മന്ത്രി കടകംപള്ളി സുരേന്ദ്രന്‍ വീണ്ടും നിയമകുരുക്കില്‍.അദ്ദേഹത്തിന്റെ ഭാര്യ ഗുരൂവായൂര്‍ ക്ഷേത്രത്തില്‍ കോവിഡ് വിലക്കിനിടയില്‍ ദര്‍ശനം നടത്തിയതിനെതിരെ ഹൈക്കോടതി നടപടി നിര്‍ദ്ദേശിച്ചേക്കും. ദേവസ്വം അഡ്മിനിസ്ട്രറ്റര്‍ നല്‍കിയ റിപ്പോര്‍ട്ടില്‍ ഹൈക്കോടതി നടപടിയെടുത്തില്ലെങ്കില്‍ ഹൈക്കോടതിയില്‍ അതിശക്തമായി മുന്നോട്ടുപോകാന്‍ ബി ജെ പി ശ്രമിക്കും. ഇനിയറിയേണ്ടത് അഡ്മിനിസ്‌ട്രേറ്റര്‍ തെറിക്കുമോ എന്നാണ്.

ദേവസ്വം അഡ്മിനിസ്‌ട്രേറ്റര്‍ക്കെതിരെ സര്‍ക്കാര്‍ തലത്തില്‍ അമര്‍ഷം പുകയുകയാണ്. ഹൈക്കോടതിയില്‍ നല്‍കുന്ന റിപ്പോര്‍ട്ടില്‍ മന്ത്രിയുടെ ഭാര്യയെ രക്ഷിക്കാമായിരുന്നിട്ടും അത് ചെയ്യാത്തതിലാണ് ദേവസ്വം മന്ത്രിക്ക് അത്യപ്തി. ഗുരുവായൂര്‍ ദേവസ്വം ബോര്‍ഡിനും അഡ്മിനിസ്‌ട്രേറ്ററുടെ നടപടിയില്‍ അത്യപ്തിയുണ്ട്.എന്നാല്‍ കോവിഡ് ചട്ടം മന്ത്രിഭാര്യ ലംഘിച്ചിട്ടില്ലെന്ന് അഡ്മിനിസ്‌ട്രേറ്റര്‍ ഹൈക്കോടതിയെ അറിയിച്ചു.

കോവിഡ് പശ്ചാത്തലത്തില്‍ ഭക്തര്‍ക്ക് പ്രവേശനം അനുവദിക്കാതിരുന്ന സമയത്താണ് ഗുരുവായൂര്‍ ക്ഷേത്രനാലമ്പലത്തില്‍ ദേവസ്വം മന്ത്രിയുടെ പത്‌നിയും രണ്ടു വനിതകളും ദര്‍ശനം നടത്തിയത്. ദേവസ്വം ബോര്‍ഡ് തന്നെയാണ് ഇത് സ്ഥിതീകരിച്ചത്.ദേവസ്വം അഡ്മിനിസ്‌ട്രേറ്റര്‍ ഹൈക്കോടതിക്ക് നല്‍കിയ റിപ്പോര്‍ട്ട് മന്ത്രിയെ ഞെട്ടിച്ചു. ദേവസ്വം മന്ത്രിക്ക് കീഴില്‍ പ്രവര്‍ത്തിക്കുന്നയാളാണ് ദേവസ്വം അഡ്മിനിസ്‌ട്രേറ്റര്‍. ഇടതുപക്ഷ ജനാധിപത്യമുന്നണിയുടെ ബോര്‍ഡാണ് ഗുരുവായൂര്‍ ഭരിക്കുന്നത്.

കോവിഡ് പ്രോട്ടോക്കോള്‍ പാലിച്ചായിരുന്നു ദര്‍ശനം നടത്തിയതെന്നാണ് ദേവസ്വം അഡിമിനിസ്‌ട്രേറ്റര്‍ ടി. ബ്രീജാകുമാരി ഹൈക്കോടതിക്ക് റിപ്പോര്‍ട്ട് നല്‍കിയത്. എന്നാല്‍ നാലമ്പലത്തില്‍ മന്ത്രി ഭാര്യ ദര്‍ശനം നടത്തിയ സമയത്ത് ആര്‍ക്കും ദര്‍ശനം അനുവദിച്ചിരുന്നില്ല.

ദേവസ്വം മന്ത്രി കടകംപള്ളി സുരേന്ദ്രന്റെ ഭാര്യയടക്കമുള്ളവര്‍ ഗുരുവായൂര്‍ ക്ഷേത്രത്തിന്റെ നാലമ്പലത്തില്‍ ദര്‍ശനം നടത്തിയതിന്റെ സി.സി.ടി.വി. ദൃശ്യങ്ങള്‍ ലഭ്യമാക്കാന്‍ ഉത്തരവിടണമെന്നാവശ്യപ്പെട്ട് ബി.ജെ.പി. നേതാവ് തൃശ്ശൂര്‍ സ്വദേശി നാഗേഷ് നല്‍കിയ ഹര്‍ജിയില്‍ കോടതി വിശദീകരണം തേടിയിരുന്നു.

നവംബര്‍ 24-ന് വൈകീട്ട് ദേവസ്വം മന്ത്രിയുടെ ഭാര്യയും മറ്റുരണ്ട് വനിതകളും ക്ഷേത്രദര്‍ശനത്തിന് എത്തിയിരുന്നു. വാതില്‍മാടത്തിന് മുന്നില്‍നിന്ന് ഇവര്‍ ദര്‍ശനം നടത്തി. 25-ന് രാവിലെ ഏഴിന് ക്ഷേത്രത്തിലെത്തിയപ്പോള്‍ ദേവസ്വം ചെയര്‍മാനും രണ്ടു മെമ്പര്‍മാരും ക്ഷേത്രത്തിലുണ്ടായിരുന്നു. ദേവസ്വം കമ്മിഷണറും ഭാര്യയും അപ്പോള്‍ നാലമ്പലത്തിലുണ്ടായിരുന്നു. ഇതെല്ലാം നിയമവിരുദ്ധമായ കാര്യങ്ങളായിരുന്നു.

ഇവരോട് മന്ത്രിപത്‌നി നാലമ്പലത്തില്‍ കയറാനും നിര്‍മാല്യം തൊഴാനും അനുമതിതേടി. അടുത്തിടെ അവര്‍ ശസ്ത്രക്രിയയ്ക്ക് വിധേയായിരുന്നു. ആരോഗ്യപ്രശ്‌നങ്ങള്‍ കണക്കിലെടുത്ത് നാലമ്പലത്തില്‍ ദര്‍ശനം നടത്താന്‍ അനുമതി നല്‍കിയെന്നുമാണ് വിശദീകരണത്തില്‍ പറയുന്നത്. നാലമ്പലത്തിലേക്ക് പ്രവേശനം വിലക്കിക്കൊണ്ട് സര്‍ക്കാര്‍ ഉത്തരവുണ്ടായിരുന്നില്ലെന്നും വിശദീകരണത്തിലുണ്ട്. എന്നാല്‍, ഈ കാലത്ത് ഗുരുവായൂര്‍ ദേവസ്വം മാനേജിങ് കമ്മിറ്റി ഭക്തര്‍ക്ക് ക്ഷേത്രത്തിന്റെ വാതില്‍മാടം വരെയേ പ്രവേശനം അനുവദിച്ചിരുന്നുള്ളൂ. പ്രത്യക്ഷത്തില്‍ നോക്കിയാല്‍ ഇതില്‍ വലിയ അപാകതയൊന്നുമില്ല. എന്നാല്‍ നിയമ ലംഘനം നിയമ ലംഘനം തന്നെയാണ്.

കമ്യൂണിസ്റ്റ് മന്ത്രിമാര്‍ക്ക് ഈശ്വരവിശ്വാസം പറഞ്ഞിട്ടില്ല. എന്നാല്‍ അവരുടെ കുടുംബാംഗങ്ങള്‍ക്ക് ഈശ്വരവിശ്വാസം പാടില്ലെന്ന് പറഞ്ഞിട്ടില്ല. അതു കൊണ്ടു തന്നെ പാര്‍ട്ടിക്ക് ഇതില്‍ വിഷമം തോന്നേണ്ട കാര്യമില്ല. അതേസമയം തദ്ദേശ തെരഞ്ഞടുപ്പില്‍ വലിയ വിജയം നേടി നില്‍ക്കുമ്പോള്‍ പാര്‍ട്ടിയെ അപകീര്‍ത്തിപ്പെടുത്തിയതില്‍ സര്‍ക്കാര്‍ തലത്തിലും പാര്‍ട്ടി തലത്തിലും മന്ത്രിക്കെതിരെ അത്യപ്തിയുണ്ട് .മുമ്പും ഗുരുവായൂര്‍ സന്ദര്‍ശിച്ച് കടകം പള്ളി വിവാദത്തിലായിരുന്നു.