ബാഡ്മിന്റണ്‍ കളിക്കുന്നതിനിടെ മലയാളി പ്രവാസി കുഴഞ്ഞുവീണു മരിച്ചു. ദുബായിലെ പ്രമുഖ എഞ്ചിനീയറിങ് വ്യാവസായിക സേവന കമ്പനിയില്‍ ലോജിസ്റ്റിക്സ് ആന്‍ഡ് സപ്ലൈ ചെയിന്‍ ജനറല്‍ മാനേജരായ രഞ്ജിത്ത് വിജയന്‍ ആണ് ഹൃദയാഘാതത്തെ തുടര്‍ന്ന് അന്തരിച്ചത്. കഴിഞ്ഞ 26 വര്‍ഷമായി യു.എ.ഇയില്‍ പ്രവാസിയായ രഞ്ജിത്ത്, ശനിയാഴ്ച രാവിലെ ദുബായ് ലാന്‍ഡിലെ സ്‌കൂള്‍ ഇന്‍ഡോര്‍ കോര്‍ട്ടില്‍ വെച്ചാണ് അപകടത്തില്‍പ്പെട്ടത്. യു.എ.ഇയില്‍ ഈ വര്‍ഷം കായികവിനോദങ്ങളില്‍ ഏര്‍പ്പെടുന്നതിനിടെ റിപ്പോര്‍ട്ട് ചെയ്യപ്പെടുന്ന മൂന്നാമത്തെ കായിക പ്രേമിയായ പ്രവാസിയുടെ മരണമാണിത്.

കളി കഴിഞ്ഞ് മടങ്ങാന്‍ ഒരുങ്ങുന്നതിനിടെ രഞ്ജിത്തിന് ശ്വാസതടസ്സവും അസ്വസ്ഥതയും അനുഭവപ്പെടുകയായിരുന്നു. തുടര്‍ന്ന് നിമിഷങ്ങള്‍ക്കകം അദ്ദേഹം കോര്‍ട്ടില്‍ കുഴഞ്ഞുവീഴുകയായിരുന്നുവെന്ന് ഒപ്പമുണ്ടായിരുന്ന സഹപ്രവര്‍ത്തകര്‍ പറഞ്ഞു. പരിശീലനം ലഭിച്ച സഹപ്രവര്‍ത്തകരും സ്‌കൂളിലെ സുരക്ഷാ ജീവനക്കാരും ഉടന്‍ തന്നെ സി.പി.ആര്‍ നല്‍കുകയും അഞ്ചു മിനിറ്റിനുള്ളില്‍ ആംബുലന്‍സ് എത്തി ആശുപത്രിയിലെത്തിക്കുകയും ചെയ്തെങ്കിലും ജീവന്‍ രക്ഷിക്കാനായില്ല. ആശുപത്രിയിലെത്തിച്ചപ്പോഴേക്കും മരണം സംഭവിച്ചിരുന്നതായി ഡോക്ടര്‍മാര്‍ സ്ഥിരീകരിച്ചു.

പ്രഥമ മരണ വിവര റിപ്പോര്‍ട്ട് പ്രകാരം ഹൃദയാഘാതമാണ് മരണകാരണം.അളന്നുമുറിച്ച ജീവിതരീതിയും കൃത്യമായ ഭക്ഷണക്രമവും പാലിച്ചിരുന്ന വ്യക്തിയായിരുന്നു രഞ്ജിത്ത് എന്ന് സുഹൃത്തുക്കള്‍ ഓര്‍ത്തെടുക്കുന്നു. മുന്‍പ് ആരോഗ്യപ്രശ്നങ്ങളോ ഹൃദ്രോഗ ലക്ഷണങ്ങളോ ഒന്നും തന്നെ അദ്ദേഹത്തിനുണ്ടായിരുന്നില്ല. നാട്ടില്‍ പോകുമ്പോഴെല്ലാം കൃത്യമായ വൈദ്യപരിശോധനകള്‍ നടത്താറുണ്ടായിരുന്ന രഞ്ജിത്ത്, ദിനചര്യയുടെ ഭാഗമായി ജിം പരിശീലനവും ബാഡ്മിന്റണ്‍ കളിയും പതിവാക്കിയിരുന്നു. ഭാര്യ രശ്മിയും ഇന്ത്യയില്‍ ഉപരിപഠനം നടത്തുന്ന മകന്‍ ഋത്വിക്കും അടങ്ങുന്നതാണ് ഇദ്ദേഹത്തിന്റെ കുടുംബം.

മൃതദേഹം നാട്ടിലെത്തിക്കാനുള്ള നടപടിക്രമങ്ങള്‍ പുരോഗമിക്കുകയാണെന്ന് കമ്പനി ഭാരവാഹികള്‍ അറിയിച്ചു.യു.എ.ഇയിലെ മലയാളി സമൂഹത്തിനിടയില്‍ സമീപകാലത്തുണ്ടാകുന്ന ഹൃദയാഘാത മരണങ്ങള്‍ വലിയ ആശങ്കയ്ക്ക് വഴിവെച്ചിട്ടുണ്ട്.