ഇടുക്കി ജില്ലയിലെ ചിന്നക്കനാല്‍ പഞ്ചായത്ത് ഓഫീസിന് നേരെ ആക്രമണം . ഒരു സംഘം ആളുകള്‍ പഞ്ചായത്ത് ഓഫീസ് അടിച്ചു തകര്‍ത്തു . പഞ്ചായത്ത് അസിസ്റ്റന്റ് സെക്രട്ടറിയടക്കം അഞ്ചു സ്റ്റാഫുകള്‍ക്കു ആക്രമണത്തില്‍ പരുക്കേറ്റു .

സൂര്യനെല്ലി സ്വദേശി ഗോപി എന്ന കോണ്‍ട്രാക്ടറും സംഘവുമാണ് ആക്രമണത്തിനു പിന്നിലെന്നാണ് പഞ്ചായത്ത് അധികൃതര്‍ പറയുന്നത് . ചിന്നക്കനാല്‍ വില്ലേജ് ഓഫീസിനു സമീപം ഇയാള്‍ നിര്‍മിക്കുന്ന കെട്ടിടത്തിനു പഞ്ചായത്ത് സ്റ്റോപ്പ് മെമ്മൊ നല്‍കിയതിന്റെ വൈരാഗ്യമാണ് ആക്രമണത്തിന് പിന്നിലെ കാരണം.

സംഭവത്തില്‍ ശാന്തന്‍ പാറ പൊലീസ് കേസെടുത്ത് അന്വേഷണം ആരംഭിച്ചു . പരിക്കേറ്റവര്‍ അടിമാലി താലൂക്ക് ആശുപത്രിയില്‍ ചികിത്സയിലാണ്. അതേസമയം ആക്രമണവുമായി ബന്ധപ്പെട്ട് നാല് പേരെ പൊലീസ് അറസ്റ്റ് ചെയ്തു.

സ്വകാര്യ കരാറുകാരനായ ഗോപി എന്നറിയപ്പെടുന്ന രാജന്‍, ആന്റണി, മുത്തുകുമാര്‍, വിജയ് എന്നിവരാണ് അറസ്റ്റിയത്. അക്രമിസംഘത്തിലെ കൂടുതല്‍ പേരെ കണ്ടെത്താനുള്ള ശ്രമം തുടങ്ങി.