപ്പൊക്ക ഭീതിയിലാണ്. വെള്ളത്തിന്റെ വരവ് ശക്തമായി തുടര്ന്നാല് കഴിഞ്ഞവര്ഷത്തിന് സമാനമായ വെള്ളപ്പൊക്കം ഇത്തവണയുമുണ്ടായേക്കും.
https://www.facebook.com/Malayalivartha