പാലക്കാട് ജില്ലയില്‍ വടക്കഞ്ചേരി പുതുക്കോട് പാട്ടോലയ്ക്കു സമീപം റബര്‍ തോട്ടത്തില്‍ യുവാവിനെ മരിച്ചനിലയില്‍ കണ്ടെത്തിയ സംഭവത്തില്‍ 3 പേരെ പൊലീസ് കസ്റ്റഡിയിലെടുത്തു.

അപ്പക്കാട് യാക്കൂബിന്റെ മകന്‍ അജ്മലിനെയാണ് (21) കഴിഞ്ഞ വെള്ളിയാഴ്ച പുതുക്കോട് പാട്ടോലയ്ക്കു സമീപം റബര്‍ തോട്ടത്തില്‍ മരിച്ചനിലയില്‍ കണ്ടെത്തിയത്. യുവാവിന്റെ മരണം ഷോക്കേറ്റാണെന്നും മൃതദേഹം വാഹനത്തില്‍ കൊണ്ടുപോയി 2 കിലോമീറ്റര്‍ അകലെ ഉപേക്ഷിച്ചതാണെന്നും പൊലീസ്.

മരണത്തില്‍ ദുരൂഹതയുണ്ടെന്ന പരാതിയെത്തുടര്‍ന്ന് അന്വേഷണം ശക്തമാക്കിയിരുന്നു. വ്യാഴാഴ്ച രാത്രി പത്തോടെയാണ് യുവാവിനെ കാണാതായത്. വെള്ളിയാഴ്ച വൈകിട്ടു മൂന്നോടെ മൃതദേഹം കണ്ടെത്തി. വിരലടയാള വിദഗ്ധരും ഡോഗ് സ്‌ക്വാഡും പരിശോധന നടത്തിയിരുന്നു.

മരണം ഷോക്കേറ്റാണെന്ന് തെളിഞ്ഞത് തൃശൂര്‍ മെഡിക്കല്‍ കോളജ് ആശുപത്രിയില്‍ നടത്തിയ പോസ്റ്റ്‌മോര്‍ട്ടത്തിലാണ്. യുവാവിന്റെ കാലില്‍ പൊള്ളലേറ്റ പാടുണ്ടായിരുന്നു. പൊലീസ് നടത്തിയ തിരച്ചിലില്‍ 2 കിലോമീറ്റര്‍ അകലെ ചെറുകാഞ്ഞിരക്കോട്ട് കാട്ടുപന്നിയെ ഷോക്കേല്‍പ്പിക്കാന്‍ വച്ച കമ്പിയും കുടുക്കും കണ്ടെത്തി.

അജ്മല്‍ മരിച്ചുകിടക്കുന്നത് കെണിവച്ചവര്‍ കണ്ടതിനെത്തുടര്‍ന്ന് മൃതദേഹം 2 കിലോമീറ്റര്‍ അകലെയുള്ള റബര്‍ തോട്ടത്തില്‍ കൊണ്ടുപോയി ഇടുകയായിരുന്നെന്നാണ് വിവരം. സംഭവത്തില്‍ കൂടുതല്‍ പ്രതികള്‍ ഉള്‍പ്പെട്ടിട്ടുണ്ടെന്ന് സൂചനയുണ്ട്.