കായലില്‍ ചാടിയ യുവതിയും പിഞ്ചുകുഞ്ഞും മരിച്ചു. കുടുംബ വഴക്ക് പതിവായിരുന്നു. പെരിനാട് ഇടവട്ടം രമാഭവനില്‍ യശോധരന്‍പിള്ളയുടെ മകള്‍ രാഖി (22), ഏകമകന്‍ ആദി (2) എന്നിവരാണ് മരിച്ചത്. സ്വകാര്യബസ് കണ്ടക്ടറായ വെള്ളിമണ്‍ ചെറുമൂട് സ്വദേശി സിജുവാണ് രാഖിയുടെ ഭര്‍ത്താവ്. നാലുവര്‍ഷം മുന്‍പായിരുന്നു വിവാഹം. വെള്ളിമണ്‍ തോട്ടുംകരയില്‍ വീടുവാങ്ങി താമസിക്കുകയായിരുന്നു. മദ്യപാനിയായ സിജു നിരന്തരം ഉപദ്രവിച്ചിരുന്നു.

ശനിയാഴ്ച രാഖിയെ കെട്ടിയിട്ട് തല്ലി. ഞായറാഴ്ച രാവിലെ മദ്യപിച്ചെത്തി വീണ്ടും മര്‍ദ്ദിച്ചു. കുഞ്ഞുമായി വീടുവിട്ടിറങ്ങിയ രാഖി വെള്ളിമണ്‍ ജയന്തി കോളനിക്ക് സമീപത്തെ കായലില്‍ ചാടി എന്നാണ് സൂചന. അവിടെ ചൂണ്ടയിട്ടുകൊണ്ടിരുന്ന കുട്ടികളോട് കാറ്റുകൊള്ളാന്‍ വന്നതാണെന്ന് രാഖി പറഞ്ഞിരുന്നു.

കുട്ടികള്‍ പോയശേഷമാണ് കായലില്‍ ചാടിയത്. ഇവരെ കാണാനില്ലെന്ന് സിജു രാഖിയുടെ അമ്മയെ ഫോണില്‍ അറിയിച്ചു. ഇതറിഞ്ഞ് എത്തിയ രാഖിയുടെ അച്ഛനെയും മര്‍ദ്ദിച്ചു. തുടര്‍ന്ന് രാഖിയെ കാണാനില്ലെന്ന് കുണ്ടറ പൊലീസില്‍ പരാതി നല്‍കി. വെള്ളിമണ്‍ കൈതകോടി ഭാഗത്ത് ചെരുപ്പും കുഞ്ഞിന്റെ തൊപ്പിയും കണ്ടെത്തി.

യുവതിയുടെ മൃതദേഹം രാവിലെ 9 ഓടെ കൈതകോടി ഭാഗത്തുനിന്നും കുഞ്ഞിന്റെ മൃതദേഹം പതിനൊന്നോടെ കുറച്ചകലെ നിന്നുമാണ് പൊലീസും ഫയര്‍ ഫോഴ്‌സും കണ്ടെത്തിയത്. ഒളിവില്‍ പോയ സിജുവിനായി തെരച്ചില്‍ ആരംഭിച്ചു. മൃതദേഹം കൊവിഡ് പരിശോധനയ്ക്കും പോസ്റ്റ്‌മോര്‍ട്ടത്തിനുമായി കൊല്ലം ജില്ലാ ആശുപത്രി മോര്‍ച്ചറിയിലേക്ക് മാറ്റി.