കേന്ദ്ര ഏജന്‍സികളുടെ അന്വേഷണത്തിനെതിരെ ആഞ്ഞടിച്ച്‌ സിപിഎം സംസ്ഥാന സെക്രട്ടറി എ.വിജയരാഘവന്‍ രംഗത്ത് . കേന്ദ്ര അന്വേഷണ ഏജന്‍സികള്‍ മുഖ്യമന്ത്രി പിണറായി വിജയനെ ആണ് ലക്ഷ്യമിടുന്നത്. രാഷ്ട്രീയ ലക്ഷ്യമാണ് ഏജന്‍സികള്‍ക്ക് ഉള്ളതെന്നും ഇതിനെ രാഷ്ട്രീയമായി നേരിടുമെന്നും അദ്ദേഹം ആഞ്ഞടിച്ചു. സ്വര്‍ണക്കടത്ത് കേസില്‍ കേന്ദ്ര ഏജന്‍സികളുടെ അന്വേഷണം ആവശ്യപ്പെട്ടത് പിണറായി വിജയനെ നിഷ്‌കളങ്കത കൊണ്ടാണെന്ന് എ. വിജയരാഘവന്‍ വ്യക്തമാക്കി . സത്യം പുറത്തുവരണം എന്ന് ആഗ്രഹമായിരുന്നു മുഖ്യമന്ത്രിക്കെന്നും അദ്ദേഹം പറഞ്ഞു.

ബാങ്കുകൾ തുടങ്ങാൻ കുത്തകകൾക്ക്‌ അനുവാദം നൽകുന്ന നിയമ ഭേദഗതികൂടി പാസാക്കി,‌ പ്രധാനമന്ത്രി നരേന്ദ്ര മോഡി ദുരിതകാലത്തെ ആഘോഷിക്കുകയാണെന്ന്‌‌ നേരത്തെ വിജയരാഘവൻ പറഞ്ഞു. ഇതുവഴി രാജ്യത്തിന്റെ സമ്പത്ത്‌ വീതിച്ചെടുക്കാൻ അംബാനിമാർക്കും അദാനിമാർക്കും അവസരം നൽകുകയാണ്‌. . ഇന്ത്യൻ പാർലമെന്ററി ചരിത്രത്തിലെ ഏറ്റവും കറുത്ത അധ്യായമാണ്‌ തൊഴിലാളികൾക്കും കർഷകർക്കും എതിരായ ആറു കരിനിയമം നിശബ്ദരാക്കപ്പെട്ട പാർലമെന്റിൽ പാസാക്കിയത്‌. പാർലമെന്റിനെ നിശബ്ദമാക്കിയാലും തെരുവുകൾ നിശബ്ദമാകില്ലെന്ന്‌ മോഡി കാണാൻപോകുന്ന നാളുകളാണ്‌ വരുന്നത്‌. രാഷ്ട്രീയമായി ബിജെപി ഇന്നുവരെ എടുത്തവയിൽ ഏറ്റവും തിരിച്ചടിയുണ്ടാകാൻ പോകുന്ന തീരുമാനമാണ്‌ കർഷക–-തൊഴിലാളി വിരുദ്ധ നിയമങ്ങൾ.കർഷകന്റെ താൽപ്പര്യത്തെ അവഗണിച്ച ഒരു സർക്കാരിനും അധികകാലം തുടരാനായിട്ടില്ല എന്നതാണ്‌ അനുഭവമെന്നും അദ്ദേഹം വ്യക്തമാക്കി.