സംസ്ഥാനത്ത് ഇപ്പോള്‍ 40% പേരും കോവിഡ് പരിശോധന നടത്തുന്നത് സ്വന്തം ചെലവിലാണ്. സ്വകാര്യ ലാബുകളുടെ എണ്ണം വര്‍ധിച്ചതോടെയാണിത്. ദിവസവും നടക്കുന്ന 60,000-ത്തോളം പരിശോധനകളില്‍ 24,000 പരിശോധനകളും സ്വകാര്യ ലാബുകളിലാണ്. ഇവിടെ പരിശോധിക്കണമെങ്കില്‍ ചെലവ് ആളുകള്‍ വഹിക്കണം. ആശുപത്രികള്‍ 60% സ്വകാര്യ മേഖലയിലാണുള്ളത്.

സ്വകാര്യ ലാബുകളില്‍ ആന്റിജന്‍ (625 രൂപ), പിസിആര്‍ (2750 രൂപ) പരിശോധനകളാണുള്ളത്. സിബി നാറ്റ്, ട്രൂനാറ്റ് പരിശോധനകള്‍ക്കു 3000 രൂപ നല്‍കണം. പിസിആര്‍, ആന്റിജന്‍ പരിശോധനകളാണു കൂടുതല്‍. സ്വകാര്യ സ്ഥാപനങ്ങളില്‍ കോവിഡ് പരിശോധനയ്ക്കു പ്രത്യേക കുറിപ്പടിയുടെ ആവശ്യമില്ലെന്നു സര്‍ക്കാര്‍ ഉത്തരവുണ്ട്. എന്നാല്‍ ലാബുകളില്‍ എത്തുന്നവരോട് ഡോക്ടറെ കാണണമെന്ന് സ്വകാര്യ ആശുപത്രികള്‍ ആവശ്യപ്പെടാറുണ്ട്. അതിനുവേണ്ടി കണ്‍സല്‍റ്റിങ് ഫീസും നല്‍കണം.

ഇപ്പോള്‍ 23 സര്‍ക്കാര്‍ ലാബുകളിലും 16 സ്വകാര്യ ലാബുകളിലുമായി 25,000 പിസിആര്‍ പരിശോധന നടക്കുന്നുണ്ട്. കേരളത്തില്‍ രോഗമുക്തി നിരക്ക് കുറവാണെന്നു പറയാനാകില്ലെന്നു മന്ത്രി കെ.കെ. ശൈലജ. നെഗറ്റീവ് ആയാല്‍ മാത്രമേ ഇവിടെ ഡിസ്ചാര്‍ജ് ചെയ്യുന്നുള്ളൂ. കാര്യമായ ലക്ഷണങ്ങളില്ലെങ്കില്‍ നാലോ അഞ്ചോ ദിവസത്തിനകം ഡിസ്ചാര്‍ജ് ചെയ്യുന്ന രീതിയാണു മറ്റു പലയിടത്തും.

ഇപ്പോള്‍ 0.39% എന്ന മരണനിരക്ക് വര്‍ധിക്കാന്‍ സാധ്യതയുണ്ട്. സമരം നടത്തി ആള്‍ക്കൂട്ടമുണ്ടാക്കിയാല്‍ വ്യാപനം കൂടും. ആരോഗ്യ മേഖലയിലുളളവര്‍ ഈ ഘട്ടത്തില്‍ സമരം ചെയ്യരുത്. പ്രശ്‌നങ്ങള്‍ സര്‍ക്കാര്‍ അനുഭാവപൂര്‍വം പരിഗണിക്കുമെന്നും മന്ത്രി പറഞ്ഞു.