തലശ്ശേരി നഗരസഭയിലെ മമ്പള്ളിക്കുന്ന് വാര്‍ഡിലെ കോണ്‍ഗ്രസ് സ്ഥാനാര്‍ഥി പത്രിക പിന്‍വലിച്ചതോടെ കണ്ണൂര്‍ ജില്ലയില്‍ ഒരു വാര്‍ഡില്‍ കൂടി സിപിഎമ്മിന് ഏകപക്ഷീയ വിജയം.

കോണ്‍ഗ്രസ് സ്ഥാനാര്‍ഥിയുടെ പത്രികയില്‍ നാമനിര്‍ദേശകന്റെ ഒപ്പ് വ്യാജമാണെന്ന പരാതി വന്നതോടെയാണ് കോണ്‍ഗ്രസ് സ്ഥാനാര്‍ഥി പത്രിക പിന്‍വലിച്ചത്.

സിപിഎമ്മിന്റെ ഭീഷണിക്ക് വഴങ്ങിയാണ് നാമനിര്‍ദേശകനായ കോണ്‍ഗ്രസ് അനുഭാവി പരാതി നല്‍കിയതെന്ന് കോണ്‍ഗ്രസ് ആരോപിച്ചു.

സിപിഎം കോട്ടയായി കണക്കാക്കുന്ന മമ്പള്ളിക്കുന്നില്‍ കഴിഞ്ഞ തവണ സിപിഎം 671, കോണ്‍ഗ്രസ് 96, ബിജെപി 65 എന്നതായിരുന്നു വോട്ടുനില. ഇത്തവണ ബിജെപിക്കു സ്ഥാനാര്‍ഥിയില്ല. ഇതോടെ എല്‍ഡിഎഫ് സ്ഥാനാര്‍ഥികള്‍ എതിരില്ലാതെ വിജയിച്ച വാര്‍ഡുകളുടെ എണ്ണം 16 ആയി.