ട്രെയിനി കളക്ടറത്രെ... തൃശൂര് കളക്ടറേറ്റില് ട്രെയിനി കളക്ടറാണെന്നും വന്തുകയുടെ ഇന്ഷുറന്സ് എടുക്കാമെന്നും പറഞ്ഞ് ഏജന്റായ മധ്യവയസ്കനെ വിളിച്ചുവരുത്തി നഗ്ന ചിത്രങ്ങള് എടുത്തു; ഹണിട്രാപ്പില് കുടുങ്ങിയ അദ്ദേഹത്തില് നിന്നും തട്ടിയെടുത്തത് 17.5 ലക്ഷവും സ്വര്ണവും
കേരളത്തെ ഏറെ പിടിച്ചു കുലുക്കിയ സംഭവമാണ് രണ്ടുമൂന്ന് വര്ഷത്തിന് മുമ്പ് ഉണ്ടായ ഹണി ട്രാപ്പ്. ഒരു പ്രമുഖ ചാനല് ഉദ്ഘാടന ദിവസം നടത്തിയ ഹണി ട്രാപ്പില് പെട്ടതാകട്ടെ സംസ്ഥാനത്തെ മന്ത്രിയും. അവസാനം ചാനലിന്റെ റേറ്റിംഗ് തകരുകയും മന്ത്രി തിരിച്ചെത്തുകയും ചെയ്തു.
ഇപ്പോഴിതാ എല്ലാവരേയും അമ്പരപ്പിക്കുന്ന മറ്റൊരു ഹണി ട്രാപ്പ് വരികയാണ്. തൃശൂരിലെ പ്രമുഖ ഇന്ഷ്വറന്സ് കമ്പനിയുടെ ഏജന്റായ മദ്ധ്യവയസ്കന്റെ നഗ്നചിത്രങ്ങള് സാമൂഹിക മാദ്ധ്യമങ്ങളിലൂടെ പ്രചരിപ്പിക്കുമെന്ന് ഭീഷണിപ്പെടുത്തി പതിനേഴര ലക്ഷം രൂപയും അഞ്ച് ലക്ഷം രൂപയുടെ സ്വര്ണാഭരണങ്ങളും തട്ടിയ യുവതി അറസ്റ്റില്. ഇരിങ്ങാലക്കുട സ്വദേശിയും ഉത്തര്പ്രദേശിലെ നോയിഡയില് സ്ഥിരതാമസക്കാരിയുമായ ധന്യ ബാലനാണ് (33) പൊലീസിന്റെ പിടിയിലായത്.
തൃശൂര് കളക്ടറേറ്റില് ട്രെയിനി കളക്ടറാണെന്നും വന്തുകയുടെ ഇന്ഷ്വറന്സ് എടുക്കാമെന്നും പറഞ്ഞ് മദ്ധ്യവയസ്കനെ വിശ്വസിപ്പിച്ച് ഹോട്ടല് മുറികളിലേക്കും ഫ്ളാറ്റുകളിലേക്കും വിളിച്ചുവരുത്തി മൊബൈല് ഫോണില് അയാളുടെ നഗ്നചിത്രങ്ങള് പകര്ത്തുകയായിരുന്നു.
സോഷ്യല് മീഡിയയില് അവ പ്രചരിപ്പിക്കുമെന്നും കുടുംബാംഗങ്ങള്ക്കും സുഹൃത്തുക്കള്ക്കും അയച്ചുകൊടുക്കുമെന്നും ഭീഷണിപ്പെടുത്തിയാണ് പണവും ആഭരണങ്ങളും തട്ടിയെടുത്തത്. ഡല്ഹി കേഡറിലുള്ള കളക്ടര് ട്രെയിനി ആണെന്നും പരിശീലനത്തിനായി നാട്ടിലെത്തിയതാണെന്നുമാണ് പറഞ്ഞിരുന്നത്.
ചിലരോട് ഇന്കം ടാക്സ് ഓഫീസറാണെന്നും നോയിഡയിലുളള താമസസ്ഥലത്ത് ഡിഫന്സിലെ ഓഫീസറാണെന്നും യുവതി പറഞ്ഞിരുന്നു.
ജോലിയില്ലെന്നും ഓപ്പണ് യൂണിവേഴ്സിറ്റിയില് എം.ബി.എ പാസായിട്ടുണ്ടെന്നും ഇവര് പൊലീസിന് മൊഴി നല്കി. വിവാഹിതയും ഒരു കുഞ്ഞിന്റെ അമ്മയുമാണ്. ഇംഗ്ലീഷിലും ഹിന്ദിയിലും പ്രാവീണ്യം ഉള്ള യുവതിക്ക് ആളുകളെ പറഞ്ഞു വിശ്വസിപ്പിക്കാനുള്ള വാക്ചാതുരിയുമുണ്ട്.
ശരിയായ മേല്വിലാസവും ജോലിയും വ്യക്തിപരമായ വിവരങ്ങളും ആര്ക്കും പങ്കു വയ്ക്കാതിരുന്ന ഇവര് ഡല്ഹിയില് താമസിക്കുന്നുവെന്ന് മാത്രമാണ് ആദ്യം ലഭിച്ച സൂചന.
ഡല്ഹിയിലേക്ക് തിരിച്ച അന്വേഷണ സംഘത്തിന് ഇവരെ കണ്ടെത്താനായില്ല. ഡല്ഹിയിലെ ചില മലയാളികളില് നിന്നാണ് ഇവര് നോയിഡയിലുണ്ടെന്ന വിവരം ലഭിച്ചത്. തുടര്ന്ന്, അന്വേഷണസംഘം നോയിഡയില് തെരച്ചില് നടത്തി. അവിടെയുളള ലക്ഷങ്ങള് വിലവരുന്ന സ്വന്തം ഫ്ളാറ്റില് നിന്നാണ് പിടികൂടിയത്.
പരാതിക്കാരനില് നിന്നു തട്ടിയെടുത്ത പണത്തെ കുറിച്ചും, സ്വര്ണാഭരണങ്ങളെ കുറിച്ചും വിവരങ്ങള് ശേഖരിക്കാന് വീണ്ടും ചോദ്യം ചെയ്യും. യുവതിയെ കോടതി റിമാന്ഡ് ചെയ്തു. തട്ടിപ്പിനിരയായ ഇന്ഷ്വറന്സ് കമ്പനി ഏജന്റ് സിറ്റി പൊലീസ് കമ്മിഷണര്ക്ക് പരാതി നല്കിയിരുന്നു.
വെസ്റ്റ് പൊലീസാണ് തുടക്കത്തില് അന്വേഷിച്ചത്. പിന്നീട് ജില്ല െ്രെകംബ്രാഞ്ച് എ.സി.പി പി. ശശികുമാര് ഏറ്റെടുത്ത്, സിറ്റി ഷാഡോ പൊലീസ് പിടികൂടുകയായിരുന്നു. കമ്മിഷണര് ആര്. ആദിത്യയുടെ നിര്ദ്ദേശ പ്രകാരം എ.സി.പി പി. ശശികുമാര്, ഷാഡോ പൊലീസിലെ എസ്.ഐ. എന്.ജി സുവ്രതകുമാര്, എ.എസ്.ഐ ജയകുമാര്, സീനിയര് സി.പി.ഒ ടി.വി ജീവന്, സി.പി.ഒ എം.എസ്. ലിഗേഷ്, വനിത സീനിയര് സിവില് പൊലീസ് ഉദ്യോഗസ്ഥരായ പ്രതിഭ, പ്രിയ എന്നിവര് ഉള്പ്പെടുന്ന അന്വേഷണ സംഘമാണ് യുവതിയെ അറസ്റ്റ് ചെയ്തത്.
എന്തായാലും കൂടുതല് പേര് ഹണി ട്രാപ്പില് പെട്ടിട്ടുണ്ടോയെന്ന് പോലീസ് സംശയിക്കുന്നുണ്ട്. നാണക്കേട് കാരണം പലരും പറയാതിരിക്കുന്നോ എന്നും കരുതുന്നുണ്ട്. അന്വേഷണം ശക്തമാക്കാനാണ് പോലീസ് ശ്രമിക്കുന്നത്.
https://www.facebook.com/Malayalivartha
