പ്രമുഖ പ്രവാസി വ്യവസായിയായ കാസര്‍കോട് സ്വദേശി ദമ്മാമില്‍ കോവിഡ് ബാധിച്ച് മരിച്ചു... കോവിഡ് ബാധിച്ചതിനെ തുടര്‍ന്ന് രണ്ടാഴ്ചയിലേറെയായി ദമ്മാം സെന്‍ട്രല്‍ ആശുപത്രി തീവ്ര പരിചരണ വിഭാഗത്തില്‍ ചികിത്സയിലായിരുന്നു
കിഴക്കന്‍ പ്രവിശ്യയിലെ പ്രമുഖ പ്രവാസി വ്യവസായിയായ കാസര്‍കോട് സ്വദേശി ദമ്മാമില്‍ കോവിഡ് ബാധിച്ച് മരിച്ചു. ബായാര്‍ പാദാവ് പരേതനായ മൊയ്തീന്‍ കുട്ടി ഹാജിയുടെ മകന്‍ അബ്ദുല്‍ റഹ്മാന്‍ ആവളയാണ് (56) മരിച്ചത്.
കോവിഡ് ബാധിച്ചതിനെ തുടര്‍ന്ന് രണ്ടാഴ്ചയിലേറെയായി ദമ്മാം സെന്‍ട്രല്‍ ആശുപത്രി തീവ്ര പരിചരണ വിഭാഗത്തില്‍ ചികിത്സയിലായിരുന്നു. വ്യാഴാഴ്ച പുലര്‍ച്ചയോടെ നില വഷളാവുകയും രാവിലെ മരിക്കുകയുമായിരുന്നു.
അല്‍ ഖോബാറില്‍ നിരവധി സ്ഥാപങ്ങളുടെ ഉടമയാണ് ഇദ്ദേഹം. സാമൂഹിക, സാംസ്‌കാരിക രംഗത്ത് സജീവമായിരുന്ന ഇദ്ദേഹം നാട്ടിലും പ്രവാസ ലോകത്തും വലിയ ഒരു സൗഹൃദവലയത്തിനുടമയാണ്.
അല്‍ ഖോബാറില്‍ കുടുംബവുമൊത്താണ് താമസിച്ചിരുന്നത്. ഭാര്യ: സീനത്ത്, മക്കള്‍: സന, സുഹൈല, അദ്നാന്‍, അഫ്നാന്‍. സഹോദരങ്ങള്‍: ഉബൈദ്, ഇബ്രാഹിം, കാസിം മുഹമ്മദ്.
ദമ്മാം മെഡിക്കല്‍ കോംപ്ലക്സ് മോര്‍ച്ചറിയില്‍ സൂക്ഷിച്ചിരിക്കുന്ന മയ്യിത്ത് ഖബറടക്കുന്നതിനുള്ള നടപടിക്രമങ്ങള്‍ കാസര്‍കോട് ജില്ല ഇന്ത്യന്‍ സോഷ്യല്‍ ഫോറത്തിന്റെയും സാമൂഹിക പ്രവര്‍ത്തകരുടെയും നേതൃത്വത്തില്‍ പുരോഗമിക്കുന്നു.
https://www.facebook.com/Malayalivartha
