ലോകത്ത് ആരെങ്കിലും പറയുമോ തങ്ങളുടെ നേതാവിനെ വിമര്‍ശിക്കണമെന്ന്. എന്നാല്‍ നമ്മുടെ പ്രതിപക്ഷ നേതാവ് രമേശ് ചെന്നിത്തല അടി ചോദിച്ച് വാങ്ങുകയാണ്. കേന്ദ്ര ആഭ്യന്തര മന്ത്രി അമിത്ഷാ പിണറായിയെ മാത്രം എന്തിന് വിമര്‍ശിച്ചു. രാഹുലിനെ വിമര്‍ശിക്കാത്തതെന്ത്. രാഹുലിനെതിരെ അമിത്ഷാ ഒരു വാക്കെങ്കിലും പറഞ്ഞോ. ഇത് ബിജെപിയും സിപിഎമ്മും തമ്മിലുള്ള കൂട്ടുകെട്ടാണെന്നാണ് എല്ലാവരിലും ചിരി പടര്‍ത്തുന്ന ചെന്നിത്തലയുടെ പരാമര്‍ശം. സാധാരണ വിമര്‍ശിക്കാത്തപ്പോഴല്ലേ കൂട്ടുകെട്ട് എന്ന് പറയാറുള്ളത്. ഇവിടെ ചെന്നിത്തല നേരെ മറിച്ചാണ്.

ബിജെപിയും സിപിഎമ്മും തമ്മിലുള്ള നേരിട്ടുള്ള ഫൈറ്റാക്കാനാണ് ബിജെപി ശ്രമിക്കുന്നത്. അങ്ങനെ വന്നാല്‍ കോണ്‍ഗ്രസ് ഇല്ലാതാകും. നേതാക്കള്‍ കൂട്ടത്തോടെ ബിജെപിയിലേക്ക് ചേക്കേറും. ഉത്തരേന്ത്യ കേരളമാകും.

ചെന്നിത്തലയുടെ പ്രസ്താവന വൈറലായതോടെ അത് സിപിഎം ഏറ്റെടുത്തു. കോണ്‍ഗ്രസും ബി.ജെ.പിയും തമ്മിലെ കൂട്ടുകെട്ടിന് ഏറ്റവും വലിയ തെളിവാണ് തിരുവനന്തപുരത്തെത്തിയ രാഹുല്‍ഗാന്ധി അമിത്ഷായ്‌ക്കെതിരെയും അമിത്ഷാ തിരിച്ചും ഒന്നും പറയാതിരുന്നതെന്ന് സി.പി.എം സംസ്ഥാനസെക്രട്ടറി എ. വിജയരാഘവന്‍ വാര്‍ത്താസമ്മേളനത്തില്‍ പറഞ്ഞു.

2016ല്‍ ഒരു സീറ്റില്‍ വിജയിച്ച ബി.ജെ.പിക്ക് ഇക്കുറി അതും നഷ്ടമാകും. ഇടതുമുന്നണിയുടെ തുടര്‍ഭരണം ഇല്ലാതാക്കാനുള്ള ധനിക രാഷ്ട്രീയ, തീവ്ര വര്‍ഗീയ ശക്തികളുടെ ശ്രമം വിജയിക്കില്ല. മോദിയുടെ ജനവിരുദ്ധ, വര്‍ഗീയ നയങ്ങളെ എതിര്‍ക്കുന്നത് ഇടതുപക്ഷമാണ്. മുഖ്യമന്ത്രിയെയും മന്ത്രിമാരെയും അപകീര്‍ത്തിപ്പെടുത്താന്‍ ബി.ജെ.പി ഉന്നതതല ഗൂഢാലോചന നടത്തി. അമിത്ഷായുടെ തിരുവനന്തപുരം പ്രസംഗം അതിന് തെളിവാണ്. അതിന്റെ ചുരുളുകളോരോന്നായി അഴിയുകയാണ്.

ഇടതുപക്ഷവിരോധം കാരണം, മോദിയുടെ ജനവിരുദ്ധനയങ്ങളെ എതിര്‍ക്കാന്‍ പോലും കോണ്‍ഗ്രസ് തയാറല്ല. കേന്ദ്ര ഏജന്‍സികള്‍ക്ക് പൂര്‍ണ്ണ പിന്തുണ നല്‍കുന്നു. ഇടതുപക്ഷ തുടര്‍ഭരണം ജനമാഗ്രഹിക്കുന്നു. ജനങ്ങളെ ചേര്‍ത്തു പിടിച്ച സര്‍ക്കാരാണിതെന്നും വിജയരാഘവന്‍ പറഞ്ഞു.

അതേസമയം സ്വര്‍ണക്കടത്ത് കേസില്‍ അമിത് ഷായും പിണറായി വിജയനും തമ്മിലെ ചോദ്യങ്ങള്‍ സിപിഎം ബിജെപി ഒത്തുകളിയുടെ ഭാഗമായ നാടകമാണെന്നാണ് കോണ്‍ഗ്രസ് ആരോപണം. ദുരൂഹമരണ മുണ്ടായെങ്കില്‍ അമിത് ഷാ വെളിപ്പെടുത്തണമെന്നും ചോദ്യങ്ങള്‍ ചോദിക്കാതെ നടപടിയെടുക്കണമെന്നും കോണ്‍ഗ്രസ് ആവശ്യപ്പെട്ടു.

പിണറായി വിജയനും അമിത് ഷായും തമ്മില്‍ നടത്തിയ വാക്‌പോര് നാടകമാണെന്നാണ് ചെന്നിത്തല ആരോപിച്ചത്. സിപിഎമ്മും ബിജെപിയും തമ്മിലുള്ള ഒത്തുകളിയാണ്. അമിത് ഷാ മാലാഖ ചമയേണ്ടെന്നും ഇന്ന് ഇന്ത്യയിലെ വര്‍ഗീയതയുടെ ആള്‍രൂപമാണ് അമിത് ഷായെന്നും രമേശ് ചെന്നിത്തല പറഞ്ഞു.

സ്വര്‍ണകള്ളക്കടത്തിനിടയില്‍ നടന്ന ദുരൂഹ മരണം ഏതാണെന്ന് അമിത് ഷാ വ്യക്തമാക്കണം. അങ്ങനെയൊരു കൊലപാതകം നടന്നിട്ടുണ്ടോയെന്ന് മുഖ്യമന്ത്രി വ്യക്തമാക്കണം. അല്ലാതെ പരാതി കിട്ടിയാല്‍ അന്വേഷിക്കാമെന്നല്ല മുഖ്യമന്ത്രി പറയേണ്ടത്. കേന്ദ്ര ആഭ്യന്തര വകുപ്പ് മന്ത്രിക്ക് ഇങ്ങനെയൊരു കൊലപാതകത്തെക്കുറിച്ച് വിവരം ലഭിച്ചിട്ടുണ്ടെങ്കില്‍ അത് കേരളത്തിലെ ജനങ്ങളോട് പറയണമെന്നും അദ്ദേഹം ആവശ്യപ്പെട്ടു.

തിരുവനന്തപുരത്ത് അമിത് ഷാ നടത്തിയ പ്രസംഗവും തുടര്‍ന്ന് പിണറായി വിജയന്‍ നല്‍കിയ മറുപടിയും എഴുതി തയ്യാറാക്കിയ പ്രസംഗമാണെന്ന് മുല്ലപ്പള്ളി രാമചന്ദ്രന്‍ ആരോപിച്ചു.

സ്വര്‍ണക്കടത്ത് കേസില്‍ മുഖ്യമന്ത്രിക്ക് പങ്കുണ്ടെങ്കില്‍ എന്തുകൊണ്ട് ചോദ്യം ചെയ്യുന്നില്ലെന്ന് വ്യക്തമാക്കണമെന്ന് കോണ്‍ഗ്രസ് ചോദിച്ചു. സ്വര്‍ണ്ണക്കടത്തില്‍ ഒരേ സമയം ഒത്തുകളിച്ചും പിന്നീട് ചോദ്യങ്ങള്‍ ചോദിച്ചുമുള്ള നാടകം കോണ്‍ഗ്രസ് മുക്ത കേരളത്തിനായുള്ള സിപിഎംബിജെപി തന്ത്രത്തിന്റെ ഭാഗമാണെന്നാണ് കോണ്‍ഗ്രസ് പ്രചാരണം എന്നാണ് ചെന്നിത്തല പറയുന്നത്.