കല്ലട പരപ്പാർ അണക്കെട്ടിന്റെ വൃഷ്ടിപ്രദേശത്ത് കുളിക്കാൻ ഇറങ്ങിയ രണ്ട് യുവാക്കൾ മുങ്ങി മരിച്ചു. തമിഴ്‌നാട് റെയിൽവേ മധുര ഡിവിഷൻ ട്രാക്ക് മെയ്ന്റനൻസ് ജീവനക്കാരൻ പി തവമുനി (36), ചിതറ പാങ്ങോട് അൻസൻല മൻസിലിൽ അർഷിദ് (20) എന്നിവരാണു മരിച്ചത്. 26 അംഗ സഞ്ചാരി സംഘത്തിലെ അംഗമായിരുന്നു തവമുനി. കളങ്കുന്ന് ഭാഗത്ത് കുളിക്കാനായി ഇറങ്ങിയപ്പോഴാണ് അപകടം ഉണ്ടായത്.

തെന്മല ഇക്കോ ടൂറിസത്തിൽ രണ്ട് ദിവസത്തെ ക്യാംപിന് എത്തിയ റെയിൽവേ സ്‌കൗട്‌സ് ആൻഡ് ഗൈഡ്‌സ് സംഘം തെന്മല പരപ്പാർ അണക്കെട്ടിന്റെ ഭാഗത്ത് സവാരി നടത്തുന്നതിനിടെയാണ് നാലു പേർ അണക്കെട്ടിൽ കുളിക്കാനായി ഇറങ്ങിയത്. മൂന്നു പേർ നീന്തി കരയ്ക്കു കയറിയപ്പോൾ തവമുനി അണക്കെട്ടിലെ ആഴത്തിൽ മുങ്ങിത്താഴുകയായിരുന്നു.

ഒപ്പം ഉണ്ടായിരുന്നവർ രക്ഷിക്കാൻ ശ്രമിച്ചെങ്കിലും ശ്രമം വിഫലമായി. വനപാലക സംഘം സ്ഥലത്തെത്തി മൃതദേഹം കരയ്‌ക്കെത്തിക്കുകയായിരുന്നു.കുളത്തൂപ്പുഴ നെടുവെണ്ണൂർക്കടവ് പൂമ്പാറ ഭാഗത്ത് കുളിക്കാൻ ഇറങ്ങിയപ്പോഴാണ് അർഷിദ് അപകടത്തിൽപ്പെട്ടത്.

മൂന്ന് സുഹൃത്തുക്കൾക്കൊപ്പം കുളിക്കാൻ ഇറങ്ങിയപ്പോൾ അർഷിദ് ഒഴുക്കിൽപ്പെടുകയായിരുന്നു. സുഹൃത്തുക്കൾ നീന്തി രക്ഷപ്പെടുകയും ചെയ്തു . അർഷിദിന്റെ മൃതദേഹം വിദഗ്ധ സംഘമെത്തി മുങ്ങിയെടുക്കുകയായിരുന്നു. സംഭവത്തിൽ കുളത്തൂപ്പുഴ പൊലീസ് കേസെടുത്തു.