ഇന്നലെ വൈകുന്നേരം നാലരയോടെ പമ്പാ നദിയില്‍ വടശേരിക്കര മാടമണ്ണില്‍, പമ്പാനദിയില്‍ ഒഴുക്കില്‍പെട്ടു കാണാതായ മധ്യവയസ്‌കനെ തെരയുന്നതിനിടയില്‍ തടയണയില്‍ തട്ടി ഡിങ്കി മറിഞ്ഞ് ഫയര്‍മാന്‍ മുങ്ങി മരിച്ചു. പത്തനംതിട്ട ഫയര്‍ സ്റ്റേഷന്‍ ജീവനക്കാരനായ തിരുവനന്തപുരം ഒറ്റശേഖരമംഗലം ശരത് ഭവനില്‍ ശരത് കുമാര്‍ (30) ആണ് മരിച്ചത്. ഇദ്ദേഹത്തോടൊപ്പം ഒഴുക്കില്‍പെട്ട നാലു ഫയര്‍ ജീവനക്കാരെ സഹപ്രവര്‍ത്തകരും നാട്ടുകാരും ചേര്‍ന്ന് രക്ഷപെടുത്തി.

തടയണക്കു തൊട്ടുമുകളില്‍ മാടമണ്‍ കണ്‍വന്‍ഷന്‍ നഗറിനു സമീപം ഇന്നലെ പകല്‍ പതിനൊന്നോടെ കുളിക്കാനിറങ്ങിയ മാടമണ്‍ ചൂരപ്ലാക്കല്‍ ശിവനെ(55) ഒഴുക്കില്‍പെട്ടു കാണാതായിരുന്നു. ഇദ്ദേഹത്തെ തെരയാനെത്തിയ സംഘത്തിലെ ഫയര്‍മാനായിരുന്നു മരിച്ച ശരത്കുമാര്‍. പത്തനംതിട്ട ഫയര്‍ സ്റ്റേഷനില്‍ നിന്നുള്ള ആറു ജീവനക്കാര്‍ രണ്ടു ഡിങ്കികളുടെ സഹായത്തോടെ ഇന്നലെ നദിയില്‍ കിലോമീറ്ററുകളോളം തെരച്ചില്‍ നടത്തിയിട്ടും ശിവനെ കണ്ടെത്താനായില്ല.

തടയണയുടെ സമീപത്തേക്ക് നദിയുടെ താഴ് ഭാഗത്തു നിന്നും വൈകുന്നേരം ഡിങ്കിയില്‍ എത്തുമ്പോഴാണ് ശക്തമായ കുത്തൊഴുക്കില്‍ പെട്ട് മറിഞ്ഞത്. അഞ്ചു പേരാണ് അപ്പോള്‍ ഡിങ്കിയിലുണ്ടായിരുന്നത്. ഒഴുക്കില്‍ പെട്ടെങ്കിലും രണ്ടു പേര്‍ക്ക് ഡിങ്കിയില്‍ പിടി കിട്ടി. കുത്തൊഴുക്കിലകപ്പെട്ട ശരത് അടക്കമുള്ളവരെ സഹപ്രവര്‍ത്തകരും നാട്ടുകാരും ചേര്‍ന്ന് കയറും മറ്റും ഇട്ട് രക്ഷിക്കാന്‍ ശ്രമിച്ചെങ്കിലും ശരത് മുങ്ങി താഴുകയായിരുന്നു. അപകടം ഉണ്ടായി പത്തു മിനിറ്റിനുള്ളില്‍ ഇദ്ദേഹത്തെ നദിയില്‍ അമ്പതു മീറ്റര്‍ താഴെ മണല്‍പ്പരപ്പിനു സമീപം കണ്ടെത്തി. ഉടന്‍ തന്നെ ആശുപത്രിയിലേക്കു കൊണ്ടു പോയെങ്കിലും മരണം സ്ഥിരീകരിച്ചു.

ഒഴുക്കില്‍പെട്ട് കാണാതായ ശിവന്‍ അവിവാഹിതനാണ്. നേരത്തെ മാടമണ്‍ വള്ളക്കടവില്‍ താല്‍ക്കാലിക കടത്തുകാരനായി ജോലി നോക്കിയിരുന്നു. സഹോദരി രാധയോടൊപ്പമായിരുന്നു താമസം. ഫയര്‍മാന്റെ മരണത്തെ തുടര്‍ന്ന് ഇന്നലെ ശിവനു വേണ്ടിയുള്ള തെരച്ചില്‍ അവസാനിപ്പിച്ചു. ഇന്ന് വീണ്ടും തുടരും.

2015-ല്‍ ഫയര്‍ഫോഴ്സില്‍ നിയമനം ലഭിച്ചത് മുതല്‍ ശരത് പത്തനംതിട്ട യൂണിറ്റില്‍ ജോലി ചെയ്തു വരികയായിരുന്നു. സ്‌കൂബാ ടീമില്‍ അംഗമായ ശരത് വെള്ളത്തില്‍ വീണ നിരവധി ആളുകളെ രക്ഷപെടുത്തിയിട്ടുണ്ട്. അഖിലയാണ് ശരത്തിന്റെ ഭാര്യ. മൂന്ന് വയസുളള മകനുണ്ട്.