ബിജെപി സ്ഥാനാര്ത്ഥി സുരേഷ് ഗോപിക്കെതിരെ പരാതി നല്കി എല്ഡിഎഫ്
തൃശൂരിലെ എന്.ഡി.എ സ്ഥാനാര്ത്ഥി സുരേഷ് ഗോപി തിരഞ്ഞെടുപ്പ് പെരുമാറ്റച്ചട്ടം ലംഘിച്ചുവെന്നാരോപിച്ച് എല്.ഡി.എഫ് തിരഞ്ഞെടുപ്പ് കമ്മിഷന് പരാതി നല്കി. എല്.ഡി.എഫ് തൃശൂര് നിയോജകമണ്ഡലം തിരഞ്ഞെടുപ്പ് കമ്മിറ്റി സെക്രട്ടറിയും ഇലക്ഷന് ഏജന്റുമായ അഡ്വ. കെ.ബി. സുമേഷ് ആണ് പരാതി നല്കിയത്.
തൃശൂര് ശക്തന് നഗര് മാര്ക്കറ്റില് വോട്ടഭ്യര്ത്ഥിച്ച് എത്തിയ വേളയില് വോട്ടര്മാര്ക്ക് സുരേഷ് ഗോപി ചില വാഗ്ദാനങ്ങള് നല്കിയിരുന്നു. അദ്ദേഹം സ്വന്തം കൈയില്നിന്നോ എം.പി ഫണ്ടില്നിന്നോ ഒരു കോടി രൂപ ചെലവഴിച്ച് തൃശൂര് ശക്തന് മാര്ക്കറ്റ് നവീകരിക്കുമെന്നാണ് വാഗ്ദാനം ചെയ്തത്. ഇത് പെരുമാറ്റച്ചട്ട ലംഘനമാണെന്ന് പരാതിയില് പറയുന്നു.
സുരേഷ് ഗോപി തന്റെ നാമനിര്ദേശ പത്രികയ്ക്കൊപ്പം സമര്പ്പിച്ച സത്യവാങ്മൂലത്തില് 68 ലക്ഷം രൂപയുടെ ബാദ്ധ്യതയുണ്ടെന്നാണ് കാണിച്ചിരിക്കുന്നത്. കേവലം 40,000 രൂപ മാത്രമാണ് തന്റെ കൈവശമുള്ളതെന്നും ഭാര്യയുടെ കൈവശം 25,000 രൂപയും വിവിധ അക്കൗണ്ടുകളിലായി 10 ലക്ഷം രൂപയുടെ നിക്ഷേപവും ഉണ്ടെന്നും പറഞ്ഞിരിക്കുന്നു. ആകെ സ്വത്തുക്കളുടെ മൂല്യം 2.16 കോടി വരുമെന്നും സുരേഷ് ഗോപി സത്യവാങ്മൂലത്തില് വ്യക്തമാക്കിയിട്ടുണ്ട്.
തന്റെ കൈയില് നിന്നും പണം ചെലവഴിച്ചായാലും ശക്തന് മാര്ക്കറ്റ് നവീകരിക്കുമെന്ന അദ്ദേഹത്തിന്റെ പ്രസ്താവന ആളുകളെ കബളിപ്പിക്കലാണെന്നും ഇങ്ങനെയൊരു വാഗ്ദാനം നല്കിയ സുരേഷ് ഗോപി സത്യവാങ്മൂലത്തില് കള്ളം പറഞ്ഞിരിക്കുന്നതായി സംശയിക്കണമെന്നും അഡ്വ. കെ.ബി. സുമേഷ് തന്റെ പരാതിയില് പറയുന്നു. എം.പി എന്ന നിലയില് സുരേഷ് ഗോപി പദവി ദുരുപയോഗിക്കുക കൂടി ചെയ്തിരിക്കുന്നുവെന്നും പരാതിയില് ചൂണ്ടിക്കാട്ടുന്നു.
കോര്പറേഷന് അധികൃതരുടെ മുന്കൂര് അനുമതി വാങ്ങാതെ ശക്തന് നഗറിലെ ശക്തന് തമ്ബുരാന്റെ പ്രതിമയില് കോണി വെച്ചുകെട്ടി മാലയിട്ട സുരേഷ് ഗോപിയുടെ നടപടിയും ചട്ടലംഘനമാണ്. അതിനു പുറമേ, ശ്രീ വടക്കുന്നാഥ ക്ഷേത്രത്തിന്റെ ചിത്രം മുദ്രണം ചെയ്ത പോസ്റ്ററുകളാണ് സുരേഷ് ഗോപിയുടെ പ്രചരണാര്ത്ഥം നഗരത്തിലും ബി.ജെ.പി യുടെ ഔദ്യോഗിക ഫേസ്ബുക്ക് പേജിലും ഉപയോഗിച്ചുവരുന്നത്. ഇതും തിരഞ്ഞെടുപ്പ് പെരുമാറ്റ ചട്ടങ്ങളുടെ നഗ്നമായ ലംഘനമാണെന്നും എല്.ഡി.എഫ് ആരോപിക്കുന്നു.
രാജ്യസഭ എം.പി എന്ന പദവിയില് ഇരിക്കുന്ന സുരേഷ് ഗോപിയുടെ ചട്ടലംഘനങ്ങള്ക്കെതിരെ നടപടി സ്വീകരിക്കണം. പരാജയഭീതിയില് എന്തെങ്കിലുമൊക്കെ വിളിച്ചുപറഞ്ഞ് ജനങ്ങളെ കബളിപ്പിക്കുന്ന നടപടി അദ്ദേഹം അവസാനിപ്പിക്കണമെന്നും എല്.ഡി.എഫ് തൃശൂര് നിയോജകമണ്ഡലം തിരഞ്ഞെടുപ്പ് കമ്മിറ്റി പ്രസിഡന്റ് കെ.വി. ഹരിദാസ്, സെക്രട്ടറി കെ.ബി സുമേഷ് എന്നിവര് പ്രസ്താവനയില് ആവശ്യപ്പെട്ടു.
https://www.facebook.com/Malayalivartha