അതീവ ഗുരുതരാവസ്ഥയില്‍ ചികിത്സയില്‍ ഉള്ള യുവ സംവിധായകന്‍ ഷാനവാസ് നരണിപ്പുഴയെ കൊച്ചി ആസ്റ്റര്‍ മെഡ്‌സിറ്റിയില്‍ എത്തിക്കും. ഷാനാവാസുമായി കോയമ്ബത്തൂരില്‍ നിന്ന് തിരിച്ച പ്രത്യേക ആംബുലന്‍സ് വാളയാര്‍ പിന്നിട്ടു. ഐസിയു സംവിധാനമുള്ള പ്രത്യേക ആംബുലന്‍സിലാണ് ഷാനാവാസിനെ എത്തിക്കുന്നത്.

ഹൃദയാഘാതത്തെ തുടര്‍ന്ന് കോയമ്ബത്തൂര്‍ കെജി ഹോസ്പിറ്റലില്‍ ഐസിയുവിയിരുന്നു ഷാനവാസ്. സ്ഥിതി ഗുരുതരമായതിനാല്‍ കൊച്ചിയില്‍ എത്തിച്ച് ചികിത്സ നല്‍കാന്‍ തീരുമാനിക്കുകയായിരുന്നു. അട്ടപ്പാടിയില്‍ പുതിയ സിനിമയുടെ എഴുത്തിനിടെയാണ് ഹൃദയാഘാതം സംഭവിച്ചത്. സുഹൃത്തുക്കളാണ് ആശുപത്രിയില്‍ എത്തിച്ചത്. ആശുപത്രിയിലേക്ക് കൊണ്ടുപോകുന്നതിനിടെ ആംബുലന്‍സില്‍ വച്ച് രക്തസ്രാവം ഉണ്ടായിരുന്നു.