സ്വര്‍ണക്കള്ളക്കടത്തിലെ മുഖ്യകണ്ണി കാരാട്ട് ഫൈസലാണെന്ന് പുറത്തുവരികയും ഇയാള്‍ കസ്റ്റംസ് പിടിയിലാവുകയും ചെയ്തിരിക്കെ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍ വീണ്ടും കുരുക്കിലേക്ക്. 2017ല്‍ കോടിയേരി ബാലകൃഷ്ണന്‍ ജനജാഗ്രത യാത്ര കൊടുവള്ളി നഗരത്തിലൂടെ നയിച്ചുവരുമ്പോള്‍ ചാടിക്കയറിയ മിനി കൂപ്പര്‍ ഇതേ കാരാട്ട് ഫൈസലിന്‍േതായിരുന്നു. ഈ ഫൈസല്‍ കോടിയേരിയുടെ മക്കളുടെ കൂട്ടകച്ചവടക്കാരനും കോഴിക്കോട്ടെ ഇടതുകൗണ്‍സിലറുമാണെന്നിരിക്കെ കോടിയേരി ബാലകൃഷ്ണന്‍ ഒരിക്കല്‍ക്കൂടി നാറാന്‍പോവുകയാണ്.

പാവപ്പെട്ടവരുടെ പടത്തലവന്‍ ജനജാഗ്രതയാ യാത്ര കോഴിക്കോട്ടെത്തിയപ്പോള്‍ ആഡംബര കാറില്‍ അലങ്കാരത്തോടെ നീങ്ങിയ സംഭവം ഏറെ വിവാദം സൃഷ്ടിച്ചിരുന്നു. പാര്‍ട്ടി പ്രവര്‍ത്തകരൊരുക്കിയ തുറന്ന ജീപ്പ് ഉപേക്ഷിച്ച് ഈ കാറില്‍തന്നെ കോടിയേരി കയറിയതുവഴി പാര്‍ട്ടിക്കും പാവപ്പെട്ടവര്‍ക്കും കളങ്കം പറ്റിയെന്നും പാര്‍ട്ടി പറഞ്ഞപ്പോള്‍ കാര്‍ ആരുടേതാണെന്ന് നോക്കിയല്ല താന്‍ കയറിയതെന്നും, കൊടുവള്ളിയിലെ പ്രാദേശിക നേതൃത്വമാണ് കാര്യങ്ങള്‍ നോക്കി നടത്തിയതെന്നുമായിരുന്നു അന്ന് കോടിയേരിയുടെ നീതീകരണം. എന്നാല്‍ ജനജാഗ്രതാ യാത്രയുടെ പ്രധാന സ്‌പോണ്‍സര്‍ ഇതേ ഫൈസലായിരുന്നുവെന്ന് അക്കാലത്തു തന്നെ മുസ്ലീം ലീഗും കോ്ണ്‍ഗ്രസും ആരോപിച്ചപ്പോള്‍ സിപിഎം വായില്‍ നാക്കുണ്ടായിരുന്നില്ല.

കൊടുവള്ളിയിലെ പാവം സഖാക്കള്‍ ഒരുക്കിയ ശാപ്പാട് ഒഴിവാക്കി കോടിയേരി സഖാവ് ഫൈസലിന്റെ ഡിന്നറിലേക്ക് ഓടിയതിലും ലോക്കല്‍ സഖാക്കള്‍ക്ക് കലിപ്പുണ്ടായിരുന്നു. അക്കാലത്തും ഫൈസല്‍ സ്വര്‍ണക്കള്ളക്കടത്തുകാരനായിരുന്നവെന്ന് ബിജെപി നേതാവ് കെ സുരേന്ദ്രന്‍ വിളിച്ചുപറഞ്ഞപ്പോള്‍ പാര്‍ട്ടി ഫൈസലിന് ക്ലീന്‍ ചിട്ട് കൊടുക്കുകയായിരുന്നു.

കാരാട്ട് ഫൈസലിന്റെ ഉടമസ്ഥതയിലുള്ള പിവൈ 01 സികെ 3000 എന്ന മിനി കൂപ്പറിലായിരുന്നു കോടിയേരിയുടെ യാത്ര. എന്നാല്‍ ഈ കൂപ്പറിന്റെ രജിസ്‌ട്രേഷന്‍ വ്യാജമാണെന്ന് ആ വിവാദത്തില്‍ പുറത്തുവന്നപ്പോഴും കോടിയേരി മൗനം പാലിക്കുകയായിരുന്നു. പോണ്ടിച്ചേരി രജിസ്‌ട്രേഷനില്‍ മാരിയമ്മന്‍ കോവിലില്‍ പാര്‍ക്കുന്ന ശിവകുമാര്‍ എന്നയാളുടെ പേരിലായിരുന്നു കൂപ്പറിന്റെ രജിസ്‌ട്രേഷനെന്നു കണ്ടെത്തിയശേഷവും പാര്‍ട്ടി മൗനം പാലിച്ചു. കൂപ്പര്‍ പോണ്ടിച്ചേരിയില്‍ രജിസ്റ്റര്‍ ചെയ്ത വകയില്‍തന്നെ എട്ടു ലക്ഷം രൂപയുടെ തട്ടിപ്പുനടന്നതായും കണ്ടെത്തിയിരുന്നു.