നിരവധി സ്ത്രീകള്‍ വെള്ളറടയിലെ വീട്ടമ്മയെപോലെ വേട്ടയാടപ്പെടുകയാണ് കേരളത്തിനകത്തും പുറത്തും. മാധ്യമങ്ങള്‍ക്ക് ഇതൊന്നും ഒരു വലിയ വാര്‍ത്തയല്ലേ. ചര്‍ച്ചയാക്കേണ്ടതല്ലേ. ആത്മഹത്യ ഒന്നിനും ഒരു പരിഹാരമല്ല എന്ന് ആദ്യമേ തന്നെ പറഞ്ഞുകൊണ്ട് തുടങ്ങട്ടെ.

വെള്ളറടയിലെ വീട്ടമ്മ ആത്മഹത്യ ചെയ്തതല്ല അവരെ കൊന്നതാണ് സദാചാര പോലീസ് കൂട്ടങ്ങള്‍. വീട്ടമ്മയുടെ ആത്മഹത്യയെക്കുറിച്ചുള്ള വാര്‍ത്തയെക്കുറിച്ചാണ് പറയുന്നത്. സദാചാര പോലീസ് ചമഞ്ഞ യുവാക്കളുടെ ഭീഷണി കാരണമാണ് ഒരു വിലപ്പെട്ട ജീവന്‍ പൊലിഞ്ഞതെന്നാണ് ആരോപണം.

നാലുപേര്‍ക്കെതിരേ കേസ് എടുത്തിട്ടുണ്ട്. അപ്പോള്‍ വ്യക്തമല്ലേ യുവാക്കള്‍ ആ പാവം വീട്ടമ്മയെ മരണത്തിലേയ്ക്ക് തള്ളിവിട്ടുവെന്ന്. കുന്നത്തുകാല്‍ ചാവടിയില്‍ വീട്ടമ്മ മണ്ണെണ്ണയൊഴിച്ചു തീകൊളുത്തി ജീവനൊടുക്കിയതിന്റെ വേദനയിലാണ് കേരളം.

സദാചാര പോലീസ് ചമഞ്ഞ പരിസരവാസികളായ യുവാക്കളുടെ ഭീഷണിയാണ് സംഭവത്തിനു പിന്നിലെന്ന് വീട്ടമ്മയുടെ ബന്ധുക്കള്‍ ആരോപിച്ചു. സംഭവത്തില്‍ വെള്ളറട പോലീസ് നാലു യുവാക്കള്‍ക്കെതിരേ പോലീസ് കേസെടുത്തു.

കുന്നത്തുകാല്‍ ചാവടി നരിയൂര്‍ കരുണാലയത്തില്‍ സുരേഷ് കുമാറിന്റെ ഭാര്യ അക്ഷരയാണ് മരിച്ചത്. 36 വയസ് മാത്രമുള്ള യുവതിയെ പോലെ നിരവധി പേര്‍ കേരളത്തില്‍ ഇത്തരത്തില്‍ സദാചാര പോലീസിന് ഇരയായിട്ടില്ലേ.

പരിസരവാസികളായ മണികണ്ഠന്‍, സുബാഷ്, വിഷ്ണു, രഞ്ചിത്ത് എന്നിവര്‍ക്കെതിരേയാണ് കേസെടുത്തത്. വ്യാഴാഴ്ച രാത്രിയിലാണ് സംഭവം നടന്നത്. സംഭവത്തെക്കുറിച്ച് പോലീസ് പറയുന്നതിങ്ങനെ: റാണിയിലെ തുണിക്കടയിലെ ജീവനക്കാരിയാണ് അക്ഷര. സമീപത്ത് പണമിടപാടുസ്ഥാപനം നടത്തുന്ന പരശുവയ്ക്കല്‍ സ്വദേശി ബിജു, അക്ഷരയുടെ ഭര്‍ത്താവിനു കടംനല്‍കിയ പണം വാങ്ങാനായി വീട്ടില്‍ വന്നപ്പോള്‍ പരിസരവാസികളായ യുവാക്കള്‍ സദാചാര പോലീസ് ചമഞ്ഞ് അയാളെ തടഞ്ഞുവച്ച് ഭീഷണിപ്പെടുത്തി.

അക്ഷരയെയും അവര്‍ ഭീഷണിപ്പെടുത്തി. ഇതേത്തുടര്‍ന്നുണ്ടായ മനോവിഷമമാണ് വീട്ടമ്മയുടെ മരണത്തില്‍ കലാശിച്ചതെന്ന് ബന്ധുക്കള്‍ പരാതി നല്‍കിയതായി പോലീസ് പറഞ്ഞു. വ്യാഴാഴ്ച രാത്രിയില്‍ കൈയിലെ ഞരമ്പ് മുറിച്ചശേഷം ദേഹത്ത് മണ്ണെണ്ണയൊഴിച്ചു തീകൊളുത്തിയതിനെ തുടര്‍ന്ന് ഗുരുതരമായി പൊള്ളലേറ്റ അക്ഷരയെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചെങ്കിലും വെള്ളിയാഴ്ച വൈകീട്ടോടെ മരിച്ചു.

മക്കള്‍: ഗൗരികൃഷ്ണന്‍, ഗൗരികൃഷ്ണ. സംഭവവുമായി ബന്ധപ്പെട്ട് വെള്ളറട പോലീസ് രണ്ട് കേസെടുത്തു. പണമിടപാട് സ്ഥാപന ഉടമയെ തടഞ്ഞുവച്ച് ഭീഷണിപ്പെടുത്തിയ പരാതിയിലും വീട്ടമ്മയുടെ മരണത്തെത്തുടര്‍ന്നുള്ള ബന്ധുക്കളുടെ പരാതിയിലുമാണ് കേസെടുത്തത്.