കേരളത്തില്‍ പരീഷ എഴുതാത്തവര്‍ ജയിച്ച പോലെ ജമ്മുവില്‍ സ്‌കൂള്‍ വരാന്ത കാണാത്ത പശുവിനും ഹാള്‍ടിക്കറ്റ് ലഭിച്ചു. തുടര്‍ന്ന് പശു പരീക്ഷ എഴുതാന്‍ വരുന്നതും കാത്ത് മാധ്യമ പ്രവര്‍ത്തകരുടെ ക്യൂവായിരുന്നു. പ്രൊഫഷണല്‍ കോഴ്‌സിന് ചേരാനുള്ള എന്‍ട്രന്‍സ് പരീക്ഷയ്ക്കുള്ള അഡ്മിറ്റ് കാര്‍ഡാണ് പശുവിന് ലഭിച്ചത്.
പശുവിന്റെ പേരില്‍ പരീക്ഷയ്ക്ക് അപേക്ഷ അയച്ചത് ബുഡ്ഗാം സ്വദേശിയായ അബ്ദുള്‍ റഷീദ് ഭട്ട് ആയിരുന്നു. പരീക്ഷാ സംവിധാനങ്ങളിലെ പാളിച്ചകള്‍ അധികൃതര്‍ക്ക് മനസിലാക്കി കൊടുക്കാന്‍ വേണ്ടിയാണ് താന്‍ തന്റെ പശുവിന്റെ പേരില്‍ അപേക്ഷ നല്‍കിയതെന്ന് ഭട്ട് പറഞ്ഞു. താന്‍ പശുവുമായി പരീക്ഷയ്ക്ക് പോയിരുന്നെങ്കില്‍ തനിക്കും മൃഗത്തിനും യാതൊരു വ്യത്യാസവും ഉണ്ടാവില്ലെന്നും താനും ഇരുകാലുള്ള മൃഗമായേനേമെന്നും ഭട്ട് വ്യക്തമാക്കി.
പലപ്പോഴും അഡ്മിഷനുകളെല്ലാം നേരത്തെ നടത്തിയ ശേഷം ഒരു വഴിപാട് പോലെയാണ് പരീക്ഷകള്‍ നടത്തുന്നതെന്നാണ് പൊതുവേയുള്ള ധാരണ. എന്നാല്‍ സ്ഥിതിഗതികള്‍ മാറുകയും അര്‍ഹരായ വിദ്യാര്‍ത്ഥികള്‍ക്ക് പ്രൊഫഷണല്‍ കോളേജുകളില്‍ അഡ്മിഷന്‍ ലഭിക്കുകയും ചെയ്യണമെന്നാണ് താന്‍ ആഗ്രഹിക്കുന്നത്. തനിക്ക് നിലവിലുള്ള സംവിധാനത്തെ അപമാനിക്കണമെന്നില്ലായിരുന്നെന്നും ഭട്ട് കൂട്ടിച്ചേര്‍ത്തു.
ജമ്മു കാശ്മീര്‍ ബോര്‍ഡ് ഓഫ് പ്രൊഫഷണഷല്‍ എന്‍ട്രന്‍സ് എക്‌സാമിനിഷേന്‍സാണ് തവിട്ട് പശുവിന് പോളിടെക്‌നിക് ഡിപ്ലോമ കോഴ്‌സിലേക്ക് നടന്ന എന്‍ട്രന്‍സ് പരീക്ഷയ്ക്കുള്ള അഡ്മിറ്റ് കാര്‍ഡ് അനുവദിച്ചത്. പശുവിന്റെ ചിത്രം സഹിതമുള്ള അഡ്മിറ്റ് കാര്‍ഡില്‍ അപേക്ഷാര്‍ത്ഥി ഗുര്‍ ദന്തിന്റെ (കാള) മകളാണെന്നാണ് പറഞ്ഞിരുന്നത്.
നാഷണല്‍ കോണ്‍ഫറന്‍സ് വക്താവ് ജുനൈദ് അസീം മറ്റു അഡ്മിറ്റ് കാര്‍ഡിന്റെ ചിത്രം ട്വീറ്റ് ചെയ്തതോടെയാണ് സംഭവം പുറത്തറിയുന്നത്. ഇതോടെ പരീക്ഷാ ബോര്‍ഡിനെ കളിയാക്കിക്കൊണ്ട് നിരവധി ട്വീറ്റുകള്‍ ട്വിറ്ററില്‍ പ്രത്യക്ഷപ്പെട്ടിരുന്നു.
പരീക്ഷയ്ക്കുള്ള കാര്‍ഡുകള്‍ കമ്പ്യൂട്ടര്‍ സോഫ്റ്റ്‌വെയറുകള്‍ വഴിയാണ് തയ്യാറാക്കുന്നതെന്ന് ബോര്‍ഡിലെ കണ്‍ട്രോളര്‍ ഓഫ് എക്‌സാമിനേഷന്‍ ഫറൂഖ് അഹ്മദ് മിര്‍ പറഞ്ഞിരുന്നു. ഈ സോഫ്റ്റ്‌വെയറിന് മനുഷ്യന്റേയും മൃഗങ്ങളുടേയും മുഖം തമ്മിലുള്ള വ്യത്യാസം അറിയില്ലെന്നും അങ്ങനെയാണ് ഇത്തരത്തിലൊരു സംഭവം ഉണ്ടായതെന്നുമാണ് അദ്ദേഹം പറഞ്ഞത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha