വാഷിങ്ടന് പോസ്റ്റിന്റെ കൂട്ട പിരിച്ചുവിടലില് ഇഷാന് തരൂരും: മകനെ പുറത്താക്കിയത് വലിയ നഷ്ടമെന്ന് ശശി തരൂര്
യുഎസ് പത്രം വാഷിങ്ടന് പോസ്റ്റ് നടത്തിയ കൂട്ട പിരിച്ചുവിടലില് മകനും കോളമിസ്റ്റുമായ ഇഷാന് തരൂരിന്റെ ജോലി നഷ്ടമായതില് പ്രതികരണവുമായി ശശി തരൂര് എംപി. രാജ്യാന്തര കാര്യങ്ങളില് പ്രഗത്ഭനും വിശകലന വിദഗ്ധനും എഴുത്തുകാരനുമായ ഇഷാന് തരൂരിനെ ഒഴിവാക്കിയ വാഷിങ്ടന് പോസ്റ്റിന്റെ നടപടി വിചിത്രമാണെന്ന് തരൂര് ആരോപിച്ചു.
തന്നെ പുറത്താക്കിയ വിവരം ഇഷാന് തരൂര് തന്നെയാണു സമൂഹമാധ്യമമായ എക്സിലൂടെ കഴിഞ്ഞ ദിവസം അറിയിച്ചത്. ന്യൂസ് റൂമിനെ ഓര്ത്തു ഹൃദയം വേദനിക്കുന്നതായും മികച്ച എഡിറ്റര്മാര്ക്കും ലേഖകര്ക്കും ഒപ്പം പ്രവര്ത്തിക്കാന് കഴിഞ്ഞത് ബഹുമതിയായി കാണുന്നതായും ഇഷാന് തരൂര് കുറിച്ചിരുന്നു.
തന്റെ മകന്റെ 'വേള്ഡ് വ്യൂ' എന്ന കോളം വലിയ തരംഗമായിരുന്നുവെന്ന് തരൂര് എക്സില് കുറിച്ചു. ഈ കോളത്തിനു മാത്രമായി അഞ്ചു ലക്ഷത്തിലധികം സബ്സ്ക്രൈബര്മാരുണ്ട്. വാഷിങ്ടന് പോസ്റ്റ് ഈ ജനപ്രീതിയെ വരുമാനമാക്കി മാറ്റുന്നതിനു പകരം സ്വയം നശീകരണത്തിനുള്ള വികലമായ നടപടിയാണ് സ്വീകരിച്ചതെന്നും ശശി തരൂര് എക്സില് കുറിച്ചു.
ഇഷാന് തരൂരിന്റെ കോളം ദിവസവും വായിക്കുന്ന വിദേശകാര്യ മന്ത്രിമാരെയും നയതന്ത്രജ്ഞരെയും പണ്ഡിതന്മാരെയും താന് കണ്ടിട്ടുണ്ട്. ഇഷാനെപ്പോലൊരു വിദഗ്ധനെ പുറത്താക്കിയതിലൂടെ സ്ഥാപനത്തിനു വലിയൊരു നഷ്ടമാണ് സംഭവിച്ചതെന്നും ശശി തരൂര് പറഞ്ഞു.
ചരിത്രകാരനായ ആന്ഡ്രെ പഗ്ലിയും ഇഷാന് തരൂരിനെ പിന്തുണച്ച് രംഗത്തെത്തി. രാജ്യാന്തര കാര്യങ്ങളില് ഇഷാനോളം മികച്ച മറ്റൊരാളില്ലെന്നും, താമസിയാതെ തന്നെ മികച്ച ഇടങ്ങളിലൂടെ ഇഷാന്റെ വായനക്കാരിലേക്ക് അദ്ദേഹം തിരിച്ചെത്തുമെന്നും ആന്ഡ്രെ പഗ്ലി എക്സില് കുറിച്ചു.
https://www.facebook.com/Malayalivartha
