പട പേടിച്ച് ചെന്നപ്പോള് പന്തം കൊളുത്തിപ്പട പുലിയെ പേടിപ്പിക്കാനിറങ്ങി; കുരുക്കിലായി പിണറായി പൊലീസ്, സ്വപ്നയെ ജയിലില് ചോദ്യം ചെയ്യാനും സന്ദീപ് നായരുടെ രഹസ്യമൊഴി രേഖപ്പെടുത്താനും നീക്കം നടക്കുന്നതിനിടെ എഫ്ഐആര് റദ്ദാക്കി ഹൈക്കോടതി
കേന്ദ്ര ഏജന്സികള് വേട്ടയാടുകയാണെന്ന് ആരോപിച്ചശേഷം അതേ നാണയത്തില് അവര്ക്കു മറുപടി നല്കാന് ശ്രമിച്ച സര്ക്കാരിനു ഹൈക്കോടതി വിധി തിരിച്ചടിയായി. എന്ഫോഴ്സ്മെന്റ് ഡയറക്ടേറ്റ് (ഇഡി) ഉദ്യോഗസ്ഥര്ക്കെതിരെ റജിസ്റ്റര് ചെയ്ത രണ്ടു കേസുകള് ഹൈക്കോടതി റദ്ദാക്കിയതോടെ ക്രൈംബ്രാഞ്ചിന് അന്വേഷണം അവസാനിപ്പിക്കുകയോ മേല്ക്കോടതിയെ സമീപിക്കുകയോ ചെയ്യേണ്ടിവരും. സര്ക്കാര് മേല്ക്കോടതിയെ സമീപിക്കാനാണ് സാധ്യത. സ്വപ്നയെ ജയിലില് ചോദ്യം ചെയ്യാനും സന്ദീപ് നായരുടെ രഹസ്യമൊഴി രേഖപ്പെടുത്താനും നീക്കം നടക്കുന്നതിനിടെയാണ് ഹൈക്കോടതി എഫ്ഐആര് റദ്ദാക്കിയത്.
ഉന്നത വിദ്യാഭ്യാസമന്ത്രി കെ.ടി. ജലീലിന്റെ രാജിക്കു പിന്നാലെയാണ് സര്ക്കാരിനു ഇഡി കേസ് പുതിയ തലവേദന ആയിരിക്കുന്നത്. കേസ് എടുത്ത പൊലീസുകാര്ക്കെതിരെ ബദല് കേസ് എടുക്കാനുള്ള നീക്കത്തിലാണ് ഇഡി. കേസില് ഇടപെട്ട പൊലീസ് അസോസിയേഷന് നേതാവ്, വനിതാ പൊലീസിന്റെ മൊഴിയെടുത്ത സൈബര് സെല് എസ്പി, ചില ജയില് ഉദ്യോഗസ്ഥര്, ക്രൈംബ്രാഞ്ചിലെ ഉദ്യോഗസ്ഥര് എന്നിവര്ക്കെതിരെ ഇഡി കേസെടുക്കുമോ എന്ന ആശങ്ക പൊലീസിലെ ഉന്നതര്ക്കുണ്ട്.
കേന്ദ്ര ഏജന്സിക്കെതിരെ നീങ്ങിയാല് അത് നിയമപരമായി തിരിച്ചടിയാകുമോയെന്ന ആശങ്ക തുടക്കത്തില്തന്നെ പൊലീസ് ഉദ്യോഗസ്ഥര് പങ്കുവച്ചിരുന്നു. സര്ക്കാരില്നിന്ന് ലഭിച്ച കര്ശന നിര്ദേശത്തിന്റെ അടിസ്ഥാനത്തിലാണ് കേസെടുത്തത്. കേസെടുക്കുന്നത് തിരിച്ചടിയാകുമെന്ന നിലപാടിലായിരുന്നു ഡിജിപിയും. ഇഡിക്കെതിരെ നീങ്ങിയ ഉദ്യോഗസ്ഥര്ക്കുമേല് ഇനി കേസും സമ്മര്ദവും ഉണ്ടാകുന്ന സാഹചര്യമൊരുങ്ങും. മുഖ്യമന്ത്രിക്കെതിരെ മൊഴി നല്കാന് സ്വപ്നയെ ഭീഷണിപ്പെടുത്തിയെന്ന വനിതാ പൊലീസുകാരിയുടെ മൊഴിയുടെ അടിസ്ഥാനത്തിലാണ് ഇഡിക്കെതിരെ ആദ്യ കേസെടുത്തത്. മുഖ്യമന്ത്രിക്കെതിരെ മൊഴി നല്കാന് ഇഡി ഉദ്യോഗസ്ഥര് പീഡിപ്പിക്കുന്നതായി സ്വര്ണക്കടത്തു കേസിലെ പ്രതി സന്ദീപ് നായര് ജയിലില്നിന്ന് കത്തെഴുതിയിരുന്നു.
ഇതിലാണ് രണ്ടാമത്തെ കേസ് റജിസ്റ്റര് ചെയ്തത്. മുഖ്യമന്ത്രിക്കെതിരെ മൊഴി നല്കാന് അന്വേഷണ ഉദ്യോഗസ്ഥര് പ്രതി സ്വപ്നയെ നിര്ബന്ധിച്ചെന്നു പറയുന്ന ഓഡിയോ ക്ലിപ് വ്യാജമായി നിര്മിച്ചതാണോ ശബ്ദം യഥാര്ഥമാണോ എന്നാണ് അന്വേഷണം നടത്തിയതെന്നും കേസെടുക്കാവുന്ന കുറ്റകൃത്യമാണെന്നും വ്യക്തമായതിന്റെ അടിസ്ഥാനത്തിലാണ് നടപടിയെന്നും സര്ക്കാര് അഭിഭാഷകന് വാദിച്ചു. ഒരു അന്വേഷണ ഏജന്സി കോടതിയില് നല്കിയ തെളിവുകളുടെയും വസ്തുതകളുടെയും വിശ്വാസ്യത മറ്റൊരു അന്വേഷണ ഏജന്സിക്കു പരിശോധിക്കാനാകില്ലെന്ന് ഇഡിയും കോടതിയില് വാദിച്ചു.
https://www.facebook.com/Malayalivartha
