തേഞ്ഞിപ്പാലം പഞ്ചായത്ത് പ്രസിഡന്‍റായ വിജിത് ആത്മഹത്യക്ക് ശ്രമിച്ചതിനെ കുറിച്ച്‌ ഉത്തരേന്ത്യയില്‍ വ്യാജപ്രചാരണം നടക്കുന്നതായി വാർത്ത. വിജിത് ഇസ്‍ലാമിലേക്ക് മതം മാറാനുള്ള സമ്മര്‍ദം സഹിക്കാനാകാതെ ആത്മഹത്യക്ക് ശ്രമിച്ചുവെന്നാണ് പതിനായിരക്കണക്കിന് വാട്സ് ആപ്പ് ഗ്രൂപ്പുകളില്‍ പ്രചരിക്കുന്നതെന്ന് കെപിസിസി ജനറല്‍ സെക്രട്ടറി കെ പി നൗഷാദ് അലി ഫേസ്ബുക് പോസ്റ്റിൽ കുറിക്കുകയുണ്ടായി. തന്നോട് ഇക്കാര്യം ഡല്‍ഹിയിലെ ഒരു മാധ്യമപ്രവര്‍ത്തകനാണ് പറഞ്ഞതെന്ന് നൗഷാദ് അലി വ്യക്തമാക്കി.

നൗഷാദ് അലിയുടെ കുറിപ്പിന്‍റെ പൂര്‍ണരൂപം

രാവിലെ ഡല്‍ഹിയിലെ ഒരു പത്രപ്രവര്‍ത്തക സുഹൃത്തിന്‍റെ ഫോണ്‍ വിളി വരികയുണ്ടായി. തേഞ്ഞിപ്പലം പഞ്ചായത്ത് പ്രസിഡണ്ടായ വിജിത് ഇസ്ലാമിലേക്ക് മതം മാറാനുള്ള സമ്മര്‍ദം സഹിക്കാനാകാതെ ആത്മഹത്യക്ക് ശ്രമിച്ചുവെന്ന വിഷം പുരട്ടിയ വാര്‍ത്ത ഉത്തരേന്ത്യയിലെ പതിനായിരക്കണക്കിന് വാട്സ് അപ്പ് ഗ്രൂപ്പുകളില്‍ ആളിപ്പടരുന്നു. ഇതിന്‍റെ നിജസ്ഥിതി അറിയാനാണ് അദ്ദേഹം വിളിച്ചത്.

തേഞ്ഞിപ്പലം പഞ്ചായത്തിലെ പതിനൊന്നാം വാര്‍ഡായ പാണമ്ബ്രയില്‍ നിന്നാണ് 'കണക്ക' സമുദായാംഗമായ വിജിത് ജയിച്ചത്. യൂത്ത് കോണ്‍.പ്രവര്‍ത്തകനായ അദ്ദേഹം ലീഗിനനുവദിച്ച സീറ്റിലാണ് മത്സരിച്ചത്. അപ്രതീക്ഷിതമായി കൈവന്ന പഞ്ചായത്ത് പ്രസിഡണ്ട് പദവി തീര്‍ത്ത സമ്മര്‍ദ്ദവും, അമ്ബരപ്പുമാണ് ഈ യുവാവിനെ കടുംകൈയ്ക്ക് പ്രേരിപ്പിച്ചത്. സുഖം പ്രാപിച്ചു വരുന്നുണ്ട്.

വര്‍ഗ്ഗീയതയുടെ ബലികുടീരത്തില്‍ ഇന്ധനം പകരാന്‍ തക്കം പാര്‍ത്തവര്‍ രംഗം കൈയ്യടക്കിയിരിക്കുന്നു. ശൂന്യാവസരങ്ങളില്‍ നിന്നു പോലും വിഷം പുരട്ടിയ വാര്‍ത്തകള്‍ സൃഷ്ടിച്ച്‌ അധികാരമേറിയവര്‍ ഇന്ത്യ ഭരിക്കുമ്ബോള്‍ നിയമ നടപടികള്‍ അസ്ഥാനത്താണ്. പക്ഷെ, ലൗ ജിഹാദ്, ഫുഡ് ജിഹാദ്, ഡ്രസ്സ് ജിഹാദ്...തുടങ്ങി ഇസ്ലാമോഫോബിയ തീര്‍ത്ത് ആഘോഷിക്കുന്നവരില്‍ ഒട്ടും പ്രതീക്ഷിക്കാത്ത മുഖങ്ങളും, പ്രസ്ഥാനങ്ങളും കടന്നു വരുമ്ബോള്‍ വലിയ ദു:ഖം തോന്നുന്നു. മത വെറി പൂണ്ട് വിഷപ്പുക തുപ്പുന്ന അല്‍പ്പന്‍മാരില്‍ നിന്നും ഭാരതാംബയെ ദൈവം കാത്തുരക്ഷിക്കട്ടെ!!