സ്വര്‍ണക്കടത്ത് കേസില്‍ എന്‍.ഐ.എ കുറ്റപത്രം സമര്‍പ്പിച്ചു. കൊച്ചി എന്‍.ഐ.എ യൂണിറ്റാണ് കുറ്റപത്രം സമര്‍പ്പിച്ചത്. എന്‍ഐഎ പ്രത്യേക കോടതിയിലാണ് കുറ്റപത്രം സമര്‍പ്പിച്ചത്.

സ്വപ്ന സുരേഷ്, സരിത്ത്, റമീസ് എന്നിവർക്കെതിരയാണ് ആദ്യഘട്ട കുറ്റപത്രം. സന്ദീപ് നായരെ മാപ്പുസാക്ഷിയാക്കിയാണ് കൊച്ചിയിലെ എൻഐഎ പ്രത്യേക കോടതിയിൽ കുറ്റപത്രം സമർപ്പിച്ചത്

കേസ് എൻഐഎ ഏറ്റെടുത്ത് ആറ് മാസം തികയുന്നതിന് മുന്‍പാണ് കുറ്റപത്രം സമർപ്പിച്ചിരിക്കുന്നത്. മുഖ്യപ്രതികൾക്ക് സ്വാഭാവിക ജാമ്യം ലഭിക്കുന്നത് തടയുന്നതിന് വേണ്ടിയാണ് ഇത്. സ്വപ്‌ന സുരേഷ്, സരിത്ത്, കെ.ടി.റമീസ് തുടങ്ങി കേസില്‍ ആകെ 35 പ്രതികളാണ് ഉള്ളത്.
ഇതില്‍ എന്‍ഐഎ അറസ്റ്റ് ചെയ്തത് 21 പേരെയാണ് . 20 പേര്‍ക്കെതിരെ കുറ്റപത്രം സമര്‍പ്പിച്ചു. ഏഴ് പേർ ജുഡീഷ്യൽ കസ്റ്റഡിയിലാണ്. 12 പേർക്ക് ജാമ്യം ലഭിച്ചു.

ഫൈസല്‍ ഫരീദടക്കം പിടിയിലാകാനുണ്ട്. യുഎപിഎ 15,16,17 വകുപ്പുകള്‍ പ്രതികള്‍ക്കെതിരെ ചുമത്തി. കുറ്റപത്രത്തില്‍ സന്ദീപ് നായര്‍ മാപ്പ് സാക്ഷിയായി. രാജ്യത്തിന്റെ സാമ്പത്തിക ഭദ്രത തകര്‍ക്കാന്‍ പ്രതികള്‍ ഗൂഢാലോചന നടത്തിയെന്ന് കിറ്റപത്രത്തില്‍ പറയുന്നു. രാജ്യത്തിന്റെ സുരക്ഷ, കെട്ടുറപ്പ് , അഖണ്ഡത എന്നിവ തകര്‍ക്കാന്‍ പ്രതികള്‍ ശ്രമിച്ചു. പ്രതികള്‍ ഭീകരവാദ പ്രവര്‍ത്തനത്തിനായി ഫണ്ട് ശേഖരണം നടത്തിയെന്നും കുറ്റപത്രത്തില്‍ പറയുന്നു