വെനസ്വേലയില്‍ ഭൂകമ്പത്തിനു നിമിഷങ്ങള്‍ക്കു മുന്‍പ് ആന്‍ഡ്രോയ്ഡ് ഫോണുകളില്‍ മുന്നറിയിപ്പ് ലഭിച്ചെന്ന് റിപ്പോര്‍ട്ട്. ഗൂഗിളിന്റെ ആന്‍ഡ്രോയ്ഡ് എര്‍ത്‌ക്വേക്ക് അലര്‍ട്ട് സിസ്റ്റമാണ് ഭൂചലനത്തിന്റെ ആദ്യ ലക്ഷണങ്ങള്‍ കണ്ടെത്തി മുന്നറിയിപ്പു നല്‍കിയത്. നേരിയ ഭൂചലനം പോലും തിരിച്ചറിയാന്‍ ശേഷിയുള്ള സെന്‍സറുകളോടു കൂടിയ ആന്‍ഡ്രോയ്ഡ് സ്മാര്‍ട് ഫോണുകളിലാണ് ഈ സാങ്കേതികവിദ്യ. ഇതിലൂടെ ലഭിക്കുന്നത് ഏതാനും സെക്കന്‍ഡുകള്‍ മുന്‍പുള്ള മുന്നറിയിപ്പു മാത്രമാണ്. സ്മാര്‍ട്‌ഫോണ്‍ സാങ്കേതികവിദ്യ പ്രകൃതിദുരന്തങ്ങളിലെ രക്ഷയ്ക്ക് ഭാവിയില്‍ എങ്ങനെ സഹായകമാകുമെന്നതിനുള്ള ഉദാഹരണമായിട്ടാണ് ഈ സംഭവത്തെ വിദഗ്ധര്‍ കണക്കാക്കുന്നത്.

വെനസ്വേലയില്‍ ഭൂകമ്പത്തില്‍ 235 പേരാണ് മരിച്ചത്. 4300 പേര്‍ക്കു പരുക്കേറ്റു. വെനസ്വേലയില്‍ ഭൂകമ്പം ഉണ്ടാകുന്നതിന് തൊട്ടുമുന്‍പ് തങ്ങളുടെ 'ആന്‍ഡ്രോയിഡ് എര്‍ത്ത്‌ക്വേക്ക് അലര്‍ട്ട് സിസ്റ്റം ഭൂചലനം കണ്ടെത്തുകയും ഉപയോക്താക്കള്‍ക്ക് മുന്നറിയിപ്പ് സന്ദേശങ്ങള്‍ അയയ്ക്കുകയും ചെയ്തതായി ഗൂഗിള്‍ ഉദ്യോഗസ്ഥന്‍ ഹിന്ദുസ്ഥാന്‍ ടൈംസിനോട് പറഞ്ഞു. എത്ര ഉപയോക്താക്കള്‍ക്ക് ഈ മുന്നറിയിപ്പ് ലഭിച്ചെന്ന് അദ്ദേഹം വ്യക്തമാക്കിയില്ല. ഭൂരിഭാഗം ആന്‍ഡ്രോയിഡ് ഫോണുകളിലുമുള്ള ഈ സംവിധാനം 2020 മുതല്‍ വിവിധ രാജ്യങ്ങളില്‍ ഭൂകമ്പങ്ങള്‍ കണ്ടെത്താനും മുന്നറിയിപ്പ് നല്‍കാനും ഉപയോഗിച്ചുവരുന്നുണ്ട്. ഭൂകമ്പം കണ്ടെത്താന്‍ ആന്‍ഡ്രോയിഡ് പ്രധാനമായും രണ്ട് രീതികളെയാണ് ആശ്രയിക്കുന്നത്. അമേരിക്കയില്‍, ഗൂഗിള്‍ യുഎസ് 'ഷേക്ക്അലര്‍ട്ട്' സംവിധാനവുമായി സഹകരിച്ചാണ് പ്രവര്‍ത്തിക്കുന്നത്. 1,675 ഗ്രൗണ്ട് സെന്‍സറുകളുടെ ശൃംഖല ഉപയോഗിച്ച് ഭൂകമ്പത്തിന്റെ സ്ഥാനവും തീവ്രതയും നിര്‍ണയിക്കുകയും സിഗ്‌നല്‍ ആന്‍ഡ്രോയിഡിലേക്ക് കൈമാറുകയും ചെയ്യും.

എല്ലാ ആധുനിക സ്മാര്‍ട് ഫോണുകളിലും വൈബ്രേഷനുകള്‍ തിരിച്ചറിയാന്‍ കഴിയുന്ന 'ആക്‌സിലറോമീറ്റര്‍' എന്ന ചെറിയ സെന്‍സറുണ്ട്. ഒരു ഫോണ്‍ ഭൂകമ്പത്തിന് സമാനമായ ചലനം രേഖപ്പെടുത്തിയാല്‍, ആ ഫോണിന്റെ ഏകദേശ ലൊക്കേഷന്‍ സഹിതം ഗൂഗിളിന്റെ ഡിറ്റക്ഷന്‍ സെര്‍വറിലേക്ക് സിഗ്‌നല്‍ അയയ്ക്കപ്പെടും. ഇത്തരത്തില്‍ ലോകമെമ്പാടുമുള്ള ദശലക്ഷക്കണക്കിന് ആന്‍ഡ്രോയിഡ് ഫോണുകളില്‍ നിന്നുള്ള വിവരങ്ങള്‍ സെര്‍വര്‍ ഒത്തുനോക്കി ഭൂകമ്പം നടക്കുന്നുണ്ടെന്ന് സ്ഥിരീകരിക്കും. രണ്ട് തരത്തിലുള്ള അലര്‍ട്ടുകളാണ് നല്‍കുന്നത്. തീവ്രത കുറഞ്ഞതിനു നോട്ടിഫിക്കേഷന്‍ മാത്രം. തീവ്രത കൂടിയതിനു വലിയ ശബ്ദത്തോടെയുള്ള മുന്നറിയിപ്പും. 4.5, അല്ലെങ്കില്‍ അതിനു മുകളിലേക്ക് തീവ്രതയുള്ള ഭൂകമ്പങ്ങള്‍ക്ക് മാത്രമാണ് ഈ രണ്ട് തരം അലര്‍ട്ടുകളും അയയ്ക്കുന്നത്. അലര്‍ട്ടുകളില്‍ തൊട്ടാല്‍ ഭൂകമ്പത്തില്‍ നിന്നു സ്വയം രക്ഷപ്പെടാനുള്ള മുന്‍കരുതലുകളും ഭൂകമ്പത്തിന്റെ തീവ്രതയും സ്ഥാനവും കാണിക്കുന്ന മാപ്പും ലഭ്യമാകും.