പി.കെ കുഞ്ഞാലിക്കുട്ടി സംസ്​ഥാന രാഷ്​ട്രീയത്തിലേക്ക്​ മടങ്ങി​യെത്തുന്നു. വരുന്ന നിയമസഭ തെരഞ്ഞെടുപ്പില്‍ അദ്ദേഹം ലോക്​സഭാംഗത്വം രാജിവെച്ച്‌​ നിയമസഭയിലേക്ക്​ മത്സരിക്കും. മലപ്പുറം ജില്ല ലീഗ്​ ഓഫിസില്‍ ചേര്‍ന്ന മുസ്​ലിം ലീഗ്​ പ്രവര്‍ത്തക സമിതിയുടെതാണ്​ തീരുമാനം.

നിലവില്‍ മലപ്പുറം പാര്‍ലമെന്‍റ്​ മണ്ഡലത്തെയാണ്​ കുഞ്ഞാലിക്കുട്ടി​ പ്രതിനിധീകരിക്കുന്നത്​. സംസ്​ഥാനത്തെ പ്രത്യേക രാഷ്​ട്രീയ സാഹചര്യം കണക്കിലെടുത്താണ്​ കുഞ്ഞാലിക്കുട്ടിയെ തിരിച്ചുവിളിക്കാന്‍ പാര്‍ട്ടി തീരുമാനിച്ചതെന്ന്​ ​സംസ്​ഥാന സെക്രട്ടറി കെ.പി.എ മജീദ്​ അറിയിച്ചു. യു.ഡി.എഫിനെ വിജയത്തിലേക്ക്​ കൊണ്ടുവരാന്‍ കുഞ്ഞാലിക്കുട്ടിയും എം.കെ. മുനീറും തിരുവനന്തപുരം കേന്ദ്രീകരിച്ച്‌​ പ്രവര്‍ത്തിക്കുമെന്നും അദ്ദേഹം വ്യക്​തമാക്കി.

വിഭാഗീയ പ്രവര്‍ത്തനങ്ങള്‍ ഒരു കാലത്തും മുസ്​ലിംലീഗി​െന്‍റ ഭാഗത്തു നിന്നുണ്ടായിട്ടില്ലെന്നും മറിച്ചുള്ള പ്രചാരണം നിയമസഭ തെര​ഞ്ഞെടുപ്പില്‍ നേട്ടം കൊയ്യാനുള്ള ചിലരുടെ നീക്കമാണിതെന്നും കുഞ്ഞാലിക്കുട്ടി പറഞ്ഞു. അതിനെ പൊളിച്ചു കൊടുക്കാന്‍ വരും ദിവസങ്ങളില്‍ യു.ഡി.എഫ്​ നേതാക്കള്‍ക്കൊപ്പം നിന്ന്​ പ്രവര്‍ത്തിക്കും.

പാര്‍ട്ടി അണികളിലുള്ള അവ്യക്​തത മാറ്റാനും സംസ്​ഥാന രാഷ്​ട്രീയത്തില്‍ സജീവമാവാനുമാണ്​ നേരത്തേ തന്നെ ഇതു സംബന്ധിച്ച തീരുമാനമെടുത്തതെന്നാണ്​ ലീഗ്​ നേതൃത്വം വിശദീകരിക്കുന്നു​. സംസ്​ഥാനത്ത്​ യു.ഡി.എഫിന്​ മേല്‍കൈ ഉണ്ടാക്കാന്‍ വലിയ തോതിലുള്ള ​പ്രചാരണ പ്രവര്‍ത്തനങ്ങള്‍ ആവശ്യമാണെന്ന തിരിച്ചറിവാണ്​ കുഞ്ഞാലിക്കുട്ടിയെ പോലുള്ള ഒരു നേതാവിനെ തിരിച്ചുകൊണ്ടുവരാനുള്ള തീരുമാനത്തിന്​ പിന്നിലുള്ളതെന്ന്​ ചൂണ്ടിക്കാട്ടപ്പെടുന്നു.