താര സംഘടനയായ അമ്മയുടെ ആസ്ഥാന മന്ദിരത്തിന്റെ ഉദ്ഘാടനം ചടങ്ങിൽ വനിതാ എക്‌സിക്യൂട്ടീവ് അംഗങ്ങൾക്ക് ഇരിക്കാൻ സ്ഥലം നൽകിയില്ലെന്ന ആരോപണമുയർത്തി നടി പാർവതി രംഗത്ത് വന്നിരുന്നു. പാർവതിക്ക് മറുപടി നൽകിയിരിക്കുകയാണ് ബാബുരാജ്. കുറ്റങ്ങളെല്ലാം ചൂണ്ടിക്കാണിക്കപ്പെടണം. അതൊക്കെ നല്ലതാണ് പക്ഷേ പാർവതി പറഞ്ഞ മിക്കവാറും കാര്യങ്ങളൊക്കെ താനും പിന്തുണച്ചിട്ടുണ്ട് . കാരണം നല്ല അറിവും വിവരമൊക്കെ ഉള്ള കുട്ടിയാണ് പാർവതി . സംഘടനയിലൊക്കെ നമുക്ക് ആവശ്യമുള്ളതാണ്. പാർവതി രാജിവച്ച് പോയപ്പോൾ രാജി സ്വീകരിക്കരുതെന്ന് പറഞ്ഞ ആളാണ് ഞാൻ. പക്ഷേ ഈ ആരോപണം ഉയർത്തിയത് എന്താണ് എന്നറിയില്ല . കാരണം സ്ത്രീകൾ അടങ്ങുന്ന എക്‌സിക്യൂട്ടീവ് കമ്മിറ്റി എടുത്ത തീരുമാനമാണ് ഓഫീസ് ഡയറക്ടേഴ്‌സ് മാത്രം ഇരുന്നാൽ മതിയെന്ന്. അതിനുള്ള സ്‌പേസ് മാത്രേ അവിടെ ഉണ്ടായിരുന്നുള്ളൂ .

രചനയേയും ഹണിയേയും ശ്വേതയേയും താനായിരുന്നു സ്റ്റേജിലേക്ക് വിട്ടത്. ലോഗോ പ്രകാശനമൊക്കെ ഉണ്ടായിരുന്നു . നമ്മുടെ ആകെയുള്ള മൂന്ന് ലേഡീസ് ആണ് അവർ . നമ്മുടെ വീട്ടിലൊരു ഫങ്ഷൻ നടക്കുമ്പോൾ നമുക്ക് വേദിയിൽ കയറി അണിഞ്ഞൊരുങ്ങി നിൽക്കാനല്ല സമയം. താൻ സ്‌റ്റേജിൽ പോലും ഉണ്ടായില്ല. കുറ്റം കാണണമെന്ന് തോന്നിയാൽ ഏത് കാര്യത്തിലും കുറ്റം കാണാം. നല്ലതുകൂടി പറയണം. ആ കുട്ടി ചെയ്യുന്ന കാര്യത്തിൽ നല്ലത് കൂടി പറയാറുണ്ട്. തെറ്റുകൾ ഉണ്ടെങ്കിൽ ചൂണ്ടികാണിക്കപ്പെടണം. അത് വീണ്ടും പറയുകയാണ്. ഏത് അംഗമായാലും അത് ചെയ്യണം. പക്ഷേ അടിത്തറ തോണ്ടാൻ നോക്കരുത്. കാരണം ഒരുപാടുപേർക്ക് ഇതിനെക്കൊണ്ട് ഗുണമുണ്ട് എന്നായിരുന്നു ബാബുരാജ് പറഞ്ഞത്. പുരുഷ താരങ്ങൾ ഇരിക്കുകയും, ഹണി റോസും രചന നാരായണൻ കുട്ടിയും നിൽക്കുകയും ചെയ്യുന്ന ഒരു ചിത്രമായിരുന്നു വിവാദമാക്കിയത്.