പ്രമാദമായ സ്വര്‍ണക്കടത്തു കേസില്‍ അന്വേഷണ ഉദ്യോഗസ്ഥരുടെമേല്‍ കരിനിഴല്‍ ചാര്‍ത്തിയതാണ് സ്വപ്നയുടെ മൊഴി ചോര്‍ന്നത്. അന്വേഷണ ഉദ്യോഗസ്ഥന്‍ തന്നെ തീക്കട്ടയില്‍ ഉറുമ്പരിച്ചാല്‍ എന്തു ചെയ്യും. ചോര്‍ന്നതാകട്ടെ ബിജെപിയേയും കേന്ദ്ര സര്‍ക്കാരിനേയും സംശയ നിഴലില്‍ നിര്‍ത്തുന്ന ഭാഗങ്ങള്‍ മാത്രം. അപ്പോള്‍ അതിന് പിന്നില്‍ സഖാക്കളെ സന്തോഷിപ്പിക്കാന്‍ ശ്രമിക്കുന്ന ഉദ്യോഗസ്ഥനാണെന്ന് ബോധ്യമായി. ഇക്കാര്യം അമിത്ഷായുടെ ചെവില്‍ എത്തിയതോടെ ശക്തമായ അന്വേഷണത്തിനാണ് ഉത്തരവിട്ടത്. അന്വേഷണം കടുത്തതോടെ മറനീക്കി എല്ലാം പുറത്താകുകയാണ്.

സ്വപ്‌ന സുരേഷിന്റെ മൊഴിപ്പകര്‍പ്പ് ചോര്‍ത്തിയത് അന്വേഷണസംഘത്തിലുള്ള കസ്റ്റംസ് സൂപ്രണ്ടാണെന്ന് കേന്ദ്ര രഹസ്യാന്വേഷണ വിഭാഗം ഐ.ബി കണ്ടെത്തി. മൊഴിയുടെ പകര്‍പ്പ് മൊബൈലില്‍ ചിത്രീകരിച്ചശേഷം സൂപ്രണ്ട് ബ്ലൂടുത്തുവഴി ഭാര്യയുടെ മൊബൈലിലേക്ക് അയച്ചു. അവിടെ നിന്നാണ് മറ്റ് പലര്‍ക്കും അയച്ചതെന്നും വ്യക്തമായി. ജനം ടി.വി. കോഓര്‍ഡിനേറ്റിങ് എഡിറ്ററായിരുന്ന അനില്‍ നമ്പ്യാര്‍ക്കെതിരെ സ്വപ്ന പറഞ്ഞ ഭാഗങ്ങള്‍ മാത്രമാണ് മൊഴിയില്‍ നിന്നു ചോര്‍ന്നത്. ഇത് വിവാദമായതോടെ കസ്റ്റംസ് അസി.കമ്മിഷണര്‍ എന്‍.എസ്. ദേവിനെ അന്വേഷണ സംഘത്തില്‍ നിന്ന് ഒഴിവാക്കി. എന്നാല്‍ കുറ്റം ചെയ്തിട്ടില്ലെന്നും വിശദമായ അന്വേഷണം വേണമെന്നും ദേവ് ആവശ്യപ്പെട്ടു. അതോടെ കസ്റ്റംസ് പ്രിവന്റീവ് കമ്മിഷണര്‍ സുമിത്കുമാര്‍ ഐ.ബിയുടെ സഹായം തേടുകയായിരുന്നു. ഐ.ബിയുടെ റിപ്പോര്‍ട്ട് കമ്മിഷണര്‍ക്ക് കൈമാറി. സൂപ്രണ്ടിനെതിരെ എന്തു നടപടിയെടുക്കണമെന്ന് ഉന്നത ഉദ്യോഗസ്ഥരുമായി കമ്മിഷണര്‍ ആശയവിനിമയം നടത്തുകയാണ്. കടുത്ത നടപടിക്കാണ് സാദ്ധ്യത. കുറ്റക്കാരനായ ഉദ്യോഗസ്ഥന്‍ ഇടതുപാര്‍ട്ടികളുമായി അടുത്തബന്ധം പുലര്‍ത്തുന്നയാളാണ്.

അതേസമയം മൊബൈല്‍ ഫോണില്‍നിന്ന് ആര്‍ക്കൊക്കെയാണ് മൊഴിപ്പകര്‍പ്പ് അയച്ചുകൊടുത്തതെന്നും മൊഴി ചോര്‍ത്തി നല്‍കാന്‍ ആവശ്യപ്പെട്ടിരുന്നോയെന്നും അന്വേഷിക്കുന്നുണ്ട്. സംഭവത്തില്‍ കസ്റ്റംസ് ആഭ്യന്തര അന്വേഷണം നടത്തിയിരുന്നു. സമാന്തരമായി കേന്ദ്ര ഏജന്‍സിയും അന്വേഷണം തുടങ്ങിയിരുന്നെന്നാണു വിവരം.

മൊഴിച്ചോര്‍ച്ച വിവാദമായതിന്റെ തൊട്ടടുത്ത ദിവസമാണ് കസ്റ്റംസിന്റെ കോഴിക്കോട് പ്രിവന്റീവ് വിഭാഗത്തിന്റെ ചുമതലയുള്ള അസിസ്റ്റന്റ് കമ്മിഷണര്‍ എന്‍.എസ്. ദേവിനെ അന്വേഷണസംഘത്തില്‍നിന്നു പ്രവിന്റീവ് ഹെഡ് ക്വാര്‍ട്ടേഴ്‌സിലെ നിയമവിഭാഗത്തിലേക്കു മാറ്റിയത്. മൊഴിച്ചോര്‍ച്ചയുമായി ഈ ചുമതലാ മാറ്റത്തിന് ബന്ധമുണ്ടോയെന്ന് കസ്റ്റംസ് വ്യക്തമാക്കിയതുമില്ല.

സംഭവത്തില്‍ കേന്ദ്ര ഏജന്‍സി അന്വേഷണം ആവശ്യപ്പെട്ടിട്ടുണ്ടെന്ന് കസ്റ്റംസ് പ്രിവിന്റീവ് കമ്മിഷണര്‍ സുമിത് കുമാര്‍ സമ്മതിച്ചു. മൊഴിച്ചോര്‍ച്ചയില്‍ നടപടിയുണ്ടായില്ലെന്നും പ്രചരിക്കുന്നത് വ്യാജവിവരങ്ങളാണെന്നും അദ്ദേഹം പറഞ്ഞു.

മൊഴി ചോര്‍ത്തിയെന്ന് ആരോപണമുയര്‍ന്ന ഉദ്യോഗസ്ഥനും ഇത് നിഷേധിച്ചു. തനിക്കിതേക്കുറിച്ചൊന്നും അറിയില്ലെന്നും ചാനലുകളിലും ഓണ്‍ലൈന്‍ മാധ്യമങ്ങളിലും വാര്‍ത്തകള്‍ കണ്ടത് മാത്രമേ അറിയൂവെന്നും ഉദ്യോഗസ്ഥന്‍ പറഞ്ഞു.

സ്വപ്നയുടെ മൊഴി മുതിര്‍ന്ന ഉദ്യോഗസ്ഥനെ കാണിക്കാന്‍ ചോദ്യംചെയ്യുന്ന മുറിയില്‍നിന്ന് കൊടുത്തയച്ചതോടെയാണ് ചോര്‍ച്ച ആരംഭിച്ചത്. ഓരോ പേജുകളായാണ് കൊടുത്തയച്ചത്. ഇതിനിടയിലാണ് മൊബൈല്‍ ഫോണില്‍ ഇത് പകര്‍ത്തിയത്. ഇതാണ് പിന്നീട് ബ്‌ളൂടൂത്ത് ഉപയോഗിച്ച് പകര്‍പ്പ് ഒരു ഉദ്യോഗസ്ഥന്റെ ഭാര്യയുടെ ഫോണിലേക്കയച്ചത്. ഈ ഫോണില്‍ നിന്നാണ് മാധ്യമ പ്രവര്‍ത്തകര്‍ക്കടക്കം അയച്ചത്. ഇത് ഉന്നത ഉദ്യോഗസ്ഥരുടെ വാട്‌സാപ്പ് ഗ്രൂപ്പുകളില്‍ ചര്‍ച്ചയായി. ഇത് ബിജെപി ഏറ്റെടുത്തതോടെയാണ് അന്വേഷണം വരുന്നത്. അതോടെ കസ്റ്റംസ് ഉദ്യോഗസ്ഥന്റെ കാര്യം ഓക്കെയായി.